Yoane 19 - Nouveau Testament en Ngombe 1961

¹ Pilato atomba Yesu na amotueja.

² Basoda badinga mokɔli monjubɛ bo bakɔe na likongo. Babakea likongo a molo monde, na bamolwaja kasaka eyai ekpetu.

³ Badoa a boso bonde na babala bo, Mbalea! Kumu oBaYuda! Bamola koko ndumo.

⁴ Pilato amana koko na abala na bu bo, Anjani; mbi namomejaka a boso bonu, a bojebeja no bo mbi nabolojaiti nongo mojɔ mobe na nde.

⁵ Oko boa Yesu amana. Alwaka kasaka eyai ekpetu, na adaka na likongo linjubɛ a molo. Pilato abala na bu bo, Anjani moto!

⁶ Basuku banganga na bapolisi babu, yana anɛ bo Yesu, babekoa bo, A mole-mobokea! A mole-mobokea! Pilato abala na bu bo, Moto-mbani no bɛnɛ na mobakeani a mole-mobokea, mojɔ bo mbi nabolojaiti nongo mojɔ mobe na nde.

⁷ BaYuda bamosɔmbeja bo, Iso bodi na mobeko. A mojɔ momobeko momina, mokindo mua mobwani na nde modi oko bogwa. Mojɔ bo abali bo adi Mwana ’Njambe.

⁸ Yana aka Pilato bikenge bimina, bɔ bonde bohɛ oko bohɛ.

⁹ Akwea koko a ndako, na abala na Yesu bo, Wɛ ohuli jɔ? Yesu ko aimosɔmbeja.

¹⁰ Pilato abala na nde koko bo, Otasɔmbe-jaka mbi? Otajebaka bo mbi nadi na kpaci a bocingoa wɛ, na kpaci a bobakea wɛ a mole-mobokea?

¹¹ Yesu amosɔmbeja bo, Eipeta da bo osi kpaci emina eDiko, ka obwaniti bokɔ na mbi nongo mojɔ. Oko boa, yona okabini ai wɛ anɔi wɛ na lindo.

¹² A mojɔ momina, Pilato aduka njea bo amocingoe. BaYuda ko babekoa bo, Okacingoa moto omina oditi mina oKaisala. Moto yona obalaka bo adi Kumu asɛtojaka Kaisala.

¹³ Yana aka Pilato bikenge bimina, ameja Yesu sokolu, na ada a ngɛndɛ eesambi, a esika yena edi na kombe Moboku-moMatai. (Gabata a kɔpi eBaEbele.)

¹⁴ Edaka ehole emidi, a busa boMosɛlingo a mojɔ moKola-eBonɔ. Pilato abala na bu bo, Anjani Kumu onu!

¹⁵ Ibo babekoa bo, Modongeja! Modongeja! Mobakea a mole-mobokea! Pilato abala na bu bo, Nâbakea Kumu onu a mole-mobokea? Basuku banganga basɔmbeja bo, Iso boditi na okina kumu otongo, oko Kaisala pɛ.

¹⁶ Oko boa Pilato amopa a mɔmɔ mabu bo bamobakee a mole-mobokea, na bapea Yesu bo bakɛe na nde.

Mole-Mobokea

¹⁷ Yesu atomba mole-mobokea monde mɛnɛ, na akɛ a ekina esika yena edaka na kombe Gɔlɔgɔta a kɔpi eBaEbele. Gina ekombe emina edi Esika-eEbebele.

¹⁸ Bamobakea a mole-mobokea a esika emina, na bakina batongo babae pongono, okina a dɔngɔ dinde diebɔ ebami, yona otongo a dɔngɔ diebɔ ebali, Yesu yo mɛnɛ a ndanda.

¹⁹ Pilato asɔnɔ mokina mosɔnɔ, na amobakea a mole-mobokea. Mosɔnɔ modaka bo, YESU ONASALETA, KUMU OBAYUDA.

²⁰ BaYuda banɛnɛ balanga mosɔnɔ momina, mojɔ bo esika ebakea bo Yesu a mole-mobokea edaka na ngando hulelu. Mosɔnɔ momina modaka a kɔpi jiBaEbele, na BaEla, na BaLoma.

