Matayo 4 - Nouveau Testament en Ngombe 1961

Bomeka boYesu

¹ A ehole emina Mwembo molinda Yesu a lisobe bo Satana amomeke.

² Akia dia masu domi-inɛi, na yana asia ehole emina, aka nja.

³ Momeki adoa ai yo na abala bo, Isa wɛ odi Mwana ’Njambe, bala na matai mama bo mabongoe milɛmbɛ.

⁴ Yesu amosɔmbeja bo, Mosɔnɔmɔ bo, Moto atahela na milɛmbɛ pɛ, Oko na bikenge bisusu bia bimanaka a monɔkɔ moNjambe.

⁵ Ngɔngɔ jimina, Satana akɛ na nde a ngando yena esɛnɔke. Amobakea a diko ditempelo, na abala na nde bo, Isa wɛ odi Mwana ’Njambe, sadumba nase. Mojɔ bo, mosɔnɔmɔ bo,

⁶ Adi bopa babwɛnji bande monɔkɔ a mojɔ mowɛ, Na bâbanda wɛ na mɔmɔ mabu, Bo ebota ewɛ esaka lakimea a litai.

⁷ Yesu abala na nde bo, Mosɔnɔmɔ pongono bo, T’odingee oko Kumu Njambe owe.

⁸ Satana ake na nde koko a diko dimono monɛnɛ, na amoneja makumu masusu mangondo, na ekumu emakumu mamina.

⁹ Abala na nde bo, Mbi nadi bopa we makumu ma masusu, okasumana a bosakoa mbi.

¹⁰ Yesu abala na nde bo, Satana, donga ya; mojɔ bo mosɔnɔmɔ bo, Toma sakoa Kumu Njambe owɛ; Toma kɔme oko yo pɛ.

¹¹ Satana amokina boa, na babwɛnji baDiko badoa ai Yesu bo bamokɔmejae.

Yesu ake a Galile

¹² Yana aka Yesu bo bapea Yoane, asɔmbɔ a Galile.

¹³ Adonga a Nasaleta, na adoa a Kapalanauma bo adae ena a dɔngɔ dimadiba, a likota liSebulona na Nepatali,

¹⁴ bo angamejae ekenge ebala motɔndɔi Yisaya bo,

¹⁵ Bato baSebulona na Nepatali, A njea emadiba-mamukwa, na a dɔngɔ ditongo diYoladene, Na BaGalile baMidoa;

¹⁶ Bato baya badaka modidi Bani bohu bonɛnɛ. Na busa bohoi Ai bato baya badaka a esika ebogwa na a esie ebogwa.

Yesu abanga Elomu

¹⁷ Yesu abanga bokoja a ehole emina, na atɔndɔ bato bo, Hekojani milema minu, mojɔ bo Bokumu boDiko bobengi bomea.

¹⁸ Adaka yo akadale a dɔngɔ dimbongu elibale liGalile, anɛ bami babae, moto na mwananango, oko Simona yona odaka na kombe Pɛtɛlo, na mwangwa’nde Andalea, Ibo badaka bakadumbe eyoma ebu a madiba, mojɔ bo badaka badukeli baswi.

¹⁹ Yesu abala na bu bo, Cingamani na mbi, na mbi nâkɔ no badukeli babato.

²⁰ Ibo bakina biyoma bibu bokpa, na bacingama na nde.

²¹ Anɔ yo esikaemina, anɛ bami batongo babae, moto na mwananango, Yakobo mwana ’Sebede na mwangwa’nde Yoane. Badaka na sangwa’bu a bwato, na batataka biyoma bibu.

²² Yesu ababea, na bakina bwato na sangwa’bu bokpa, na bacingama na nde.

Yesu aheleja Bato a Bego

²³ Yesu akɛ akadale a likota lisusu liGalile, Akoja bato a sinagoge; atɔndɔ Mwako Mopele moBokumu, na aheleja bato a bego na bipeko tungu jisusu.

²⁴ Gala ende epele etunda a makota masusu maSilia; badoa ai yo na bato basusu baya badaka na bego, na baya badingoaka na bipeko na saya a mikuku, bato bamiembo mibe, bato balilale, na bato bamikutumeli, na abaheleja.

²⁵ Bato bacingama na nde kanga mandundu mɛnɛ, bato baGalile, na Dekapoli, na Yelusalema, na Yuda, na dɔngɔ ditongo diYoladene.