Yoane 12 - Nouveau Testament en Ngombe 1961

Malia Asuoa Yesu Malasi

¹ Kola-eBonɔ edika oko masu masamano pɛ yana amea Yesu a Betania, esika edaka Lazalo oma ngɔjɔ Yesu a bogwa.

² Bakalea mia a mojɔ moYesu a esika emina, na Malata akɔ elomu emesa. Lazalo ko adaka okina obu baya badaka na Yesu a mesa.

³ Malia atomba malasi mabobuno bonɛnɛ mɛnɛ, isa litre emɔci. Asuoa bibota biYesu malasi, na ahakoa bibota binde na swe jinde. Ndako esusu mɛnɛ eluma na soo epele emalasi.

⁴ Okma mocingami onde omɔci, oko Yuda Iskalio yona odi bomokaba, abala bo,

⁵ Iyo angɛjɛiti malasi mamina na pata mikama misato mojɔ moye, a bopa bato babokwali?

⁶ Iyo abala boa mojɔ bo adaka mobi. Aidaka nongo na bolɛ a mojɔ mobato babokwali.

⁷ Yesu ko abala bo, Yɛ bomonɔngeja! Abanei eka emina a mojɔ mobusa bobopusea bombi.

⁸ Odini na bato babokwali a tei enu masu masusu. Mbi ko naditi a tei enu na bosusu.

Yesu Akwea a Yelusalema

⁹ Bato bangando banɛnɛ baBaYuda baka mwako bo Yesu adaka oho. Oko boa badoa, te a mojɔ moYesu pɛ; badoa a bonɛ Lazalo pongono oma ngɔjɔ Yesu a bogwa.

¹⁰ A mojɔ momina, basuku banganga badumba ndungu bo bawoe Lazalo pongono; mojɔ bo BaYuda banɛnɛ badonga, na bajima Yesu oko a mojɔ moLazalo.

¹² Iyana ahoa busa, bato banɛnɛ baya bama doa a Kola, baka bo Yesu akɛkɛ adoe a Yelusalema.

¹³ Oko boa batomba malalo, na bakɛ bo bamolenoane. Babekoa bo, Osana! Bojongoa ai yo yona odoaka a kombe eKumu! Kumu oYisalaele!

¹⁴ Yesu adaka abaki a mwana-punda oboloja yo, mojɔ bo, mosɔnɔmɔ bo,

¹⁵ Mwamwali oSiona, yɛ bobanga! Anja, Kumu owɛ akɛkɛ adoe. Adi abaki a mwana-punda.

¹⁶ Bacingami bande baicingea cina ebikenge bimina a ehole emina. Yana ko akumama yo, basalɛjɛ bo bisɔnɔmɔ a mojɔ monde, na bo bingama koko na nde.

¹⁷ Bato banɛnɛ baya badaka na nde yana abea yo Lazalo bo amane a esɛmɔ yana amongɔjɔ yo a bogwa, batɔndɔ mojɔ momina pongono.

¹⁸ Oko boa, bato banɛnɛ baya baka mwako momondumba mokɔ yo, bakɛ bo bamolenoane.

¹⁹ A mojɔ momina, BaPalusi babalana bo, Onɛkɛni bo otahɔnɔkɔni bokɔ mokina mojɔ. Anjani, ngondo esusu ecingi na nde engbanga!

BaEla Baduka Yesu

²⁰ Bakina BaEla badaka bacingi na bato baya badoa a mojɔ mobosakoa a Kola.

²¹ Ibo badoa ai Pilipo, moto oBetesaida, ngando eGalile. Bamo’nga bo, Kumu, iso bodi na posa bo bonɛe Yesu.

²² Pilipo akɛ atɔndɔe Andalea. Andalea akɛ na Pilipo, na batɔndɔ Yesu.

²³ Yesu abasɔmbeja bo, Ehole emei bo Mwana ’Moto akume.

²⁴ Soti mɛnɛ, mbi nabalaka na nu bo, Ngua endongo emiti kwa a tei ekpɔtɔ bo egwɛ, edi bodika oko ngasa. Ekagwa ko, edi bobota libota linɛnɛ.

²⁵ Iyona opalaka mohelo monde mɛnɛ âmobungeja. Iyona ko olonaka mohelo monde mɛnɛ a ngondo ye, âmobanea a mojɔ mobomɔ bua bodi na bosusu.

