Yoane 18 - Nouveau Testament en Ngombe 1961

Bapea Yesu

¹ Yana asieja yo mijɔ mimina bobala, Yesu amana na bacingami bande. Baleka ekina ediba, kombe Kedelona; bakɛ a ekina esika edaka gbie, na akwea ena na bacingami bande.

² Yuda, mokabi onde, ajeba esika emina, mojɔ bo Yesu atitanaka na bacingami bande oho bihole bmɛnɛ.

³ Oko boa Yuda asɔ pɔlɔtɔ ebasoda na bapolisi ai basuku banganga na BaPalusi. Ibo batomba paka na mitanda na mililo mibila, na bakɛ a esika emina.

⁴ Yesu ajebaka mijɔ misusu mia midi bokwa na nde. Oko boa, yo adoa a bosongana na bu, na abala na bu bo, Odukakani nda?

⁵ Ibo bamosɔmbeja bo, Yesu oNasaleta. Yesu abala na bu bo, Mbi yoyo.

⁶ Yana abala yo na bu bo, Mbi yoyo, bagasima oko bogasima, na bakwa a kpɔtɔ.

⁷ Yesu abahɔjɔ koko ho, Odukakani nda? Iho basɔmbeja bo, Yesu oNasaleta.

⁸ Yesu asɔmbeja bo, Mbi natɔndɔi no bo mbi nadi yo. Isa odukakani mbi, kinani bato ba bayane.

⁹ Oko boa, ekenge engama yena ebala yo bo, Naibungeja nongo omɔci obato bapani wɛ.

¹⁰ Simona Pɛtɛlo adaka na abɛnɛ. Oko boa amohwa, akwɛlɛ mokɔmɛli omosuku onganga pola, na amolena litoi liebɔ ebami; kombe emokɔmɛli omina Maluko.

¹¹ Yesu ko abala na Pɛtɛlo bo, Sɔmbeja abɛnɛ owɛ ta ligbogbo. Mbi nitamwa kɔpɔ epini Sango?

¹² Pɔlɔtɔ ebasoda, na kapitɛni obu, na bapolisi baBaYuda, bapea Yesu na bamokanda mbɔci.

¹³ Bakɛ na nde boso ai Ana, mojɔ bo yo adaka bokio boKayapa, mosuku onganga a yanga emina.

¹⁴ Kayapa adaka moto yona oleha BaYuda bo moto omɔci abwani bogwa a mojɔ mobato.

Petɛlo Angana Yesu

¹⁵ Simona Pɛtɛlo asusa Yesu, na okina mocingami otongo pongono. Mocingami omina ajebeanaka na mosuku onganga. Oko boa yo akwea na Yesu a lopango lomosuku onganga.

¹⁶ Pɛtɛlo ko adika oko sokolu. Oko boa, mocingami yona otongo amana sokolu, abala na mwali yona onjaka modipe, na akweja Pɛtɛlo.

¹⁷ Mwali yona onjaka modipe abala na Pɛtɛlo bo, Wɛ, te mocingami omoto omina? Iyo asɔmbeja bo, Te mbi.

¹⁸ Bakɔmɛli na bapolisi batokana mosa na malo, na badaka ba’mi ena bo basahumejae a mojɔ mopio. Pɛtɛlo adaka ami na bu pongono bo asahumejae a mosa.

¹⁹ Mosuku onganga akokeleja Yesu a mojɔ mobacingami bande na bokoja bonde.

²⁰ Yesu amosɔmbeja bo, Mbi nabali na ngondo a bohu mɛnɛ. Nakojaka a sinagoge na a tempelo, a bisika bititanaka BaYuda basusu. Naibala nongo a libombi.

²¹ Ohɔjɔkɔ mbi mojɔ moye? Hɔjɔ bato baya baki mijɔ mibali mbi na bu.

²² Abala yo boa, okina polisi yona odaka hulelu amohoma epapata, na abala bo, Osɔmbejaka mosuku onganga boa mojɔ moye?

²³ Yesu amosɔmbeja bo, Isa nabali mojɔ mobe, aneja bobe bomina. Isa ko nabali bopele, obomi mbi mojɔ moye?

²⁴ Ana ko amoloma oko a mbɔci boso Kayapa, mosuku onganga.

²⁵ Simona Pɛtɛlo adaka ami ena be asahumejae a mosa. Bakina babala na nde bo, Wɛ oditi okina obaemgami bande? Iyo angana oko bongana; abala bo, Te mbi.

²⁶ Okina mokɔmɛli omosuku onganga (Pɛtɛlo alena litoi limwangwa’nde) ahɔjɔ Pɛtɛlo bo, Mbi nataniti wɛ na nde a gbie?

²⁷ Pɛtɛlo angana koko, na kɔkɔ abelekoa bokpa.

Esambie Yesu

²⁸ Bamana na Yesu a ndako eKayapa, na bakɛ na nde a ndako egouverneur. Edaka oko mwakeli. Ibo bɛnɛ baikwea a ndako egouverneur na cina ebikia bibu, mojɔ bo bapalaka bo bayake Kola-eBonɔ.

²⁹ A mojɔ momina, Pilato amana, na abala na bu bo, Odini na moto omina mojɔ? Modi bo?

³⁰ Bamosɔmbeja bo, Akɔki yo da moto mopele, ka bodoiti na nde ai wɛ.

³¹ Pilato abala na bu bo, Motombani no bɛnɛ; mosambejani na Mibeko minu bɛnɛ. BaYuda babala na nde bo, Iso boditi na kpaci a boweja moto.

³² Mojɔ mu mongameja ekenge ema bala Yesu a boneja tungu ebogwa bonde.

³³ Pilato akwea koko a ndako tei. Abea Yesu na abala na nde bo, Wɛ odi Kumu oBaYuda?

³⁴ Yesu amosɔmbeja bo, Obali boa wɛ mɛnɛ, isa bato batongo babali na wɛ a mojɔ mombi?

³⁵ Pilato asɔmbeja bo, Adi mbi MoYuda? Bato bawɛ mɛnɛ, na basuku banganga badoi na wɛ ai mbi; mojɔ mokɔi wɛ nda?

³⁶ Yesu abala bo, Bokumu bombi boditi bokumu bongondo ye. Akɔki mbi da na bokumu bongondo ye, ka bakɔmɛli bambi bani bila, bo BaYuda batapea mbi. Bokumu bombi ko boditi bokumu bongondo.

³⁷ Pilato abala na nde bo, Oko boa odi Kumu? Yesu amosɔmbeja bo, Wɛ mɛnɛ obali bo nadi Kumu. Cina ebobotama bombi, cina ebodoa bombi a ngondo edi oko bo natate tati a mojɔ moSoti. Moto na moto yona odi moto oSoti akaka monɔkɔ mombi.

³⁸ Pilato abala na nde bo, Soti, iye nde? Yana abala yo ekenge emina, amana sokolu ai BaYuda. Abala na bu bo, Mbi nabolojaiti nongo mojɔ na nde.

³⁹ Ino ko odini na ekina ekɔmɛli bo nacingoe moto omɔci ai no a ehole eKolaeBonɔ. Opalakani bo nacingoe Kumu oBaYuda ai no?

⁴⁰ Ibo babekoa koko bo, Te moto yo, oko Balaba! Balaba ko adaka mobengo.