Yoane 13 - Nouveau Testament en Ngombe 1961

Yesu Asosa Bibota Bibacigami

¹ Yana adaka Kola-eBonɔ pɛ bopeta mea, Yesu ajeba bo ehole ende emea, ehole ebodonga a ngondo ye, a bokɛ ai Sango. Amaka yo da na ngɛnjɔ ai bande mɛnɛ baya badaka a ngondo, ami baneja oko ngɛnjɔ pɛ njɛngi.

² Satana ama sa bolɛ a molema moYuda Iskalio, mwana oSimona, bo amokabe. Oko boa, yana ayakaka bo Kola,

³ Yesu ajeba bo Sango ama kina ngando jisusu a mɔmɔ mande. Ajeba koko bo ama donga ai Njambe, na bo adi bosɔmbɔ ai Njambe.

⁴ A mojɔ momina, yo angɔ a mesa, ahwa kasaka ende eya, atomba esume, na asadinga na esume emina.

⁵ Ahangoja madiba a saani, abanga bososa bibota bibacingami, na abihakoa na esume ema dinga yo a hongo.

⁶ Yana amea yo ai Simona Pɛtɛlo, Pɛtɛlo abala na nde bo, Kumu, wɛ odi bososa bibota bimbi?

⁷ Yesu amosɔmbeja bo, Wɛ otacingeaka edɛye mojɔ mokɔkɔ mbi; ôcingea oko ngɔngɔ.

⁸ Pɛtɛlo abala na nde bo, Pɛpɛ; otasosa nongo bibota bimbi! Yesu amosɔmbeja bo, Namiti sosa wɛ, oditi a libondo limbi.

⁹ Simona Pɛtɛlo abala na nde bo, Kumu, sosa mɔmɔ na molo mombi pongono, te bibota bimbi pɛ.

¹⁰ Yesu abala na nde bo, Yona ososi mokuku monde mosusu abwani bososa oko bibota binde pɛ, bo adae mosusu oko na bosɛnɔ. Ino odini na bosɛnɔ, te basusu ko.

¹¹ Mojɔ bo yo ajebaka yona odi bomokaba. Oko boa abala bo, Oditini na bosɛnɔ no basusu.

¹² Yana aseja Yesu bososa bibota bibu, alwa koko kasaka ende. Ada koko a mesa, na abala na bu bo, Osipoakani mojɔ mo’mi mbi kɔ ai no?

¹³ Obeakani mbi Mokoja na Kumu onu, na olongini, mojɔ bo nadi boa.

¹⁴ Oko boa, isa mbi nasosi bibota binu, mbi Kumu na Mokoja onu, toma sosanani bibota no bɛnɛ.

¹⁵ Mbi nanejai no ekoaneli bo okɔeni o ami mbi kɔ ai no.

¹⁶ Soti mɛnɛ, mbi natɔndɔkɔ no bo mobuli t’anɔke moswa’nde; na obwɛnji t’anɔke yona omoloma.

¹⁷ Isa ojebakani ngando jimina, ôdani na bojongoa okajikɔ.

¹⁸ Nitabalaka a mojɔ monu basusu. Najebaka bato bahɔi mbi; mosɔnɔ mu ko modi bongama. Iyona oyakaka na mbi molɛmbɛ angɔjɔi dilindi dinde a bodumba mbi.

¹⁹ Natɔndɔkɔ no mojɔ momina edɛye, oko mokwakini. Oko boa, mokakwa, odini bojima bo mbi nadi yo.

²⁰ Mbi natɔndɔkɔ no na soti bo, yona osɔkɔ moto olomaka mbi, asɔkɔ mbi mɛnɛ; na yona osɔkɔ mbi, asɔkɔ yona olomani.

Ngabi eYesu

²¹ Aseja Yesu bobala boa, adaka na monɔngɔ a mwembo monde. Abala bo, Mbi natɔndɔkɔ no bo okina onu adi bokaba mbi.

²² Bacingami banjana oko bonja na mokakwano monɛnɛ a mojɔ momoto obala yo.

²³ Okina mocingami onde adaka akɛmi a bupa boYesu,—Yesu adaka na nde ngɛnjɔ.

²⁴ Oko boa, Simona Pɛtɛlo amojebeja na embete eebɔ bo ahɔ jɔe kombe emoto obala yo.

²⁵ Yona odaka akɛmi a bupa boYesu amohɔjɔ ho, Kumu, moto omina nda?

²⁶ Yesu amosɔmbeja bo, Nakadubea ekenge ye emolɛmbɛ, na nakapa moto, edi oko yo. Oko boa adubea ekenge emolɛmbɛ na aepa ai Yuda, mwana oSimona Iskalio.

²⁷ Yana asɔ yo molɛmbɛ, Satana akwea a tei ende. Yesu abala na nde bo, Kɔ bokpa Inojɔ mokɛkɛ wɛ akɔe.

²⁸ Baya badaka ko a mesa baicingea mojɔ mobala yo na nde.

²⁹ Bakina babu balɛ bo Yesu amotɔndɔ bo asombe leka lua lotakaka na bu a mojɔ moKola, isa bo apɛ ekina eka ai bato babokwali; mojɔ bo Yuda abaneaka litɔngi lilikonja.

³⁰ Oko boa, ama yo sɔ ekenge emolɛmbɛ, ami mana oko bomana bokpa; na edaka bulu.

³¹ Yana amana Yuda, Yesu abala bo, Mwana ’Moto akumejami edɛye, na Njambe akumejami a tei ende.

³² Isa Njambe asi ekumu a tei ende, Njambe adi bomokumeja a tei ende mɛnɛ, na âmokumeja bokpa.

³³ Bana bambi bakɛkɛ, mbi nitada koko na nu ekoka. Ino ôdukani mbi. Mbi ko nabalaka na nu edɛye, o abali mbi na BaYuda bo, Otahɔnɔkɔni bodoa a esika ekɛkɛ mbi.

³⁴ Mbi napaka no mobeko moyene, bo opalaneni; toma palanani o apalaka mbi no.

³⁵ Okadani na epaeli, moto ai mina’nde moto, bato basusu badi bojeba bo odini bacingami bambi oko na mojɔ momina.

³⁶ Simona Pɛtɛlo abala na nde bo, Kumu, akɛkɛ wɛ jɔ? Yesu amosɔmbeja bo, Wɛ otahɔnɔkɔ bosusa mbi edɛye a esika ekɛkɛ mbi; ôsusa mbi oko ngɔngɔ.

³⁷ Pɛtɛlo abala na nde bo, Kumu, nitahɔnɔkɔ bosusa wɛ edɛye mojɔ moye? Mbi nadi bogwa a mojɔ mowɛ.

³⁸ Yesu amosɔmbeja bo, Odi bogwa a mojɔ mombi? Mbi natɔndɔkɔ wɛ na soti bo odi bongana mbi ngana jisato, oko kɔkɔ abelekoakini.