Yoane 11 - Nouveau Testament en Ngombe 1961

Yesu Angɔjɔ Lazalo a Bogwa

¹ Okina mom adaka na yogo, kombe ende Lazalo, moto oBetama, ngando eMalia na mwangwa’nde Malata.

² Lazalo yona odaka na yogo, adaka ngɛnɛ eMalia yona osnoa Kumu malasi, na ohakoa bibota binde na swe jinde.

³ Oko boa ngɛnɛ jiLazalo baloma monɔkɔ ai Yesu bo, Kumu, yona odi wɛ na epaeli asambi na yogo.

⁴ Aka Yesu mwako momina, abala bo, Yogo ye editi ebogwa. Edi oko a mojɔ mobokumeja Njambe, na bo Mwana ’Njambe asɛ ekumu a mojɔ momina.

⁵ Yesu adaka na epaeli ai Malata, na mwangwa’nde, na Lazalo.

⁶ Iyo ko, yana aka yo bo Lazalo apekaka, ayeyoa koko masu mabae a esika edaka yo.

⁷ Anɔ masu mamina, abala na bacingami bande bo, Yɛni bosɔmbe koko a Yuda.

⁸ Bacingami babala na nde bo, Kumu, BaYuda bapalakabi bo bale wɛ matai oko na masu ma, na opalaka bo osɔmbe koko oho?

⁹ Yesu asɔmbeja bo, Heures jidi domi-na-jibae a mose. Moto akadala na mose, atasaka nongo libaku, mojɔ bo anɛkɛ bohu bongondo.

¹⁰ Moto ko akadala na bulu, adi bosaka libaku, mojɔ bo bohu boditi a tei ende.

¹¹ Asieja yo bobala mijɔ mi, ajɔ na bn bo, Mina’su Lazalo ahwɛi hiɔ. Mbi ko nakɛkɛ bo namosisojae.

¹² Bacingami babala na nde bo, Kumu, isa ahwɛi hiɔ, adi bohela a yogo.

¹³ Yesu ko abala a mojɔ mobogwa boLazalo, na bacingami balɛ bo abalaka a mojɔ mohiɔ pɛ.

¹⁴ Oko boa Yesu abatɔndɔ a bohu ho, Lazalo agwi!

¹⁵ Nadi na sepi bo naidakabi oho, oko a mojɔ monu, bo ojimeni. Yɛni so bokɛe ai yo edɛye.

¹⁶ Toma, yona odaka koko na kombe Lipasa, abala na bacingami batongo bo, Suani bokɛ, bo bogwɛ na nde!

¹⁷ Yana amea Yesu, atana bo Lazalo adaka a esɛmɔ masu manɛi.

¹⁸ Betania edi na Yelusalema hulelu, mosiso oko kilometa jisato na dea.

¹⁹ Oko boa BaYuda badoa banɛnɛ ai Malata na Malia bo babagɔmbejae a mojɔ mongɛnɛ ebu.

²⁰ Malata ko, ama yo ka bo Yesu akɛkɛ adoe, ami kɛ oko bo amolenoane. Malia ko adika oko a ndako.

²¹ Malata abala na Yesu bo, Kumu, akɔki wɛ da jɔno ka ngɛnɛ embi agwiti.

²² Mbi ko najebaka bo oka’nga Njambe nongo edɛye, Njambe adi bopa wɛ mua mongaka wɛ.

²³ Yesu abala na nde bo, Ngɛnɛ ewɛ adi bongɔ koko.

²⁴ Malata amosɔmbeja bo, Najebaka bo adi bongɔ koko a busa bosuka.

²⁵ Yesu abala na nde bo, Mbi nadi Bongɔ, nadi koko Bomɔ. Iyona ojimeaka mbi âda koko na bomɔ, nongo akada mogwake.

²⁶ Na yona odi mɔ na ojimeaka mbi atagwa nongo. Wɛ ojimaka mojɔ mu?

²⁷ Iyo amosɔmbeja bo, Ee Kumu; mbi najimaka bo wɛ odi Masiya, Mwana ’Njambe, yona odaka na sako ebodoa a ngondo.

²⁸ Ama yo bala boa, ami kɛ oko a bobea mwangwa’nde na bopɛtɛ bo, Mokoja adoi, na abɔjɔkɔ wɛ.

²⁹ Aka yo ekenge emina, angɔ bokpa na akɛ ai Yesu.

³⁰ Yesu ko aipaka mea a ngando. Adaka oko a esika esongana yo na Malata.

³¹ BaYuda baya badaka na Malia a ndako a mojɔ moboyea na nde, yana anɛ bo Malia akangɔe pɛlɛpɛlɛ a bomana, bamokimana, mojɔ bo balɛkɛ bo akɛkɛ a esɛmɔ a boyea oho.

