Matayo 8 - Nouveau Testament en Ngombe 1961

Yesu a Kapalanauma

¹ Yana atita Yesu a mono, bato banɛnɛ mɛnɛ bamosusaka.

² Okina moto omaba adoa ai yo, atita na magbunda a boso bonde, na abala bo, Kumu, wɛ okapala, obwani boheleja mbi.

³ Yesu aninoja ebɔ ende, aebakea ai yo, na abala na nde bo, Najimi; oheli. Bokpa mɛnɛ, maba mande masia oko bosia.

⁴ Yesu ajɔ na nde bo, T’otɔndɔe oko moto mojɔ mu. Kɛ ko ai nganga, saneja ai yo, na pa epeeli ebekea Mose a mojɔ momina bo bajebe.

⁵ Asa yo mea a Kapalanauma, okina kapitɛni asi adoi ai yo, amongɔɔnɔ bo,

⁶ Kumu, okina mokɔmeli ombi asambi na mokutumeli a ndako, na yogo ende egbasoi.

⁷ Yesu abala na nde bo, Nâdoa bo namosengoe.

⁸ Kapitɛni amosɔmbeja bo, Kumu, mbi nabɔngiti bo nasɛ wɛ a ndako embi. Bala oko ekenge emɔci pɛ, na mokɔmɛli ombi adi bohela.

⁹ Mbi nadi ngɔngɔ jibasuku bambi; mbi mɛnɛ nadi na basoda ngɔngɔ jimbi. Nakabala na okina bo akɛe, adi bokɛ. Nakabala na otongo bo adoe, adi bodoa. Nakabala na mokɔmɛli ombi bo akɔe mokina mojɔ, adi bomokɔ.

¹⁰ Ama yo ka ekenge emina, Yesu ami kamoa oko bokamoa. Abala na bato baya badaka bacingi na nde bo, Mbi natɔndɔkɔ no soti bo napakiti nɛ ejimeli enɛnɛ boa, nongo a Yisalaele.

¹¹ Mbi natɔndɔkɔ no bo bato banenɛ badi bodonga a ɛsɛta na wɛsɛta, na bâda a bidie bibu a dɔngɔ diAbalayama na Isaka na Yakobo a Bokumu boDiko.

¹² Bana ko baBokumu bâdumbama a modidi mosokolu, a esika ebio na bokpɛkpɛnɛ bomino.

¹³ Yesu abala na kapitɛni bo, Yana a ndako ewɛ. Yɛ modae na wɛ o ami wɛ jima. Na mokɔmɛli ahela a yogo oko a ehole emina.

¹⁴ Yesu akwea a ndako ePɛtɛlo, na atana bokio boPɛtɛlo asambi na mɔlɔ.

¹⁵ Abɛnje ebɔ ende, na mɔlɔ mosia oko bosia. Iyo asi ko angɔi na abakɔmɛ.

¹⁶ Badoa na bato banɛnɛ ai Yesu a ehole emɔkɔ, baya badaka na miembo mibe. Iyo ameja miembo mibe oko na ekenge emɔci pɛ, na aheleja basusu baya badaka na bego.

¹⁷ Oko boa, ekenge ebala motɔndɔi Yisaya engama bo, Iyo mɛnɛ atombi bwɛmbu bosu, na alwai bego bisu.

Yesu agɔleja Mopomba

¹⁸ Iyana anɛ Yesu bo bato bamohikaka kanga banɛnɛ mɛnɛ, apa monɔkɔ bo balekele.

¹⁹ Okina mosɔni adoa ai yo, na abala na nde bo, Mokoja, mbi nadi bocingama na wɛ bisika bisusu bikɛke wɛ.

²⁰ Yesu amosɔmbeja bo, Kpia badi na mikpo mibu; mbulu badiko badi na mobo; Mwana ’Moto ko apeliti esika a bosuka molo monde.

²¹ Okina otongo, mocingami onde, abala na nde bo, Kumu, ye napete kɛ a bopusea sangwa’mbi.

²² Yesu amosɔmbeja bo, Cingama na mbi, Kina bagwake bapusee bagwake babu bɛnɛ.

²³ Atamba Yesu a bwato, bacingami bande batamba na nde pongono.

²⁴ Mopomba modoa monɛnɛ yana adaka bo a boliko, na bwato bopaka dinda. Yesu ko adaka ahwɛli.

²⁵ Bacingami badoa ai yo, bamosisoja, na babala bo, Kumu, iso bogwi! heleja so!

²⁶ Iyo abasɔmbeja bo, Ebangaka no ndeni? Ejimeli enu edoni? Asi ko angoi, alemoa na pwea na madiba, na mopomba moyɛyɔ bowi.

²⁷ Bacingami bakamoa bou mɛnɛ, na babala bo, Iyo moto ndani? mojɔ bo pwea na madiba bamosumaka pongono.

Yesu aheleja Bato bamiembo mibe

²⁸ Aduboa yo a ngunda yena etongo, a dɔngɔ diBaGadala, asongana na bato bamiembo mibe babae, baya bamana a kunda. Bato badaka na bɔ a bonɔ a njea emina, mojɔ bo badaka na bila enɛnɛ.

²⁹ Ibo babekoa bo, Wɛ Mwana oNjambe, mojɔ mosu na wɛ modi bo? Odoi ya a bonɔngeja so oko ehole esu ebwanakini?

³⁰ Bwela bonɛnɛ bongulube bodaka bokayake bohali mweka,

³¹ na miembo mibe mingɔɔnɔ Yesu bo, Okameja so, kina bokwee a tei ebwela bongulube.

³² Iyo abala na bu bo, Kɛni! Miembo mibe mimana, mikwea a tei engulube a mono, na bwela bosusu babikoa mbango nase oko a libale, na bagwa a madiba.

³³ Babanei bangulube bacia oko bocia. Bakɛ a ngando a bojebeja bato mojɔ momina mosusu, na mojɔ mobato bamiembo mibe.

³⁴ Bato basusu bangando emina badoa a boduka Yesu, na yana amonɛ bo, bamongɔɔnɔ bo adonge a esika ebu.