Matayo 3 - Nouveau Testament en Ngombe 1961

Yoane Mobatisi

¹ Yoane Mobatisi adoa a masu mamina, na atɔndɔ mwako moNjambe a lisobe liYuda.

² Abala bo, Hekojani milema minu, mojɔ bo Bokumu boDiko boba’i mea,

³ Motɔndɔi Yisaya abala a mojɔ moYoane yana abala yo bo, Kɔpi emoto yona obetoaka a lisobe bo, Sɛlingoani mokɛngɛ moKumu; Tangbojani njea jinde.

⁴ Yoane adaka na bisenja bingungi jikamela; adaka na ekpoka eyobo etito a bongo bonde; dia linde lidaka oko bapaala na pɔki eesika.

⁵ Bato baYelusalema na Yuda, na bato badɔngɔ disusu diYoladene bakɛ ai yo.

⁶ Bajima jibe jibu, na yo ababatisa a dua yena edi na kombe Voladene.

⁷ Yana anɛ yo BaPalusi na BaSadoki banɛnɛ bakadoe ai yo bo ababatise, abala na bu bo, Ino bana banjɔ! Oehi no nda bo ocieni likundu lia likɛkɛ adoe?

⁸ Isa ohekojaini milema, anejani bimbete bia bibwani,

⁹ T’olɛeni oko bo, Abalayama adi tata osu, Mbi natɔndɔkɔ no bo Njambe akapala, abwani bongɔjɔ bana ai Abalayama oko na matai ma.

¹⁰ Epondo esambi edɛye a cina jimele. Mele mimiti bota mbuma jipele, mîkwɛlɛmɛ misusu, na mîdumbama a mosa.

¹¹ Mbi nabatisaka no a madiba cina ebohekoja bomilema; yo ko yona okɛkɛ adoe ngɔngɔ jimbi anɔi mbi na ngulu. Mbi nabɔngiti bo natombe sapata jinde. Iyo âbatisa no a Mwembo Mosɛnɔke na a mosa.

¹² Adi na ehɛhɛi a ebɔ ende, âpueja moboku monde, na âbolea ndongo jinde a edejai. Âtumba ko poso a mosa, na mosa momina motadimea nongo.

Bobatisa boYesu

¹³ Yesu adonga a Galile, na adoa a Yoladene bo Yoane amobatise.

¹⁴ Yoane ko amosia; abala bo, Wɛ odoi ai mbi? mbi yona obwani bobatisama na wɛ.

¹⁵ Yesu ko amosɔmbeja bo, Yɛ modae boa edɛye; mojɔ bo bobwani bosuma ngando jisusu jibodongo boa. Oko boa Yoane ajima.

¹⁶ Yana abatisama Yesu, aduboa bokpa a madiba. A ehole emina, Diko didipoama oko bodipoaraa; anɛ Mwembo moNjambe mokatite o sungu na mokabakame ai yo.

¹⁷ Na kɔpi emana oho Diko bo, Iyo adi Mwana’mbi ongɛnjɔ. Nadi na sepi a mojɔ monde.