Yoane 3 - Nouveau Testament en Ngombe 1961

Yesu na Nikodemo

¹ Okina moto adaka MoPalusi kombe ende Nikodemo, mosuku oBaYuda.

² Iyo adoa ai Yesu na bulu. Abala na nde bo, Mokoja, iso bojebaka bo wɛ odi mokoja yona odonga ai Njambe; mojɔ bo Njambe amiti da na moto, atahɔnɔ bokɔ bimbete bikɔkɔ wɛ.

³ Yesu amosɔmbeja bo, Mbi natɔndɔkɔ wɛ na soti mɛnɛ bo, Moto amiti botama koko, atanɛ nongo Bokumu boNjambe.

⁴ Nikodemo amohɔjɔ bo, Moto akamea mobange, adi bobotama koko na ye? Adi bokwea koko a sɔpɔ jingwa’nde bo amobote koko?

⁵ Yesu amosɔmbeja bo, Soti mɛnɛ, mbi natɔndɔkɔ wɛ bo, Moto amiti botama na madiba na Mwembo, atakwea nongo a Bokumu boNjambe.

⁶ Mini mibotaka oko mini, na Mwembo mobotaka oko mwembo.

⁷ T’okamoe oko mojɔ bo nabali na wɛ bo, Toma botama koko.

⁸ Pwea ehweaka a esika epalaka yo. Okaka daka emina; otajehaka ko esika ehulaka pwea, na esika ekɛkɛ yo. Moto na moto yona obotama na Mwembo adi boa.

⁹ Nikodemo abala na nde bo, Imu mojɔ môda bo?

¹⁰ Yesu amosɔmbeja bo, Wɛ odi mokoja oYisalaele, na otacingeaka mijɔ mimina?

¹¹ Mbi natɔndɔkɔ wɛ na soti mɛnɛ bo, Iso bobalaka oko mijɔ mijebaka so, na botataka tati emijɔ minɛkɛ so; ino ko olonakani tati esu.

¹² Adi no pɛ bojima mijɔ mingondo mibalaka mbi, odini bojima na ye, nakatɔndɔ no mijɔ miDiko?

¹³ Pɛpɛ nongo moto okɛ oho Diko. Mwana ’Moto ko yona odi na ngando ende oho Diko, yo ahula Diko.

¹⁴ Na Mwana ’Moto âbakeama diko, o abakea Mose njɔ diko a lisobe,

¹⁵ bo moto na moto yona omojimeaka asɛ bomɔ bua bodi na bosusu.

¹⁶ Mojɔ bo Njambe apalaka ngondo na ngɛnjɔ yeye; apa Mwana’nde obotama omɔci pɛ, bo moto na moto yona omojimeaka asɛ bomɔ bua bodi na bosusu.

¹⁷ Mojɔ bo, Njambe ailoma Mwana’nde a ngondo a bosambeja ngondo; amoloma bo ngondo ehele na nde.

¹⁸ Moto akamojimea, atasamba nongo. Moto amiti mojimea, yo asamba eyou, cina bo aijima kombe eMwana ’Njambe obotama omɔci.

¹⁹ Esambi edi oko yeye; bohu bodoa a ngondo, na bato bapalaka gbo oko modidi, mojɔ bo bikɔmɛli bibu bidi bibe.

²⁰ Mojɔ bo, isa moto adi na ekɔmɛli ebe, abangaka bohu; t’amanake nongo a bohu, bo mijɔ minde misaka boloa.

²¹ Moto ko yona odi na ekɔmɛli esoti amanaka a bohu, na anejaka bo bikɔmɛli binde bihulaka ai Njambe.

Tati eYoane a Mojɔ moYesu

²² Yesu akɛ na bacingami bande ngɔngɔ a likota liYuda. Ayeyoa na bu oho, na abatisa bato.

²³ Yoane adaka a Ainona, hulelu na Salima, a ehole emina, na yo abatisaka bato pongono, mojɔ bo madiba madaka manɛnɛ a esika emina; na bato banɛnɛ badoa bo babatisame.

²⁴ Yoane aipaka kwea a blɔkɔ a ehole emina.

²⁵ Bacingami baYoane babanga boboma kitɛ na okina MoYuda a ehole emina, a mojɔ moekɔmɛli ebosasɛnoja.

²⁶ Badoa ai Yoane, babala na nde bo, Mokoja, moto yona odaka na wɛ a dɔngɔ ditongo diYoladene abatisaka bato edɛye, na bato basusu bakɛkɛ oko ai yo; wɛ mɛnɛ omojima pongono na tati ewɛ.

²⁷ Yoane asɔmbeja bo, Moto amiti sɔ epeeli eDiko, atasɔ nongo eka.

²⁸ Ojebakani no bɛnɛ bo tati embi edaka bo, Mbi naditi Masiya; nalomami oko boso bonde.

²⁹ Edi oko momi obolongana yona osɔkɔ mwali. Mina’nde momi ko asepaka a boka ebaeli ende, na adi bo’ma mema bo amohokee. Sepi embi edi oko boa; edi enɛnɛ mɛnɛ.

³⁰ Iyo adi bohɛ monɛnɛ, mbi ko nadi botita.

Mwana ’Njambe

³¹ Iyona odonga oho Diko anɔi bato basusu. Moto ongondo acingi oko na ngondo, na abalaka mijɔ mingondo. Iyona odonga oho Diko anɔi bato basusu mɛnɛ.

³² Iyo anejaka oko ngando jinɛ yo na jika yo; pɛpɛ nongo moto ko ojimaka tati ende.

³³ Iyona ojimaka tati ende angamejaka mojɔ mu, bo Njambe adi soti.

³⁴ Mojɔ bo yona olomama na Njambe abalaka oko bikenge biNjambe, cina bo yo t’angɛke mwɛngi yana apaka yo Mwembo.

³⁵ Sango adi na ngɛnjɔ ai Mwana, na akina mijɔ misusu a mɔmɔ mande.

³⁶ Iyona ojimeaka Mwana adi na bomɔ na bosusu. Iyona ko olonaka bojimea Mwana atanɛ nongo bomɔ, na kɛnjɔ eNjambe edi oko ai yo.