Yoane 17 - Nouveau Testament en Ngombe 1961

Bonga boYesu

¹ Yana aseja yo bobala bikenge bimina, Yesu akahoa miso oho Diko, na abala bo, Sesa, ehole emei. Kumeja Mwana’wɛ bo Mwana’wɛ akumejae wɛ.

² Wɛ omopa kpaci ai bato basusu, bo apɛ bomɔ bua bodi na bosusu ai bato basusu bamopa wɛ.

³ Bomɔ bua bodi na bosusu bodi oko bo bajebe wɛ, Njambe osoti omɔci, na yona oloma wɛ, oko Yesu Masiya.

⁴ Mbi nakumejai wɛ a ngondo, mojɔ bo nasiejai elomu epani wɛ a bokɔ.

⁵ Sesa, kumeja mbi edɛye a boso bowɛ mɛnɛ, oko na ekumu yena edaka na mbi a boso bo wɛ oko ngondo epetakini yoama.

⁶ Mbi najebejai kombe ewɛ ai bato bapani wɛ a ngondo. Badaka oko bato bawɛ; wɛ obapani, na basumaka ebaeli ewɛ.

⁷ Bajebaka edɛye bo ngando jisusu jipani wɛ jihula oko ai wɛ.

⁸ Mbi nabapi bikenge bipani wɛ. Ba’si bikenge bimina; bajebaka na soti bo mbi nadonga ai wɛ, na bajimaka bo wɛ oloma mbi.

⁹ Mbi nangaka a mojɔ mobu. Nita’ngaka a mojɔ mongondo; nangaka oko a mojɔ mobato bapani wɛ, mojɔ bo badi bato bawɛ, na ekumu embi edi oko ai bo.

¹⁰ Ngando jimbi jisusu jidi ai wɛ, na ngando jiwɛ jisusu jidi ai mbi.

¹¹ Mbi te nayake da a ngondo. Ibo ko badi a ngondo, na mbi nadoaka ai wɛ. Sesa mosɛnɔke, banea bato bapani wɛ, a kombe ewɛ mɛnɛ, bo badae omɔci o adi so omɔci.

¹² Ehole edaka mbi na bu, nababaneaka a kombe ewɛ epani wɛ. Mbi nabaka-kelaka, na pɛpɛ nongo omɔci obu obungi,—oko mwana olibunga pɛ —bo Mosɔnɔ mongame.

¹³ Edɛye ko nakɛkɛ nadoe ai wɛ. Mbi nabalaka mijɔ mi yana adi mbi a ngondo, bo badae na sepi embi a tei ebu botɔ.

¹⁴ Mbi nabapi ebaeli ewɛ. Ngondo ko edi na bu soki, mojɔ bo baditi bato bangondo; o adi mbi mɛnɛ, naditi moto ongondo,

¹⁵ Mbi nita’ngaka wɛ bo obadongejae a ngondo. Nangaka oko bo obakakele ai yona Mobe.

¹⁶ Mbi naditi moto ongondo; oko boa ibo baditi bato bangondo.

¹⁷ Ekenge ewɛ edi Soti. Hɛngɛ bo ai wɛ oko na Soti ewɛ.

¹⁸ Wɛ olomani a ngondo; oko boa koko, mbi nalomi bo a ngondo.

¹⁹ Mbi nasabɛngɛkɛ ai wɛ a mojɔ mobu, bo bahɛngɛme ai wɛ na soti.

²⁰ Mbi mta’ngaka a mojɔ mobu pɛ. Nangaka a mojɔ mobato baya badi bojimea mbi a mojɔ mobokoja bobu,

²¹ bo ibo basusu badae oko omɔci, bo badae omɔci a tei esu, o adi wɛ Sesa a tei embi, na mbi a tei ewɛ, bo ngondo ejime bo wɛ oloma mbi.

²² Mbi nabapi ekumu epani wɛ, bo badae oko omɔci, o adi so omɔci,

²³ —mbi a tei ebu, na wɛ a tei embi,—oko boa bokatana bobu bodi bobɔngɔ, na ngondo êjeba bo wɛ oloma mbi, na bo obapalaka o apalaka wɛ mbi.

²⁴ Sesa, posa embi edi oko bo baya bapani wɛ badae na mbi a esika edi mbi, bo banje ekumu embi, oko ekumu epani wɛ; mojɔ bo odaka na mbi ngɛnjɔ oko ngondo epetakini yoama.

²⁵ Sesa, Yona obodongo, ngondo etajebaka wɛ. Mbi ko najebaka wɛ; ibaba pongono bajebaka bo wɛ oloma mbi.

²⁶ Mbi nabolojai kombe ewɛ ai bo, na nâeboloja koko, bo ngɛnjɔ edi wɛ na mbi edae a tei ebu, na mbi a tei ebu.