Matayo 5 - Nouveau Testament en Ngombe 1961

Bokoja boYesu a Mono

¹ Yana anɛ Yesu bimumu bibato, awea a mokina mono. Adaka yo oho, bacingami bande badoa ai yo.

² Iyo adipoa monɔkɔ na abakoja na bikenge bi.

³ Bojongoa ai bato baya basatitejaka a milema, mojɔ bo Bokumu boDiko bodi oko ai bo.

⁴ Bojongoa ai bato baya bayeaka edɛye, mojɔ bo bâgɔmbɔ.

⁵ Bojongoa ai bato baya badi na milema miyɛmbu, mojɔ bo bâsangoa ngondo.

⁶ Bojongoa ai bato baya badi na nja na posa ebodongo, mojɔ bo bâgola.

⁷ Bojongoa ai bato bamonganji, mojɔ bo bâsɔ monganji.

⁸ Bojongoa ai bato baya badi na milema misɛnɔke, mojɔ bo bânɛ Njambe.

⁹ Bojongoa ai bato bamasiili, mojɔ bo bâbeama bana baNjarabe.

¹⁰ Bojongoa ai bato baya badingoaka a mojɔ mobodongo, mojɔ bo Bokumu boDiko bodi oko ai bo.

¹¹ Bojongoa ai no, bakalolea no, bakadingoja no, na bakalongɔ no na bibaeli bibe bibokosea a mojɔ mombi.

¹² Sepani, dani na enanga, mojɔ bo ndese enu edi enɛnɛ oho Diko. Badingoja batɔndɔi baehele koko boa.

¹³ Ino odini mukwa mongondo. Mukwa ko mokabeha, modi bobɔngɔ koko na ye? Mobwaniti nongo na ekina elomu. Mobwani oko na bodumba pɛ, bo bato bamodalakake na bibota.

¹⁴ Ino odini bohu bongondo. Ngando yena edi a diko dimono etabombama nongo.

¹⁵ Bato te bayojake paka bo baebombe cina jiteni. Baebakeaka a mesa bo bato basusu baya badi a ndako badi bonɛ bohu.

¹⁶ Oko boa, kinani eyoi enu eyoe a boso bobato. Baka’nɛ bikɔmɛli binu bipele, badi bokumeja Sangwa’nu yona odi oho Diko.

¹⁷ T’olɛeni oko bo mbi nadoi bo nadimojae Mibeko na mikanda mibatɔndɔi. Nadoiti bo namidimojae; nadoi oko bo namingamejae.

¹⁸ Mbi natɔndɔkɔ no bo, Nongo busa bokagwa, na ngondo ekagwa, pɛpɛ nongo litɔnɔ limɔci isa mosɔnɔ momɔci mo. Mibeko modi bokputoa; midi bongama kanga misusu mɛnɛ.

¹⁹ A mojɔ momina, moto akambɛjɛ mokina mobeko, nongo mobeko mokɛkɛlɛkɛ mɛnɛ, na akakoja bato boa, moto omina adi boda moto osuka mɛnɛ a Bokumu boDiko. Moto na moto ko yona okojaka bato bo bamisume, na amisumaka yo mɛnɛ, yo adi boda na ekumu enɛnɛ a Bokumu boDiko.

²⁰ Mojɔ bo, mbi natɔndɔkɔ no bo, Bodongo bonu bomiti nɔ bodongo bobasɔni na BaPalusi, otakweani nongo a Bokumu boDiko.

Mojɔ moBowa

²¹ Ino o’kani bo batata basɔ mobeko bo, T’owoe oko moto. na bo, Moto akawa adi bosamba.

²² Mbi ko natɔndɔkɔ no bo, Moto akakɛnjɔ na mwangwa’nde abwani bosamba. Moto akatangola mwangwa’nde abwani bosamba a likita libasuku. Na moto akalolea mwangwa’nde bo, Wɛ egegele; abwani oko na mosa moGehena.

²³ Oko boa, okadoa a litumbu, na okasalɛjɛ bo mwangwao adi na wɛ mokina mojɔ,

²⁴ kina epeeli ewɛ a boso bohtumbu; peta kɛ a bosieja mojɔ na mwangwao, osa ko ohule a bopa epeeli ewɛ.

