Matayo 6 - Nouveau Testament en Ngombe 1961

Mojɔ moBodongo

¹ Toma nganjamani bo otakɔni bilomu binu bibodongo a boso bobato bo banɛe no. Okakɔni boa, otasɔni nongo ndese ai Sangwa’nu yona odi a Diko.

² Oko boa, wɛ okakɔ monganji ai bato batongo, pɛ bohueja mo-ndule a boso bowɛ. Bato babokosea bakɔkɔ boa a sinagoge, na a licilinga, bo bato babakumejae. Mbi natɔndɔkɔ no na soti mɛnɛ bo bato bamina ba’si ndese yena ebwani na bu.

³ Wɛ ko, okakɔ monganji, t’okine oko bo ebɔ ewɛ ebali ejebe mojɔ mokɔkɔ ebɔ ewɛ ebami.

⁴ Kɔ bato monganji oko a libombi; na Sangwao yona onɛkɛ a libombi âda na likabo ai wɛ.

Bokoja a mojɔ moBo’nga

⁵ Oka’ngani Njambe, t’odaeni oko na ekɔmɛli ebakosei. Ibo bapalaka bo bangɔe a sinagoge, na bo bamae a licilinga a mojɔ mobo’nga, bo bato babanɛe.

⁶ Wɛ ko, oka’nga Njambe, kwea a tei endako ewɛ, dipa modipe mowɛ, na inga Njambe a libombi. Sangwao yona onekɛ a libombi âda na likabo ai wɛ.

⁷ Yana angaka no, t’odaeni oko na bikenge binɛnɛ bingasangasa o akɔkɔ bapakano. Mojɔ bo, ibo badingaka bo Njambe adi bobahokea a mojɔ mobikenge bibu binɛnɛ.

⁸ T’odaeni oko na ekɔmɛli ebu, mojɔ bo Sangwa’nu ajebaka taka enu oko omongakinini.

⁹ Obwanini bonga Njambe na ekɔmɛli ye; Sangwa’su yona odi a Diko; Yɛ kombe ewɛ esumame;

¹⁰ Yɛ Bokumu bowɛ bodoe; Yɛ bolulea bowɛ bokɔɔme ya nase o akɔɔmɔkɔ bo a Diko.

¹¹ Bopa so busa bu milɛmbɛ mia mibwani.

¹² Boyɛ so nongo jisu ai wɛ o ayɛkɛ so baya badi na nongo ai so.

¹³ Bambeja so a njea ebomeka. Heleja so ko a bobe Bokumu bodi ai wɛ, na ndangasa, na ekumu, oko na bosusu. Amen.

¹⁴ Ino okayɛni bato jibe jibu, Sangwa’nu adi boyɛ no pongono.

¹⁵ Ino ko omiti yɛni bato jibe jibu, Sangwa’nu atayɛ no jibe jinu.

¹⁶ Yana adi na bikia, t’odaeni oko na wa a miso manu o ekɔmɛli ebakosei. Ibo bakinaka maso mabu mabehe, a boneja bato bo bakiaka dia. Mbi natɔndɔkɔ no soti bo ndese ebato bamina ebwani.

¹⁷ Wɛ ko okakia, baka swe jiwɛ, na sosa boso bowɛ, bo bato batajeba nongo bo okiaka;

¹⁸ aneja oko Sangwao yona odi a libombi, na Sangwao yona onɛkɛ a libombi âda na likabo ai wɛ.

Likonja liNase na Bokumu boDiko

¹⁹ T’ohɛjeni oko leka loyumu lonɛnɛ a mojɔ monu bɛnɛ ya nase, mojɔ bo lobebaka ya na sɛ na bikpa, na babi babukaka ndako a bo’ba.

²⁰ Kinani leka lonu loyumu lohɛe oko oho Diko; lotabeha nongo na sɛ oho, na babi batalusa nongo a boba.

²¹ Mojɔ bo, esika edi leka lowɛ loyumu, molema mowɛ mosambi oko ena.

²² Diso didi paka emokuku. Isa diso diwɛ didi dipele, mokuku mowɛ mosusu modi a bohu.

²³ Diso diwɛ ko dikabeha, mokuku mowɛ mosusu modi oko a modidi. Oko boa, isa bohu bua bodi a tei ewɛ bodi oko modidi, modi modidi tuu.

²⁴ Moto t’ajebake bokɔmɛ baswa babae. Isa adi bolona okina, na âpala yona otongo; isa adi bocingama na okina, na âsɛtoja yona otongo. Otahɔnɔkɔni bokɔmɛ Njambe na makonja pongono.

²⁵ A mojɔ momina, mbi nabalaka na nu bo otakakwanani nongo a mojɔ momohelo monu, a mojɔ moboyaka na bomwaka na elwaeli enu. Na mohelo na mia, edi boso nde, te mohelo? Na mokuku na bisenja, edi boso nde, te nɔokuku?

²⁶ Anjani mbulu badiko; te banake gbie, te bajuake, te baboleake leka a ndako, Sangwa’nu ko yona odi oho Diko ababɔ kɔkɔ. Na no na mbulu, banɔi na bobuno nda, te no?

²⁷ Okina onu adi bakaeja masu mande mweka na mokakwano? Oko adi bokakwana a mojɔ mobisenja cina eye?

²⁸ Anjani bohohu bomanga maesika; te makɔke elomu; te mayoake bisenja.

²⁹ Mbi ko natɔndɔ kɔ no bo elwaeli eSɔlɔ mɔ a ekumu ende esusu, eibwana na elwaeli edikina danga diesika.

³⁰ Leka loesika lua lodi busa bu lodi botumbama puma; na isa Njambe alwajaka leka lomina, esingaiti no! Ino bato baejimeli ekɛkɛ!

³¹ Yɛni boda na mokakwano; yɛni bobala bo, Êyaka so nde? Êrawaka so nde?

³² Bapakano badukaka oko leka lomina, Sangwa’nu ko yona odi oho Diko ajebaka bo obwanini bosɔ leka lu losusu.

³³ Ino, peta dukani Bokumu boNjambe na bodongo bonde, nongo osɛni leka lu losusu pongono.

³⁴ Oko boa, t’okakwaneni oko a mojɔ mopuma. Kinani puma etombe muna mopuma. Monɔngɔ mobusa bu mobwani na busa bu.