²¹ Basuku banganga baBaYuda babala na Pilato bo, Obwaniti bosɔnɔ, Kumu oBaYuda. Sɔnɔ oko bo yo abali bo, Mbi nadi Kumu oBaYuda.

²² Pilato asɔmbeja bo, Mojɔ mosɔni mbi mosi.

²³ Abakea bo Yesu a mole-mobokea, basoda batomba bisenja binde, na babikaba mabondo manɛi, tu soda linde libondo. Kasaka ende ko eyai eyoama boa, pɛpɛ mondondo, diko oko a nase.

²⁴ A mojɔ momina, babalana bo, Ebɔngiti bo boe’la; bopele bo bobome jonga a bojeba moto yona odi boesɔ; mojɔ momina mongameja ekenge eMisɔnɔ bo, Bakabani bisenja bimbi libondo libondo. Babomi jonga a mojɔ mokasaka embi. Mojɔ mokɔ basoda modaka boa.

²⁵ Ngwa’nde na nango-ngɔngɔ badaka ba’mi hulelu na mole-mobokea, na Malia mwali oKelopa, na Maha oMagadala.

²⁶ Yana anɛ Yesu ngwa’nde na mocingami onde ongɛnjɔ a dɔngɔ dinde, abala na ngwa’nde bo, Mama, anja mwana’wɛ!

²⁷ Abala koko na mocingami omina bo, Anja ngwao! Oko boa, mocingami omina amosɔ o moto odenga dinde mɛnɛ a ehole emina.

Bogwa boYesu

²⁸ Ngɔngɔ mweka, Yesu ajeha ho mojɔ mosia mosusu. Oko boa, abala bo, Ekangola ekɔkɔni, (a bongameja Misɔnɔ).

²⁹ Ekina eyomba edaka ena yena eluma na vinaigre. Oko boa, bagbɔmeja limbusu na vinaigre, balihangea a mongongele, na balingɔjɔ a monɔkɔ monde.

³⁰ Ama yo sɔ vinaigre, Yesu ami bala oko bo, Mojɔ mosi! Asunea molo monde na ameja mwembo monde.

³¹ Busa bomina bodaka busa boMosɛlingo. A mojɔ momina, BaYuda baipala bo mikuku mibu miyeyoe a melemibokea oko a busa boSabata; (cina bo busa bomina bodaka mojɔ monɛnɛ mɛnɛ). Oko boa, ba’nga Pilato bo babuke mako mabu, na bo babadongejae.

³² Basoda badoa, babuka mako mayona oboso, na yona otongo koko, oko baya badaka na nde a mele-mibokea.

³³ Yana ko amea bo ai Yesu, banɛ bo yo ama gwa, na baibuka mako mande.

³⁴ Okina soda omɔci ko amondea litebu na likɔngɔ, na makia na madiba mamana bokpa.

³⁵ Iyona onɛ mojɔ momina atɔndɔ mojɔ momina, na tati ende edi tati esoti. Iyo ajebaka bo abalaka na soti mɛnɛ, bo ino ojimeni pongono.

³⁶ Mojɔ bo ngando jimina jidaka boa a bongameja Mosɔnɔ bo, Mokua monde motabukea nongo momɔci.

³⁷ Mosɔnɔ motongo mobalaka koko bo, Badi bonɛ yona ondea bo.

Bapusea Yesu

³⁸ Yosepa oAlimate adaka mocingami oYesu; yo ko abomba mojɔ cina bo abangaka BaYuda. Yana asia ngando jimina, yo anga Pilato njea bo atombe mokuku moYesu, na Pilato ajima. Oko boa, yo adoa na atomba mokuku monde.

³⁹ Nikodemo adoa pongono, oko yona oma doa ai Yesu na bulu. Iyo adoa na kasa jihtindi, isa kilo domi-inɛi na dea.

⁴⁰ Ibo batomba mokuku moYesu, na bamodinga na bisenja bipu na kasa jilitindi o akɔkɔ BaYuda a lipusi.

⁴¹ Ekina gbie edaka a esika ebakeama Yesu a mole-mobokea, na esɛmɔ eyene edaka a gbie emina; baipaka pusea moto ena.

⁴² Oko boa basambea Yesu ena, mojɔ bo esɛmɔ edaka hulelu. Busa bomina hodaka busa boMosɛlingo moBaYuda.