Yakobo 2 - Nouveau Testament en Ngombe 1961

Epaeli

¹ Baninga, adi no na ejimeli ai Kumu osu Yesu Masiya, Kumu oEkumu, Podaeni oko na ekɔmɛli ebokumeja bakina bato, na bolona batongo.

² Okina moto akadoa a botitana bonu na elwali ebobuno bonɛnɛ, na pɛtɛ jiwɔlɔ a sapi; na moto obokwali akakwea oko na bipupu pɛ;

³ na okanjani oko moto yona odi na elwali epele a bobala na nde bo, Da ya a edie ye epele; na okabalani na moto obokwali bo, Ima oho, isa, Da ya nase a dɔngɔ diegboto embi;

⁴ okakɔni boa, otakabakani bato a Milema minu? Otasambe-jakani bato na bilɛli bibe?

⁵ Baninga baepaeli, hokeani. Njambe ahɔ bato babokwali bangondo mojɔ bo likonja libu lidi oko ejimeli, bo badae basangoli baBokumu bodikeja yo ai baya bamopalaka.

⁶ Ino ko osambojakani moto obokwali. Banɔngejaka no banda, te bato balikonja? Bagbulaka no a bisambi banda, te bo?

⁷ Kombe yena ebeama na nu edi na ekumu; baloleaka ko kombe emina banda, te bato bamina?

⁸ Okɔkɔni bopele isa osumakani Mobeko moKumu mua mosɔnɔmɔ a Misɔnɔ bo, Toma pala motuteano mowɛ o asapalaka wɛ mɛnɛ.

⁹ Okakumejani ko bakina bato, na okalonani batongo, okɔkɔni bobe; na Mobeko modumbaka no o bato babe.

¹⁰ Mojɔ bo, moto aka-kputoa na mojɔ momɔci pɛ, adi na lindo jiMibeko misusu, nongo akasuma misusu mitongo.

¹¹ Yona obala bo, T’ongɛe oko bɔɔli, abala koko bo, T’owoe oko moto. Oko boa, okawa moto, osopaka Mobeko, nongo adi wɛ pɛ bongɛ nongo bɔɔli.

¹² Kinani bibaeli binu na bikɔmɛli binu bibwane na bato baya badi bosamba na Mibeko Mibosɔmi.

¹³ Mojɔ bo, moto yona opeliti wa atasamba na wa. Wa edi bolonga a esambi.

Ejimeli na Bikɔmɛli

¹⁴ Baninga, moto akabala bo adi na ejimeli na apeliti bikɔmɛli, adi bobɔngɔ na ye? Ejimeli emina ebwani bomoheleja?

¹⁵ Isa mwananange’moto, isa ngɛnɛ emoto adi mbundu, na adi na nja busa na busa,

¹⁶ na okwa onu akabala na bu bo, Kɛ bopele, sahumeja na mosa, na gola na dia, pɛ ko bobapa leka a mojɔ momikuku Mibu, mojɔ momina mobɔngi?

¹⁷ Oko boa, ejimeli ngasa, pɛ bikɔmɛli, edi oko eka ego.

¹⁸ Okina moto ko adi bobala bo, Wɛ odi na ejimeli; mbi nadi na bikɔmɛli. Anejani ejimeli ewɛ yena edi ngasa, pɛpɛ bikɔmɛli, na mbi nadi boneja wɛ ejimeli embi oko na bikɔmɛli bimbi.

¹⁹ Ojimaka bo Njambe adi omɔci; mojɔ momina modi mopele. Endele ko, miembo Mibe mijimaka pongono, na midi na bongongoma.

²⁰ Wɛ egegele, otajebaka bo ejimeli ngasa, pɛpɛ bikɔmɛli edi eka engasa?

²¹ Tata osu Abalayama ailonga a cina ebikɔmɛli yana abakea yo mwana’nde Isaka a litumbu o lisiko?

²² Onɛkɛ bo ejimeli edaka ecingi na bikɔmɛli binde; ejimeli ende ebɔngɔ oko na bikɔmɛli binde.

²³ Oko boa mosɔnɔ mongama mua mobalaka bo, Abalayama ajimea Njambe, na mojɔ momina molangama ai yo o bodongo, na bamobea Limbaci liNjambe.

²⁴ Onɛkɛ bo moto alongaka na bikɔmɛli, te na ejimeli ngasa.

²⁵ Laba, mwali ondukeli, alonga koko boa na bikɔmɛli yana asɔ yo kɛngi na abayaneja a njea etongo.

²⁶ Mokuku mokada ngasa, pɛpɛ mwembo, modi oko mogwake; ejimeli edi koko boa; isa eciniti na bikɔmɛli edi eka ego.