Matayo 7 - Nouveau Testament en Ngombe 1961

Bileho biYesu

¹ Yɛni bosambejani, bo otasambani no bɛnɛ.

² Mojɔ bo, ôsambani oko na esambi esambejaka no; badi bongɛ ai no oko na mwɛngi mongɛkɛ no bɛnɛ.

³ Onjaka mobumbu mua modi a diso dimwangwao, pɛ ko bonɛ epaso yena edi a diso diwɛ mɛne mojɔ moye?

⁴ Wɛ yona odi na epaso a diso diwɛ mɛnɛ, obwani bobala na mwangwao bo, Kina nahwɛ mobumbu a diso diwɛ?

⁵ Wɛ mokosei, peta hwa epaso a diso diwɛ mɛnɛ; oko boa odi bonɛ bohu a bohwa mobumbu a diso dimwangwao.

⁶ Yɛni bopa leka losɛnɔke ai mbwa. T’odumbeni oko leka lonu loyumu a boso bongulube, basaka lodɛhɛkɛkɛ na sɛkɛ jibu, na bâhekoa a bona na nu.

⁷ Ingakani nongo osɛni. Dukani nongo obolojaeni. Bomani nongo modipe modipoame ai no.

⁸ Mojɔ bo, yona ongaka asɔkɔ; yona odukaka abolojaka, na modipe môdipoama ai yona obomaka.

⁹ Okina onu adi bopa mwana’nde litai akamo’nga molɛmbɛ?

¹⁰ Na mwana’nde akamo’nga swi, adi bomopa njɔ?

¹¹ Oko boa, isa ino ojebakani bopa bana banu leka lopele, nongo adi no bato babe, esingaiti Sangwa’nu yona odi oho Diko! Iyo âpa leka lopele ai baya bamongaka.

¹² Kɔni ai bato batongo o apalaka no bo bato batongo bakɔe ai no. Cina esusu eMibeko na mikanda mibatɔndɔi edi oko bosi.

¹³ Kweani a modipe mokototake; mojɔ bo njea yena edi na sasa esukeaka na bogwa; modipe momina modi monɛnɛ, na bato banɛnɛ bakweaka ena.

¹⁴ Njea yena esukeaka na bomɔ edi ekototake; modipe momina modi mokɛkɛ, na baya bakweaka ena badi oko baleka pɛ.

¹⁵ Toma nganjamani na batɔndoi babokosea, Badoaka ai no na elwaeli ebata, na badi soti oko swa babila.

¹⁶ Odini bobambetea na mbuma jibu. Mojɔ bo, bato te batwake mbunga a bolongo, isa mamwe a likpanda.

¹⁷ Oko boa, mole mopele mobotaka mbuma jipele, na mole mobe mobotaka oko mbuma jibe.

¹⁸ Mole mopele te mobotake mbuma jibe, na mole mobe te mobotake mbuma jipele.

¹⁹ Mole momiti bota mbuma jipele, môkwɛlɛmɛ na môtumbama.

²⁰ Oko boa ôbambeteani na mbuma jibu.

²¹ Badi bokwea a Bokumu boDiko, te nongo baya babeaka mbi Kumu, Kumu, oko moto yona okɔkɔ bolulea boSangwa’mbi yona odi oho Diko.

²² Bato banɛnɛ bâbala na mbi a busa bomina bo, Kumu, Kumu, iso boitɔndɔ mwako a kombe ewɛ? Boimeja miembo mibe a kombe ewɛ? Boikɔ mindumba minɛnɛ a kombe ewɛ?

²³ Mbi ko nâbatɔndɔ bo, Mbi nitajebaka no nongo mweka. Dongani ya ai mbi, ino bato babikɔmɛli bibe.

²⁴ Moto yona o’kaka bikenge bi bimbi, na asumaka bikenge bimina, adi o moto obowɛi yona oyoa ndako ende a diko dilitai.

²⁵ Mbua akwa, pela elaloa, mopomba modoa monɛnɛ, na moboma ndako emina, Eikwa ko, mojɔ bo eyoama a diko dilitai.

²⁶ Moto na moto ko yona o’kaka bikenge bi bimbi, na yo pɛ bosuma bikenge bimina, adi o egegele yona oyoa ndako ende a mopunji.

²⁷ Mbua akwa, pela elaloa, mopomba modoa monɛnɛ na moboma ndako emina. Ndako emina ekwa oko bokwa, na bokwa bomina bodaka mojɔ monɛnɛ.

²⁸ Asieja Yesu bikenge bimina bobala, bato baemumu bakamoa a mojɔ mobokoja bonde;

²⁹ cina bo abakojaka na kpaci, te na ekɔmɛli ebasɔni.