²⁵ Sieja mojɔ na soki ewɛ, nongo yana adi no a njea eesambi. Omiti kɔ boa, soki ewe adi bopa wɛ a mɔmɔ majuji, na juji adi bopa we a mɔmɔ mapolisi, na ôkwea a blɔkɔ.

²⁶ Mbi natɔndɔkɔ wɛ na soti bo, Omiti pa likonja kanga lisusu menɛ, otamana nongo.

Mojɔ moBɔɔli

²⁷ Ojebakani mobeko bo, T’ongɛe oko bɔɔli.

²⁸ Mbi ko natɔndɔkɔ no bo, Moto akanja mwali na posa, asi angi na nde bɔɔli a molema monde.

²⁹ Diso diwɛ diebɔ ebami dikasakeja wɛ, ihwa na dumba diso dimina. Enɔi na bopele bo enama ewɛ emɔci egwɛ, bo mokuku mowɛ mosusu motadumbama a Gehena.

³⁰ Ebo ewɛ ebami ekasakeja wɛ, lena na dumba ebo emina. Enɔi na bopele bo enama ewɛ emɔci egwɛ, bo mokuku mowɛ mosusu motadumbama a Gehena.

³¹ Babala koko bo, Moto akalona mwali onde, adi bomopa mokanda mobobɔtɔnɔ.

³² Mbi ko natɔndɔkɔ no bo, Moto na moto yona oyanejaka mwali onde, na editi na cina ebɔɔli, akɔkɔ mwali omina moto obɔɔli. Na moto yona osɔkɔ mwali omina angɛkɛ na nde bɔɔli.

Mojɔ moBɛli

³³ Ino o’kani koko bo batata basɔ mobeko bo, T’obɛle oko bɛli na bokosea. Kɔ mojɔ mobɛli we ai Njambe.

³⁴ Mbi ko natɔndɔkɔ no bo otabɛlɛni nongo bɛli, isa eDiko, mojɔ bo didi mongbɛlɛngɔ moNjambe;

³⁵ isa bɛli engondo, mojɔ bo edi ebakei ebibota biNjambe; isa bɛli eYelusalema, mojɔ bo edi ngando ekumu monɛnɛ.

³⁶ T’obɛle oko bɛli emolo mowɛ, mojɔ bo oditi na ngulu a bopueja isa a bohindeja moswe momɔci.

³⁷ Kinani ebaeli enu edae isa Ee, ee! isa Pɛpɛ, pɛpɛ! Ekina ebaeli etongo edi oko ebe.

Mojɔ moLikundu

³⁸ Ino o’kani bo babala bo, Diso dibukana na diso; dino dîbukana na dino.

³⁹ Mbi ko natɔndɔkɔ no bo otaswianani na moto mobe. Moto aka’la wɛ epapata a mobanga momɔci, moneja mobanga motongo pongono.

⁴⁰ Moto akabea we a esambi a mojɔ mosimisi ewɛ, kina atombe kasaka ewɛ pongono.

⁴¹ Moto akapea wɛ bo omopakae kilometa emɔci, mopaka kilometa jibae.

⁴² Moto aka’nga wɛ eka, mopa; t’obulɛe oko moto yona opalaka boboa njabo ai wɛ.

Mojɔ moEpaeli

⁴³ Ino ’kani bo babala bo, Toma pala motuteano mowe, na toma lona soki ewɛ.

⁴⁴ Mbi ko natɔndɔkɔ no bo, Toma palani soki jinu. Toma’ngɔɔnoni Njambe a mojɔ mobato baya banɔngejaka no.

⁴⁵ Oko boa ôdani bana baSangwa’nu yona odi oho Diko. Mojɔ bo yo ahojaka busa ai bato babe na bato bapele. Alomaka mbua a mojɔ mobato bapele na bato babe pongono.

⁴⁶ Isa opalakani oko bato baya bapalaka no, obwanitini bosɔ ndese a mojɔ momina. Baputeja batako baditi koko na ekɔmɛli emina pongono?

⁴⁷ Okabɛjɛni oko bina’nu pɛ, bato batongo baditi koko na ekɔmɛli emina? Nongo bapakano bakɔkɔ boa pongono.

⁴⁸ Ino ko, toma dani babɔngɔke mɛnɛ, mojɔ bo Sangwa’nu yona odi a Diko adi kanga mobɔngɔke mɛnɛ.