Yakobo 5 - Nouveau Testament en Ngombe 1961

¹ Ino bato balikonja, yeani mbisoli e dɛye; ngbɛngbɛmɛni a mojɔ mominɔngɔ mia mikɛkɛ adoe ai no.

² Makonja manu mapɔi; bisenja binu bibehi na sɛ.

³ Wɔlɔ enu, na likonja linu lipalata, libehi na bikpa; bikpa bimina bidi botata tati a bodumba no, na bidi boyaka mini minu o ekɔmɛli emosa. Ino obombini likonja linɛnɛ a masu masuka.

⁴ Hokeani; likonja lisonge libasali banu baya baliaka gbie jinu, likonja litombi no na bokosea, libekoaka oko bobekoa. Bio bibasali baya babisaka a gbie bimei a matoi maKumu oma-ndundu madiko.

⁵ Ogolakani ya nase na leka lopele, pɛ bosajumani nongo eka. Ogolejakani milema minu a busa bomogweli monɛnɛ.

⁶ Odumbini na owoini moto obodongo, na yo pɛ boswiana na nu.

⁷ Baninga, toma dani na lingbangba oko a bodoa boKumu. Anjani moto yona odi na gbie; yo ambaka mbuma jipele jigbie, na adi na lingbangba oko a ehole ekwaka mbua baboso na mbua basuka a gbie.

⁸ Toma dani na lingbangba koko boa. Pingejani milema minu, mojɔ bo bodoa boKumu bodi hulelu.

⁹ T’ohimaneni oko baninga, osaka sambani. Hokeani; juji adi a modipe.

¹⁰ Baninga, ikoanani na batɔndɔi baya babala a kombe eKumu, ikoanani na lingbangba libu a bodingoa.

¹¹ Iso bosakoaka bato baya badaka na lingbangba. Ojebakani mojɔ molingbangba liJobo, na onɛni mokano moKumu ai yo, mojɔ bo Kumu adi na wa na monganji botɔ.

¹² Baninga, mojɔ monɛnɛ mɛnɛ oko mu;—t’obɛlɛni oko bɛli, isa bɛli a mojɔ moDiko, isa bɛli a mojɔ mongondo, isa ekina bɛli etongo. Kwani mojimo monu modae oko Ee, na bongana bonu oko pɛpɛ, bo otakwani na mojɔ.

¹³ Isa okina onu adi na monɔngɔ, adi bonga Njambe. Isa okina onu adi na sepi adi bo’mba njembo.

¹⁴ Isa okina onu adi na yogo, adi bobea basuku baDenga. Ibo badi bonga Njambe a mojɔ monde na badi bomosuoa munɛ a kombe eKumu.

¹⁵ Na bonga bua bodi na ejimeli bodi boheleja moto yona opekaka, na Kumu adi bomo-ngɔjɔ. Isa akɔi mikina mijɔ Mibe, adi bosɔ bo yɛ bojibe.

¹⁶ A mojɔ momina, toma bolojani jibe jinu, moto ai mina’nde moto, na ingani Njambe, moto a mojɔ momina’nde moto, bo oheleni.

¹⁷ Elia adaka moto na ekɔmɛli emoto o adi so bɛnɛ. Iyo anga Njambe na bingi bo mbua atakwa, na mbua aikwa a ngondo bianga bisato na songe basamano.

¹⁸ Anga koko Njambe, na mbua ahula Diko, na kpɔtɔ jibota koko.

¹⁹ Baninga bambi, okwa onu akalaboa a njea esoti, na okwa otongo akamohuleja,

²⁰ moto omina abwani bojeba bo yona ohulejaka moto mobe a njea elibunga linde, adi boheleja mwembo momoto omina a bogwa, na adi bokunda jibe jinɛnɛ.