²⁶ Isa moto akɔmɛkɛ mbi, yɛ asuse mbi. Mokɔmɛli ombi abwani boda oko a esika edi mbi. Sangwa’mbi âkumeja moto na moto yona okɔmɛkɛ mbi.

²⁷ Edɛye ko, molema mombi modi na monɔngɔ. Nadi bobala bo? Sesa, belejani a ehole ye? Pɛpɛ; mbi namei a ehole ye oko a mojɔ momina. Sesa, kumeja kombe ewɛ.

²⁸ Kɔpi esi ko edongi oho Diko bo, Mbi naekumejai, na nâekumeja koko.

²⁹ Emumu ebato baya badaka ba’mi ena baka kɔpi emina, na babala bo, Bɛi agami! Batongo babala bo, Obwɛnji oDiko abali na nde.

³⁰ Yesu abasɔmbeja bo, Kɔpi emina edoi a mojɔ monu, te a mojɔ mombi.

³¹ Ngondo edi bosamba edɛye. Kumu ongondo ye âdumbama bokpa.

³² Mbi ko nakangɔjɔmɔ a diko dingondo, nâbilea bato basusu ai mbi.

³³ Iyo abala boa a boneja tungu ebogwa bokɛkɛ yo agwɛ.

³⁴ Bato bamosɔmbeja bo, Iso bokaka a Mibeko bo Masiya adi boyeyoa na bosusu. Oko boa wɛ obalaka bo Mwana’Moto ângɔjɔmɔ diko mojɔ moye? Iyo Mwai na ’Moto adi nda?

³⁵ Yesu abala na bu bo, Bohu bodi boyeyoa na nu oko ehole ekue pɛ. Dalani yana adi no na bohu, bo modidi motadipa no njea. Mojɔ bo, yona odalaka a modidi atajebaka nongo njea ekɛkɛ yo.

³⁶ Adi no na bohu, jimani bohu bomina, bo odaeni bana babohu. Asieja yo bobala mijɔ mi, Yesu adonga na asabomba ai bo.

Bohu Bongondo

³⁷ Nongo akɔkɔ yo bimbete binɛnɛ a boso bobu, baimojimea.

³⁸ Oko boa ekenge ebala motɔndɔi Yisaya engama bo, Kumu, ojimi mwako mosu nda? Ebɔ eKumu eboloi ai nda?

³⁹ A mojɔ momina, baihɔnɔ bojima; mojɔ bo Yisaya abala koko bo,

⁴⁰ Iyo adimei miso mabu, na apingejai milema mibu, Bo batanɛ na miso, batacingea na milema, Basaka hekoa ai mbi bo nabahelejae.

⁴¹ Yisaya abala boa mojɔ bo yo anɛ ekumu ende, na abala mojɔ monde.

⁴² Endele ko, basuku bangando banɛnɛ bamojimea. Ibo ko badaka na bɔ a mojɔ moBaPalusi, na baitɔndɔ mojɔ momina a bohu, bo batabameja a sinagoge.

⁴³ Na esako ebato, na ekumu eNjambe, bapala gbo oko esako ebato.

⁴⁴ Yesu abekoa bo, Moto yona ojimeaka mbi ajimeaka yona olomani, te mbi mɛnɛ.

⁴⁵ Iyona onɛkɛ mbi, anɛkɛ koko yona olomani.

⁴⁶ Mbi nadoi o bohu a ngondo, bo yona ojimeaka mbi atayeyoa koko a modidi.

⁴⁷ Moto aka’ka bikenge bimbi, pɛ ko bosuma bikenge bimina, mbi nitamosambejaka. Mojɔ bo, mbi nadoiti a bosambeja ngondo. Nadoi oko a boheleja ngondo.

⁴⁸ Moto akalona mbi, pɛ bojima bikenge bimbi, adi na juji onde. Ekenge ebali mbi emosambejabí a busa bosuka.

⁴⁹ Mojɔ bo mbi nabaliti na kpaci embi mɛnɛ. Sango yona olomani abekeani bikenge bibobala na botɔndɔ.

⁵⁰ Mbi najebaka bo mobeko monde modi oko bomɔ bua bodi na bosusu. Oko boa, mbi nakabala, nabalaka oko mijɔ mipakani Sango.