³² Malia ko, yana amea yo a esika edaka Yesu, yana amonɛ yo, asadumba a bibota binde, na abala na nde bo, Kumu, akɔki wɛ da jɔno, ka ngɛnɛ embi agwiti.

³³ Yana anɛ Yesu bo yo ayeaka, na BaYuda pongono baya badaka na nde, abema mobemo a molema monde, na ada na monɔngɔ.

³⁴ Iyo abala bo, Omopuseabini jɔ? Babala na nde bo, Kumu, doa okanje.

³⁵ Yesu ayea bio.

³⁶ A mojɔ momina, BaYuda babala bo, Anjani, adaka na nde epaeli soti.

³⁷ Bakina babu ko babala bo, Moto yo, yona odipoa miso mamoto omiso mago, aibwanabi bokɔ mokina mojɔ, bo Lazalo aigwabi mojɔ moye?

³⁸ Yesu abema koko mobemo, na amea a esɛmɔ. Esɛmɔ edaka oko engbungbulu a tei emonɔ, na edipama na litai linɛnɛ.

³⁹ Yesu abala bo, Dongejani litai. Malata, ngɛnɛ emomi yona oma gwa, abala na nde bo, Kumu, apɔbi edɛye, mojɔ bo adi ya masu manɛi.

⁴⁰ Yesu ko abala na nde bo, Mbi nabaliti na wɛ bo odi bonɛ ekumu eNjambe okada na ejimeli?

⁴¹ oko boa badongeja litai. Yesu akahoa miso diko, na ahala bo, Sesa, mbi nasakoaka wɛ mojɔ bo oki mbi.

⁴² Najebi bo okaka mbi bihole bisusu. Nabali boa ko a mojɔ mobato baya bahikaka mbi, bo bajime bo wɛ olomani.

⁴³ Ama yo bala boa, ami bekoa oko bo, Lazalo! imana sokolu!

⁴⁴ Mogwake amana sokolu; mɔmɔ mande na mako mande madaka makandamake na bisenja biesɛmɔ, na boso bonde bohuama na litambala. Yesu abala na bu bo, Mocingoani; mokinani adale.

⁴⁵ Bakina BaYuda banɛnɛ baya badaka na Malia bajimea Yesu yana anɛ bo mojɔ mokɔ yo.

⁴⁶ Bakina batongo ko bakɛ ai BaPalusi na babatɔndɔ mojɔ mokɔ Yesu.

Ndungu a Bowa Yesu

⁴⁷ Basuku banganga na BaPalusi babolea likita libajuji. Babala bo, Iso bôkɔ boni? Moto omina akɔkɔ mindumba minɛnɛ.

⁴⁸ Bokamokina boa, bato basusu mɛnɛ badi bomojimea, na BaLoma badi bodoa a bobeja ngondo esu na likota lisu.

⁴⁹ Okina obu, kombe ende Kayapa, yona odaka mosuku onganga a yanga emina, abala na bu bo. Ino otacingekani nongo mojɔ.

⁵⁰ Na bogwa bomoto omɔci a mojɔ mobato basusu, na bodimoa bolikota lisusu, otaje-bakani bo moto omɔci akagwea bato basusu bo likota lisusu litadimoa, enɔi na bopele ai no bo moto omɔci agwɛ, bo likota lisusu litadimoa?

⁵¹ Iyo aibala boa na bolɛ bonde mɛnɛ. Adaka mosuku onganga a yanga emina, na apa eseko bo Yesu adi bogwa a mojɔ moliko talihbu;

⁵² te a mojɔ molikota limina pɛ, oko bo abolee bana basusu baNjambe baya banangana a esika emɔci.

⁵³ Oko boa badumba ndungu a busa bomina bo bamowoe.

⁵⁴ A mojɔ momina, Yesu aidala koko a tei eBaYuda a bohu. Adonga ena, na akɛ a ekina ngando kombe Epalaima. Esika emina edaka hulelu na lisobe, na ayeyoa oho na hacingami bande.

⁵⁵ Edika mweka pɛ a ehole eKola-eBonɔ eBaYuda. Bato banɛnɛ badonga a bisika bitongo, a bokɛ a Yelusalema, bo basasɛnojae a mojɔ moKola-eBonɔ.

⁵⁶ Ibo baduka Yesu, na babalana yana adaka bo a tei etempelo bo, Olɛkɛni bo? Isa atadoa a Kola?

⁵⁷ Basuku banganga na BaPalusi bama dumba mobeko bo moto akajeba esika edi yo, adi bobajebeja, bo bamopee.