Yakobo 4 - Nouveau Testament en Ngombe 1961

Eleho a Mojɔ Moposa

¹ Mane na miano a tei enu mahulaka jɔ? Mitahulaka a posa jinu jia jinaka a tei ebinama binu?

² Omboakani pɛ ko bodiha, na owakani. Odini na mbengia, pɛ ko bohɔnɔ bosɔ. Oko boa onakani, na odini na miano. Opelitini eka, mojɔ bo ota’ngakani.

³ Onga-kani pɛ ko bosɔ, mojɔ bo ongakani na libunga, na njingo bo onamejaeni mua mongaka no na posa jinu jibe.

⁴ Ino Bali bandukeli! Otajebakani bo limbaci lingondo lidi lisoki ai Njambe? Oko boa, moto yona opalaka bo apande limbaci na ngondo adi na Njambe oko soki.

⁵ Ino odingakani bo ebaeli eMisɔnɔ edi ngasa yena ebalaka bo, Epaeli ende edi na likaka a mojɔ momwembo mokɔ yo a boda a tei esu?

⁶ Iyo ko ahɛjɛkɛ monganji oko bohɛjɛ. A mojɔ momina Misɔnɔ Mibalaka bo, Njambe anaka na bato baegbo, Adi ko na monganji ai bato bamilema mititake.

⁷ Oko boa toma sumani Njambe. Imani a bona na Satana na adi bocia no.

⁸ Sabateani na Njambe, na yo adi bosabatea na nu. Ino bato babe, sɛnojani mɔmɔ manu. Ino bato babokosea, sɛnojani milema minu bopɛɛ.

⁹ Dani na esɔpi; yeani kɔndɔ na mbisoli. Yɔ enu ebwani bohekoa bio, na sepi enu ebwani bohekoa wa.

¹⁰ Satitejani a boso boNjambe, na yo adi bongɔjɔ no.

¹¹ Baninga, t’olɔngɔneni oko. Moto akalɔngɔ mwangwa’nde, isa akasambeja mwangwa’nde, alɔngɔkɔ Mibeko, na asambejaka Mibeko. Isa osambejaka Mibeko, otasumaka Mibeko, na osabakeaka juji.

¹² Obakeaka Mibeko oko omɔci pɛ; juji omɔci oko yo, yona obwani boheleja isa bodumba. Wɛ ko yona osambejaka minao moto, wɛ odi nda?

Mojɔ Molikonja

¹³ Hokeani e dɛye, no bato baya babalaka bo, Bodi bokɛ a ekina ngando busa bu isa puma; bodi boyeyoa oho yanga emɔci a bokɔ bwasa na bohɛjɛ likonja lisu.

¹⁴ Otajehakani nongo mojɔ mua mobwani bokwa puma. Mohelo monu modi bo? Odini oko lidudu, pɛ, lia liyeyoaka mweka, na lidimoaka oko bodimoa.

¹⁵ Obwanini bobala bo, Njambe akajima, bôda na bomɔ, bôkɔ mojɔ mu, isa mojɔ mua.

¹⁶ E dɛye ko, osakumejakani na egbo enu. Bosakumeja bomina bodi mojɔ mobe.

¹⁷ Moto yona ojebaka bokɔ bopele, pɛ ko bokɔ bopele, akɔkɔ oko bobe.