Tito 3 - Nouveau Testament en Ngombe 1961

¹ Lɛjɛ bato bo badi bosuma bakumu na basuku. Babwani boda na lisuma; badi boda na mosɛlingo a bokɔ bilomu bisusu bipele.

² Babwaniti bolɔngɔ nongo moto, isa boda na nduki emijɔ; badi boda na milema mi yɛmbu, na bombɔki mɛnɛ, ai bato basusu.

³ Mojɔ bo so bɛnɛ bodaka boso na bogegele, na lipanga, bato balaboake, na babuli baposa jibe, na balisɔngi. Mida misu midaka masu masusu oko na bobe na likaka. Bato balona so, na so bolonana so bɛnɛ.

⁴ Yana ko aboloa monganji moNjambe Moheleja osu, na epaeli ende ai bato,

⁵ yo aheleja so, te cina ebikɔmɛli bisu bipele, oko a mojɔ mowa ende mɛnɛ, na bosɛnoja bobobotama boyene, na eyoeli eyene eMwembo Mosɛnɔke

⁶ mosopa yo na likabo linɛnɛ ai so a tei eYesu Masiya Moheleja osu,

⁷ bo bolonge cina emo-nganji monde, na bo bodae basangoli babomɔ bua bodi na bosusu o adi so na njingo.

⁸ Ekenge emina edi soti, na mbi napalaka bo okojae ngando jimina na bingi, bo bato baya bajimaka Njambe badae na bingi a bikɔmɛli bipele. Mijɔ mi midi mipele mɛnɛ na Mibɔngejaka bato.

⁹ Toma lona ko mabɔjɔ maya mapeliti cina, na mijɔ mimbota jibato, na miano, na mosoo a mojɔ moMibeko. Ngando jimina jidi oko ngasa mɛnɛ, na jibɔngiti nongo mweka.

¹⁰ Moto akabɔtɔ na nu, moleha ehole emɔci, isa bihole bibae, na mokina yo.

¹¹ Ojebaka bo moto omina adi molaboake, moto mobe, na asadumbaka yo mɛnɛ.

¹² Namaka loma Alutema isa Tukiko ai wɛ, kenga bodoa ai mbi bokpa a Nikɔpɔli, mojɔ bo najimi bo nayeyoe oho edidi esusu epio.

¹³ Sɛlingoa na bopele mɛnɛ a mojɔ momɔngɔ moSena yona odi juji, na Apolo, ho batataka nongo eka.

¹⁴ Bato basu badi bokoa bo bakɔe bilomu bipele.

¹⁵ Bato basusu baya badi na mbi ya babɛjɛkɛ wɛ njɛbɛ. Abɛjɛ bato baya bapalaka so a Ejimeli. Yɛ monganji moNjambe modae na nu basusu.