Matayo 27 - Nouveau Testament en Ngombe 1961

Bogwa boYuda

¹ Iyana ahoa busa, basuku banganga basusu na basuku bangando babalana bo baduke njea eboweja na Yesu.

² Bamokanda mbɔci, bakɛ na nde, na bamokina a mɔmɔ maPontio Pilato yona odaka gouveneur.

³ Yana anɛ Yuda, mokabi onde, bo bama dumba Yesu, yo ajasa dosa, na asɔmbɔ na pata domi-isato ai basuku banganga na basuku bangando.

⁴ Abala na bu bo, Mbi nakɔi mojɔ mobe. Nakabi mopindea. Bamosɔmbeja bo, Mojɔ mowɛ mɛnɛ, te mosu!

⁵ Iyo adumba likonja lisusu a tei etempelo, amana, akɛ na asa’wa yo mɛnɛ na likimba.

⁶ Basuku banganga bandoa likonja limina, na babala bo, Ebɔngiti bo bose likonja didi a nguku ebipeeli bitempelo, mojɔ bo lidi likonja limakia.

⁷ Babalana mojɔ momina, na basomba mokpɔtɔ momobomi-oteni na likonja, bo bapusee bakɛndɛli a esika emina.

⁸ A mojɔ momina, esika emina edi na kombe Mokpotɔ-momakia oko busa bu.

⁹ Ekenge ebala motɔndɔi Yisaya engama na mojɔ momina. Iyo abala bo, Batombi pata domi-isato; bamobuni oko na bobuno bomina. Bana baYisalaele bajimi bobuno bomina a mojɔ monde;

¹⁰ Na bapi likonja limina a mojɔ momokpɔtɔ momobomi oteni, O abali Kumu na mbi.

Yesu na Pilato

¹¹ Yesu adaka ami a boso bogouvemeur, na yo ahɔjɔ Yesu bo, Wɛ odi Kumu oBaYuda? Yesu amosɔmbeja bo, O abali wɛ.

¹² Yana ko abala basuku banganga, na basuku bangando mojɔ monde, Yesu aisɔmbeja nongo ekenge.

¹³ Oko boa Pilato abala na nde bo, Wɛ t’okake ngando ji jinɛnɛ jibalaka bo a mojɔ mowɛ?

¹⁴ Yesu ko aimosɔmbeja nongo ekenge, na gouverneur akamoa bou mɛnɛ a mojɔ momina.

¹⁵ Gouverneur adaka na ekina ekɔmɛli a kola emina, bihole bisusu. Acingoaka moto omɔci a blɔkɔ, oko moto ojimaka bato bangando.

¹⁶ Okina moto ogala ebe adaka a blɔkɔ a ehole emina, kombe ende Balaba.

¹⁷ Oko boa, yana adaka bo baboli, Pilato abahɔjɔ bo, Opalakani bo nacingoe nda? Balaba, isa Yesu yona odi na kombe Masiya?

¹⁸ Mojɔ bo Pilato ajeba bo bama pea Yesu oko cina elisoki.

¹⁹ Yana adaka Pilato a mongbɛlɛngɔ moesambi, mwali onde amolomea monɔkɔ bo, Pɛ bokɔ nongo mojɔ ai moto yona obodongo; mojɔ bo mbi nati njɔti a mojɔ monde, na nadi na monɔngɔ monenɛ a mojɔ momina busa bu.

²⁰ Basuku banganga ko, na basuku bangando bajimeja likita libato bo babee oko Balaba, na bo Yesu agwɛ.

²¹ Gouverneur abahɔjɔ koko bo, Obu babae, opalakani bo nacingoe nda? Ibo bamosɔmbeja bo, Balaba.

²² Pilato abala na bu bo, Oko boa êkɔ mbi ndeni na Yesu yona odi na kombe Masiya? Ibo basusu basɔmbeja bo, Yɛ agwɛ a mole-mobokea!

²³ Iyo abala bo, Boni; mojɔ mobe mokɔi yo nda? Ibo ko babekoa na bopipo bo, Yɛ agwɛ a mole-mobokea!

²⁴ Pilato anɛ bo mojɔ mobeha, na bo wokowoko ekɛke oko bohɛ. Oko boa yo atomba madiba, asosa mɔmɔ mande a boso bolikita, na abala bo, Lindo jimakia mamoto yo obodongo jiditi nongo ai mbi. Edi oko mojɔ monu.

²⁵ Bato basusu bamosɔmbeja bo, Yɛ makia mande madae ai so na bana basu.

²⁶ Oko boa yo acingoa Balaba ai bo. Atueja Yesu ko, na araopeja a mɔmɔ mabu bo bamobakee a mole-mobokea.

Bapɔmbeja Yesu

²⁷ Basoda bagouvemeur bakwea na Yesu a ndako eesambi, na babea basoda batongo bapɔlɔtɔ.

²⁸ Bahwa bisenja binde, na bamolwaja kasaka eyai ekpetu.

²⁹ Badinga likongo linjubɛ, na balibakea a molo monde. Basa koko mongendu a ebɔ ende ebami; batita na magbunda a boso bonde na bamopɔmbeja bo, Mbalea! Kumu oBaYuda!

³⁰ Bamotwea masɔi, bamokatoa mongendu, na bamobimboa ta molo.

³¹ Aseja bo bomoko pɔmbɔli, bamohwa kasaka eyai, bamolwaja bisenja binde mɛnɛ, na bakɛ na nde bo bamobakee a mole-mobokea.

Bogwa boYesu

³² Ama bo mana, ba’mi songana oko na moto omɔci oKulene, kombe ende Simona, na bamopea bo bamotombejae mole-mobokea moYesu.

