Yoane 2 - Nouveau Testament en Ngombe 1961

Embete eYesu Eboso

¹ Yana anɔ masu mabae, lihango iidaka a Kana, ngando eGalile. Nange eYesu adaka ena.

² Bahea koko Yesu na bacingami bande a lihango.

³ Vino ko eibwana, na nange ’Yesu abala na nde bo, Bapeliti koko vino.

⁴ Yesu amosɔmbeja bo, Mwali, edi mojɔ mombi isa mowɛ? Ehole embi ebwanakini.

⁵ Ngwa’nde abala na bakɔmɛli bandako bo, Akabala na nu mokina mojɔ, toma kɔni mojɔ momina.

⁶ Biomba bimatai bisamano bidaka ena na madiba bo BaYuda basasose o akɔkɔ bo bihole bisusu; tu eyomba ebwana na litres domi-libwa isa mokama na dea.

⁷ Yesu ajɔ na bu bo, Lume jani biomba na madiba, na babilumeja botɔ mɛnɛ.

⁸ Abala na bu koko bo, Lokani edɛye; tombani oho ai moswa ’lihango.

⁹ Yana akɔ bo boa, moswa ’lihango alɛlɛ madiba maya makindoa vino, yo ko pɛ bojeba esika ehula vino emina. (Bakɔmɛli ko baya baloka madiba bajeba.) Oko boa yo abea momi obolongana na abala na nde bo,

¹⁰ Bato basusu bamejaka vino epele boso, na bakamwaka bopele, badi bomeja vino yena editi epele bou. Wɛ ko okini vino epele oko a suka.

¹¹ Yesu akɔ embete ye ende eboso oko a Kana, ngando eGalile, na aneja ekumu ende; na bacingami bande bamojimea.

¹² Ngɔngɔ jimina, akɛ a Kapalanauma, yo mɛnɛ na ngwa ’nde, na bananango, na bacingami bande pongono. Bayeyoa oho mweka, te nongo ekoka.

Yesu Asɛnoja Tempelo

¹³ Yesu akɛ a Yelusalema cina bo edika mweka pɛ a Kola eBonɔ eBaYuda.

¹⁴ Iyo atana bato a tempelo baya bangɛjɛkɛ ngɔmbɔ, na bata, na sungu, na basɔmbɔtɔni balikonja pongono.

¹⁵ Akɔ pimbo na mikina mikpulu, na ababengana basusu a tempelo, na bata na ngɔmbɔ pongono. Asopa koko likonja libasɔmbɔtɔni, na adumba mesa mabu.

¹⁶ Atɔndɔ bato baya bangɛjɛkɛ sungu bo, Dongejani leka lomina ya. T’ohekojaeni oko ndako eSangwa’mbi bo edae ndako ebwasa.

¹⁷ Na bacingami bande balɛ ekenge yena edi a Misɔnɔ bo, Posa embi a ndako eSangwa ’mbi emajai mbi mokuku.

¹⁸ BaYuda bamohɔjɔ bo, Akɔkɔ wɛ ngando jiji, embete enejaka wɛ so nda?

¹⁹ Yesu abasɔmbeja bo, Bukani tempelo ye, na mbi naengɔjɔ koko na masu masato.

²⁰ BaYuda babala na nde bo, Elomu eboyoa tempelo ye eyeyoa bianga domi-inɛi na bisamano, na wɛ obwani boeyoa na masu masato?

²¹ Iyo ko abala a mojɔ motempelo emokuku monde.

²² Bacingami bande balɛ ekenge emina yana angɔ yo a bogwa, na bajima mosɔnɔ momina na ekenge ema bala Yesu pongono.

²³ Yana adaka Yesu a Yelusalema a mojɔ moKola-eBonɔ, bato banɛnɛ bajimea kombe ende, mojɔ bo banɛkɛ bimbete bikɔkɔ yo.

²⁴ Yesu ko adaka na mokakwano a mojɔ mobu, cina bo ajebaka bato basusu;

²⁵ ajebaka yo mɛnɛ ngando jia jidaka a tei ebato, pɛpɛ nongo moto bomotɔndɔ.