Yoane 20 - Nouveau Testament en Ngombe 1961

Yesu Angɔ a Bogwa

¹ Malia oMagadala akɛ a esɛmɔ a busa boboso, a ehole eehuma pu, oko na ehindahindi, na anɛ bo litai lima donga a esɛmɔ.

² Oko boa apota ebango, akɛ ai Simona Pɛtɛlo na ai mocingami yona otongo opalaka Yesu. Abala na bu bo, Badongejai Kumu a esɛmɔ, na botajebaka esika emosambei bo.

³ Pɛtɛlo na mocingami yona otongo bamana bo bakɛe a esɛmɔ.

⁴ Ibo basusu babae bapota mbango. Mocingami yona otongo ko anɔ Pɛtɛlo na ebango, na yo amea a esɛmɔ boso.

⁵ Asumana, anja a tei, na anɛ bisenja bipu bisambi; aikwea ko a tei.

⁶ Simona Pɛtɛlo amea ngɔngɔ jinde; yo akwea a tei eesɛmɔ, na anɛ bisenja bipu bisambi,

⁷ na litambala pongono lia limaka da a molo moYesu. Litambala liidaka a esika ebisenja bipu; lima bulukama pundu, na lidaka a esika etongo.

⁸ Mocingami otongo, yona omea boso a esɛmɔ, akwea a tei pongono. Iyo anɛ, na ajima.

⁹ Mojɔ bo baipaka cingea Mosɔnɔ bo adi bongɔ a bogwa.

¹⁰ Oko boa bacingami bamina basɔmbɔ koko a ndako.

¹¹ Malia ko adaka ami a sokolu eesɛmɔ, na ayeaka bio. Ayeaka yo, asumana a bonja a tei eesɛmɔ,

¹² na anɛ babwɛnji baDiko babae. Ibo badaka na mbondo a esika emaka da mokuku moYesu, okina a molo, otongo a bibota, na bisenja bibu bidaka bipu.

¹³ Babwɛnji bahɔjɔ Malia bo, Mwali, oyeaka mojɔ moye? Iyo abasɔmbeja bo, Mojɔ bo badongejai Kumu ombi, na nitajebaka esika emosambei bo.

¹⁴ Amaka yo bala boa, ami hekoa oko bohekoa, na anɛ Yesu yona odaka ami ena; aijeba ko bo yo adi Yesu.

¹⁵ Yesu abala na nde bo, Mwali oyeaka mojɔ moye? Odukaka nda? Malia alɛkɛ bo yo adi moswa ogbie, na abala na nde bo, Kumu, isa wɛ omodongejai, tɔndɔ mbi esika emosambei wɛ, bo mbi namotombe.

¹⁶ Yesu abala na nde bo, Malia! Malia ahekoa, na abala na nde a kɔpi eBaEbele bo, Laboni! (Cina emina edi Mokoja.)

¹⁷ Yesu abala na nde bo, Yɛ bobandani na ebɔ, mojɔ bo naweakini ai Sango. Wɛ ko, kɛ ai baninga bambi; bala na bu bo mbi nakawee ai Sangwa’mbi na ai Sangwa’nu, ai Njambe ombi na ai Njambe onu.

¹⁸ Malia oMagadala akɛ na bwɛnji bomina ai bacingami bo, Mbi nani Kumu. Abatɔndɔ koko mijɔ mibala Kumu na nde.

Yesu Asaboloja ai Bacingami

¹⁹ Yana adipa busa bomina, oko busa boboso, bacingami badaka baboli a ekina ndako, na bakanda midipe a mojɔ mobɔ boBaYuda. Yesu adoa, ama a ndanda ebu, na abala na bu bo, Bowi ai no!

²⁰ Ama yo bala boa, ami baneja oko mɔmɔ mande na litebu linde. Bacingami badaka na sepi yana anɛ bo Kumu.

²¹ Yesu abala na bu koko bo, Bowi ai no! Mbi nalomaka no o aloma Sango mbi.

²² Aseja yo bobala bikenge bimina, asopa mohuli a diko dibu, na abala bo, Asɔni Mwembo Mosɛnɔke.

²³ Okacingoani bato a jibe jibu, bada bacingoamake. Okabakinani a mbɔci, bada oko a mbɔci.

²⁴ Toma, kombe ende etongo Lipasa, okina obu Domi-na-babae, aidaka na bu yana adoa Yesu.

²⁵ Oko boa bacingami batongo babala na nde bo, Iso boni Kumu. Iyo ko abala na bu bo, Mbi namiti nɛ na miso bihuli bikala a mɔmɔ mande, na namiti sa mosapi mombi a litebu linde, nitajima nongo.

²⁶ Yana anɔ masu bomwambe, bacingami badaka baboli koko a ndako, na Toma adaka na bu. Bakanda midipe; Yesu ko akwea, ama a ndanda ebu, na abala bo, Bowi ai no!

²⁷ Abala koko na Toma bo, Anja mɔmɔ mambi. Batea mosapi ya. Ninoja ebɔ. Isa ebɔ ewɛ a litebu limbi. Yɛ boda na kitɛ; jima oko bojima.

²⁸ Toma amosɔmbeja bo, Kumu ombi na Nja-mbe ombi!

²⁹ Yesu abala na nde bo, Wɛ ojimi mojɔ bo oni mbi na miso. Bojongoa ai bato baya bajimaka, nongo adi bo pɛ bonɛ na miso.

³⁰ Yesu akɔ bimbete bitongo binɛnɛ a boso bobacingami, bia bisɔnɔmiti a mokanda mu.

³¹ Ibi ko bisɔnɔmi bo ojimeni bo Yesu adi Masiya, Mwana oNjambe, na bo odaeni na bomɔ a kombe ende, oko a mojɔ moejimeli.