³³ Amea bo a esika yena edi na kombe Gɔlɔgɔta, (cina emina edi Esika eEbebele)

³⁴ bamonusa vino yena eputoana na njɔngɔ. Iyo ko, yana alɛlɛ yo, alona bomwa.

³⁵ Bamobakea a molemobokea, baboma jonga a mojɔ mobisenja binde, na babikabana.

³⁶ Ngɔngɔ jimina, bada na mbondo oko ena bo bamonje.

³⁷ Babakea koko mosɔnɔ mu a diko dimolo monde a bojebeja mojɔ monde; IYO ADI YESU KUMU OBAYUDA.

³⁸ Babakea koko mibengo mibae a mele-mibokea a dɔngɔ dinde, okina a dɔngɔ diebɔ ebami, yona otongo a dɔngɔ diebɔ ebali.

³⁹ Bato baya badaka bakanɔe bamokotoa na bosɛtɔ. Babala bo,

⁴⁰ Saheleja wɛ mɛnɛ, wɛ yona obwani bobuka tempelo na boengɔjɔ koko na masu masato! Isa odi Mwana oNjambe, donga a mole-mobokea, na tita ya.

⁴¹ Basuku banganga, na basɔni, na basuku bangando pongono, bamosɛkɛ oko bosɛkɛ.

⁴² Babala bo, Iyo aheleja bato batongo; atahɔnɔkɔ ko bo asahelejae yo mɛnɛ. Isa adi Kumu oYisalaele, ye atite cdɛye a molemobokea bo bomojimee.

⁴³ Adaka na ejimeli ai Njambe. Isa Njambe amopalaka, yɛ amohelejae edɛye; mojɔ bo abali bo, Mbi nadi Mwana oNjambe.

⁴⁴ Mibengo pongono, baya badaka na nde a mele-mibokea, bamololea koko boa.

⁴⁵ Modidi modoa a ngondo esusu a ehole emidi, na moyeyoa oko a trois heures.

⁴⁶ Yesu abekoa na bopipo a ehole etrois heures bo, Eli, Eli, lama sabakatani? Cina emina edi, Njambe ombi, Njambe ombi, obulɛi mbi mojɔ moye?

⁴⁷ Bakina baya badaka ba’mi ena babala bo, Abeaka Elia.

⁴⁸ Oko boa okina obu apota bokpa, atomba limbusu, aligbɔmeja na vino ekpo, alihangea a mongendu, na amonusa.

⁴⁹ Batongo ko babala bo, Kina, bonje isa Elia adi bodoa a bomoheleja.

⁵⁰ Yesu ko abekoa koko na bopipo, na ameja mwembo monde.

⁵¹ A ehole emina, esenja enɛnɛ yena ekabaka tempelo a tei o ekɔmɛli engbungbu, elea oko bo’lea, bikenge bibae, diko oko a nase. Ngondo ejonga pongono; matai manɛnɛnɛ malea;

⁵² bisɛmɔ bidipoama, na mikuku mibasɛnɔke baya bama hwɛ mingɔ oko bongɔ.

⁵³ Bamana a bisɛmɔ yana angɔ Yesu a bogwa, bake a ngando esɛnɔke, na ba’nenɛ na bato banenɛ.

⁵⁴ Kapitɛni obasoda, na baya badaka na nde a bokɛngɛlɛ Yesu, yana anɛ bo bojonga bongondo, na mijɔ mia mitongo, bangbɛngbɛmɛ na bɔ. Babala bo, Moto yoyo adaki Mwana oNjambe soti!

⁵⁵ Bali banɛnɛ badaka ena pongono, oko bohali mweka a bonja, oko bali baya badonga na Yesu a Galile bo bamokɔmɛe.

⁵⁶ Bakina babu oko ba, Malia oMagadala, Malia nange eYakobo na Yosepa, na nange ebana baSebede.

Bapusea Yesu

⁵⁷ Iyana adipa busa, okina moto oAlimate amea, kombe ende Yosepa. Iyo adaka konji. Adaka koko mocingami oYesu.

⁵⁸ Iyo akɛ ai Pilato, na amonga mokuku moYesu. Pilato apa monɔkɔ bo bamopɛ ai yo.

⁵⁹ Oko boa Yosepa atomba mokuku, amobulaka na esenja eyai epu,

⁶⁰ na amosa ta esɛmɔ ende eyene, oko esɛmɔ ema yo tɔ a litai limono. Ahilingoja litai linɛnɛnɛ a monɔkɔ moesɛmɔ, na ayana.

⁶¹ Malia oMagadala, na Malia yona otongo badika ko, na badaka bayɛli esɛmɔ.

⁶² Ahua busa, oko yana asia busa boMosɛlingo, basuku banganga, na BaPalusi, bakɛ engbanga ai Pilato.

⁶³ Babala na nde bo, Kumu, iso bolɛkɛ mojɔ mobala mokosei yona, oko apetakini gwa. Abala bo, masu makasia masato, mbi nadi bongɔ koko.

⁶⁴ A mojɔ momina, bekea bo basɛnjɛle esɛmɔ na bopele mɛnɛ masu masato, bo bacingami bande batadoa a bomoba, na bâtɔndɔ bato bo angɔi a bogwa. Ekada boa, bokosea bongɔngɔ bodi bonɔ bokosea boboso na bobe.

⁶⁵ Pilato abasɔmbeja bo, Odini na basoda a bosɛniɛlɛ. Yanani; kɔni bo basɛnjɛle na tɔopele mɛnɛ.

⁶⁶ Oko boa bakɛ, badipa esɛmɔ na bopipo, babakea embete a diko dilitai, na bakina basoda ena a bosɛnjɛlɛ.