Yoane 21 - Nouveau Testament en Ngombe 1961

A Libale liTibelia

¹ Yesu asaneja koko ngɔngɔ jimina ai bacingami a mbongu elibale liTibelia.

² Asaneja boa yana adaka bo baboli a esika emɔci,—oko Simona Pɛtɛlo na Toma, kombe ende etongo Lipasa; Natanaele, moto oKana, ngando eGalile, na bana-bami baSebede, na bacingami bande batongo babae.

³ Simona Pɛtɛlo abala na bu bo, Mbi nakɛkɛ a boduka swi. Ibo babala na nde bo, Iso bokɛkɛ na wɛ pongono. Oko boa bakɛ, batamba a bwato, baiwa ko nongo eka a bulu bomina.

⁴ Yana ahoa busa, Yesu adaka ami a mbongu. Bacingami ko baijeba bo yo adi Yesu.

⁵ Yesu abala na bu bo, Bana, odini na eka eboyaka? Ibo bamosɔmbeja bo, Pɛpɛ nongo eka.

⁶ Iyo abala na bu bo, Dumbani eyoma a dɔngɔ dibwato diebɔ ebami na ôwani. Akɔ bo boa, baihɔnɔ bogbula eyoma a mojɔ moeweeli eswi enɛnɛ.

⁷ Oko boa mocingami yona odaka Yesu na ngɛnjɔ abala na Pɛtɛlo bo, Edi oko Kumu! Yana aka Simona Pɛtɛlo bo edi Kumu, yo alwa kasaka ende, mojɔ bo adaka oko na elwali eelomu, na asadumba a madiba.

⁸ Bacingami batongo badoa na bwato, badaka bakagbule eyoma na swi botɔ. (Mojɔ bo baidaka a boliko mɛnɛ, oko bisimbo macinda matano pɛ.)

⁹ Aduboa bo a mbongu, batana mosa momalo, na swi badaka batumbi ena, na milɛmbɛ pongono.

¹⁰ Yesu abala na bu bo, Doani na bakina baswi bawoi no.

¹¹ Simona Pɛtɛlo atamba koko a bwato a bogbula eyoma a mbongu. Edaka na swi oko botɔ, swi banɛnɛnɛ mokama momɔci na domi-itano na swi basato. Nongo adaka bo na swi banɛnɛ boa, eyoma ebu eitweana.

¹² Yesu abala na bu bo, Doani a boyaka. Pɛpɛ nongo mocingami omɔci ko omohɔjɔ bo, Wɛ nda?—oko a mojɔ mobɔ. Bajebaka bo yo adi Kumu.

¹³ Yesu abatama, atomba molɛmbɛ na abapa. Akɔ boa na swi pongono.

¹⁴ Iye edi ehole ebisato esaneja Yesu ai bacingami bande yana angɔ yo a bogwa.

Yesu na Petelo

¹⁵ Yana aseja bo boyaka, Yesu abala na Pɛtɛlo bo, Simona mwana ’Yona, ngɛnjɔ ewɛ ai mbi enɔi yena ebu? Iyo amosɔmbeja bo, Ee Kumu, ojebaka bo mbi napalaka wɛ. Yesu abala na nde bo, Bɔkɔ bana-bata bambi.

¹⁶ Abala na nde koko bala ejibae bo, Simona mwana ’Yona, odi na mbi ngɛnjɔ? Iyo amosɔmbeja bo, Ee Kumu, ojebaka bo mbi napalaka wɛ. Yesu abala na nde bo, Banea bata bambi.

¹⁷ Abala na nde bala ejisato bo, Simona mwana ’Yona, opalaka mbi? Pɛtɛlo aka monɔngɔ a molema yana abala Yesu na nde bala ejisato bo, Opalaka mbi? Âmosɔmbeja bo, Kumu, wɛ ojebaka ngando jisusu. Ojebaka bo mbi napalaka wɛ. Yesu abala na nde bo, Bɔkɔ bata bambi.

¹⁸ Mbi natɔndɔkɔ wɛ na soti bo, Yana adaka wɛ mwenga, olwaka bisenja wɛ mɛnɛ, na okɛkɛ a bisika bipalaka wɛ. Okakɔmɔ ko, ôninoja mɔmɔ mawɛ, na okina otongo alwaja wɛ, na âtomba wɛ a esika edi wɛ pɛ bopala.

¹⁹ Abala boa a bojebeja bo yo adi bokumeja Njambe na bogwa bomina. Aseja Yesu bobala boa, abala na Pɛtɛlo bo, Susa mbi.

²⁰ Mocingami oYesu ongɛnjɔ adaka acingi ngɔngɔ jibu,—oko yona oma kɛmɛ a bupa bonde a Kola, na amohɔjɔ ho, Kumu, odi bokaba wɛ nda?—Pɛtɛlo ahekoa na amonɛ.

²¹ Pɛtɛlo, yana amonɛ yo, abala na Yesu bo, Kumu, mojɔ momoto yo môda bo?

²² Yesu amosɔmbeja bo, Mbi nakajima bo yo ayeyoe oko a lihule limbi, moditi mojɔ mowɛ. Wɛ, susa mbi.

²³ Oko boa, mojɔ monangana a tei ebaninga bo mocingami omina atagwa. Yesu ko aibala bo atagwa. Abala bo, Mbi nakajima bo yo ayeyoe oko a lihule limbi, moditi mojɔ mowɛ.

²⁴ Mocingami omina adi oko yona odi monjɛnɛki ongando jimina. Iyo asɔni ngando jimina. Na bojebaka bo tati ende edi tati esoti.

²⁵ Yesu akɔ ngando jitongo jinɛnɛ. Jikasɔnɔmɔ jisusu a mikanda, nalɛkɛ bo esika edi botaka a ngondo a bodeja mikanda mimina.