Matayo 9 - Nouveau Testament en Ngombe 1961

Moto oMokɔbɛlɛ

¹ Yesu atamba koko a bwato, alekela, na ahula a ngando ende mɛne.

² Bato badoa ai yo na moto omokɔbɛlɛ yona odaka asambi a litɔkɔ, Yana anɛ Yesu ejimeli ebu, abala na moto omokɔbɛlɛ bo, Mwana, da na sepi; jibe jiwɛ jikinami.

³ Bakina basɔni ko balɛ bo, Moto yoyo atangolaka Njambe.

⁴ Yesu ko ajeba bilɛli bibu, na abala na bu bo, Ino olɛkɛni mijɔ mibe a milema minu mojɔ moye?

⁵ Nakabala bo, Jibe jiwɛ jikinami, isa Angɔ, dala; mojɔ monɔi na bopipo nda?

⁶ Mbi ko nadi boneja no bo Mwana ’Moto adi na kpaci ya nase a boyɛ jibe. Oko boa abala na moto omokɔbɛlɛ bo, Angɔ, tomba litɔkɔ liwɛ; yana a ndako ewe.

⁷ Moto omokɔbɛlɛ angɔ oko bongɔ, na ayana a ndako ende.

⁸ Yana anɛ bimumu bibato mojɔ momina, badaka oko na bɔ, na bakumeja Njambe yona opa kpaci emina ai bato.

Yesu abea Matayo

⁹ Yana adonga Yesu a esika emina, anɛ okina moto a bilo ende etako, kombe ende Matayo. Yesu abala na nde bo, Cingama na mbi. Iyo angɔ na acingama na nde.

¹⁰ Adaka Yesu a mesa a ndako tei, bato banɛnɛ badoa a boda na nde na bacingami bande a mesa, baputeja batako, na bato bagala ebe.

¹¹ Bakina BaPalusi baya babanɛ babala na bacingami bande bo, Mokoja onu ayakaka na baputeja batako na bato babe mojɔ moye?

¹² Yesu ko aka ekenge emina, na yo abala na bu bo, Babwani na monganga oko baya bapekaka, te baya badi baniilake.

¹³ Kɛni adukeni cina eekenge yeye, Mojɔ mopalaka mbi modi wa, te tito bamasiko. Mojɔ bo mbi nadoi a bobea bato babe, te bato bapele.

Bacingami baYoane

¹⁴ Bacingami baYoane badoa ai Yesu, na bamohɔjɔ bo, Iso na BaPalusi bodi na bikia binɛnɛ; bacingami bawɛ ko te bakiake mojɔ moye?

¹⁵ Yesu abasɔmbeja bo, Isa momi obolongana adi na bina ’nde a lihango, badi boyea bio? Badi bokia ko a masu mangɔngɔ, oko momi obolongana amaka donga.

¹⁶ Moto t’abambake kasaka eyou na ebolo eyene. Mojɔ bo ebolo eyene edi bodonga, na edi bohɛje lipose oko bohɛjɛ.

¹⁷ Bato te balumejake bikutu bibiobo biyou na vino eyene. Bakakɔ boa, badi bobatoja bikutu; vino edi bosopea, na bikutu bidi bobeha. Bahangojaka vino eyene oko a bikutu biyene. Oko boa badi bobanea bikutu na vino pongono.

Mwana ’Yailo

¹⁸ Amaka yo bala ngando jiji, okina kumu adoa oko ai yo, asumana a boso bonde na abala bo, Mwana’mbi mwali agwi oko edɛye mɛnɛ; wɛ ko doa omobakee ebɔ ewɛ nongo ahele koko.

¹⁹ Yesu angɔ, akɛ na nde, na bacingami bande pongono.

²⁰ Okina mwali yona oma peka na ekia bianga domi-na-bibae, adoa ngɔngɔ jinde na abɛnjɛ gbomba ekasaka ende na ebɔ.

²¹ Mwali omina alɛ bo, Mbi nakabakea ebɔ embi a kasaka ende, nadi bohela a yogo embi.

²² Yesu ahekoa, amonɛ, na abala na nde bo, Mwana, titeja molema mowɛ. Ejimeli ewɛ ehelejai wɛ. Na mwali ahela oko bohela a yogo ende a ehole emina.

²³ Amea Yesu a ndako ekumu omina, anɛ bato bapoolo, na emumu ebato baya badaka na daka enɛnɛ.

²⁴ Abala bo, Yanani; mwamwali aditi nongo mogo; ahwɛkɛ oko hiɔ pɛ. Ibo ko bamosɛkɛ oko bosɛkɛ.

²⁵ Ama bo meja emumu ebato sokolu, Yesu ami kwea oko a ndako. Apea ebɔ emwamwali, na yo angɔ oko bongɔ.

²⁶ Na bananganeja mwako momojɔ momina a likota dia lisusu.

Bato bamiso mago

²⁷ Yana adonga Yesu a esika emina, bami babae bamokimana. Badaka na miso mago, na babekoa bo, Wɛ Mwana ’Dawidi, ikea so wa!

²⁸ Yesu akwea a ndako, na bami bamiso mago badoa ai yo. Yesu abala na bu bo, Ojimakani bo mbi nabwani bokɔ mojɔ mu? Bamosɔmbeja bo, Ee Kumu.

²⁹ Yesu abɛnjɛ miso mabu na ebɔ ende, na abala bo, Yɛ modae na nu boa cina eejimeli enu.

³⁰ Miso mabu masɔ njɛnɛ, na Yesu abaleha na bopipo bo batatɔndɔ bato mojɔ momina.

³¹ Ibo ko bayana na batundeja gala epele eYesu a likota dia lisusu.

³² Yana amanaka bo, bato badoa na okina momi, emimi, yona odaka na mwembo mobe.

³³ Yana ameja Yesu mwembo mobe, momi abala oko bobala, na bato basusu bakamoa bou mɛnɛ. Bajɔ bo, Iso boipaka ne mokina mojɔ boa a Yisalaele.

³⁴ BaPalusi ko babala bo, Iyo amejaka miembo mibe oko na kpaci ekumu omiembo mibe.

Yesu aloma Bacingami bande a Elomu

³⁵ Yesu akɛ akadale a ngando jisusu jinɛnɛnɛ na jikɛkɛ. Akoja a sinagoge jibu, Atɔndɔ Mwako Mopele moBokumu, na aheleja bato a bego bisusu na biɛmɛ bisusu.

³⁶ Yana anɛkɛ yo bimumu bibato, aba’keaka wa. Mojɔ bo badaka na mokakwano na bwɛmbu, o ekɔmɛli ebata baya bapeliti mobanei.

³⁷ Oko boa Yesu abala na bacingami bande bo, Ejueli edi enɛnɛ; basali ko badi oko baleka pe.

³⁸ A mojɔ momina, ingani Kumu oejueli bo alome basali a bojua.