Matayo 26 - Nouveau Testament en Ngombe 1961

Ndungu a Bowa Yesu

¹ Iyana asieja Yesu bikenge bi bisusu bobala, abala na bacingami bande bo,

² Ojebakani bo Kola eBonɔ edikai oko masu mabae pɛ, na badi bopea Mwana ’Moto bo bamowoe a mole-mobokea.

³ Basuku banganga na basuku bangando batitana a ehole emina, a ndɔngɔ enganga monɛne, kombe ende Kayapa.

⁴ Badumba ndungu a bopea Yesu na poloso bo bamowoe.

⁵ Endele ko, babala bo, Te a ehole eKola bo bato basaka’ngɔ na dane.

Yesu a Ndako eSimona

⁶ Yesu adaka a ndako eSimona, moto omaba, a ngando kombe Betania.

⁷ Okina mwali adoa ai yo na molangi momalasi mabobuno bonɛnɛ mɛnɛ, na asopa malasi mamina a molo moYesu yana adaka yo a mesa.

⁸ Bacingami bande, yana anɛ bo mojɔ momina, bakɛniɔ oko bokeniɔ. Babala bo, Eka emina enami boa mojɔ moye?

⁹ Akɔki so ngɛlɛ malasi mamina, ka bosi likonia linɛnɛ a bokaba na bato babokwali.

¹⁰ Yesu ko acingea mojɔ, na abala na bu bo, Opukejakani mwali yo mojɔ moye? Akɔi mojɔ mopele mɛnɛ ai mbi.

¹¹ Bato babokwali badi na nu na bosusu; mbi ko naditi na nu na bosusu.

¹² Asopi yo malasi mamina a mokuku mombi, akɔi boa a mojɔ mobopusea bombi.

¹³ Mbi natɔndɔkɔ no na soti bo badi botundeja gala emwali yo a bisika bisusu bitɔndɔkɔ bo Mwako mu Mopele a ngondo esusu, cina emojɔ mokɔi yo.

Yuda Iskalio

¹⁴ Okina obu Domi-na-babae, kombe ende Yuda Iskalio, akɛ ai basuku banganga.

¹⁵ Abala na bu bo, Nakamokaba ai no, êpa no mbi nde? Bamopa pata domi-isato.

¹⁶ Oko boa yo abanga boduka njea a ehole emina bo akabe Yesu.

Yesu na Bacingami a Kola

¹⁷ Bacingami badoa ai Yesu a busa boboso boMolɛmbɛ mua mopeliti lipetu. Bamohɔjɔ bo, Opalaka bo bosɛlingoe jɔ a boyaka Kola-eBonɔ?

¹⁸ Iyo abasɔmbeja bo, Kɛni boso Songolo oho a ngando. Mojebejani boMokoja abali bo, Ehole embi edikai oko mweka pɛ. Napalaka nayake Kole-eBonɔ a ndako ewɛ, oko mbi menɛ na bacingami bambi.

¹⁹ Bacingami bakɔ o ama bala Yesu, na basɛlingoa Kola-eBonɔ.

²⁰ Yesu adaka na bacingami bande domi-na-babae a mesa a ehole emɔkɔmɔkɔ.

²¹ Yana ayakaka bo, Yesu abala bo, Mbi natɔndɔkɔ no na soti bo okina onu adi bokaba mbi.

²² Ibo badaka na mobimba mɛnɛ a mojɔ momina, na babanga bomohɔjɔ moto na moto bo, Kumu, moto nda? Isa mbi?

²³ Iyo abasɔmbeja bo, Okina yona oyaki na mbi a saani emɔci adi bokaba mbi,

²⁴ Mwana’Moto bodonga ya soti a njea ejebejaka Misɔnɔ a mojɔ monde. Monɔngɔ ko ai yona odi bokaba Mwana ’Moto! Moto omina, akɔki ya da pɛ bobotama nongo, ka enɔi na bopele a mojɔ monde,

²⁵ Yuda, mokabi onde, abala bo, Labi, moto nda? Isa mbi? Yesu abala na nde bo, O abali wɛ.

²⁶ Adaka bo bakayake, Yesu atomba molɛmbɛ. Ajongoa na abuka molɛmbɛ momina; amopa ai bacingami, na abala bo, Asɔni, yakani; imu modi mokuku mombi.

²⁷ Atomba koko kɔpɔ; ajongoa na abapa. Abala bo, Mwakani no basusu.

²⁸ Mojɔ bo kɔpɔ ye edi makia mambi maMokongo, maya masopei a mojɔ mobato banɛnɛ, a bobacingoa a jibe.

²⁹ Mbi natɔndɔkɔ no bo nitamwaka koko muswa mu mombuma jivine, oko a busa bomwakabi mbi koko na nu a Bokumu boSangwa’mbi.

³⁰ Aseja bo yembo bo’mba, bakɛ a Mono moOlive.

Gɛtɛsemane

³¹ Yesu abala koko na bu bo, Ôsakani libaku ino basusu na bulu bu a mojɔ mombi. Cina bo, mosɔnɔmɔ bo, Nâboma mobanei, na bwela bobata bônangana.

³² Mbi ko nadi bongɔ a bogwa, na nâkɛ boso bonu a Galile.

³³ Pɛtɛlo ko amosɔmbeja na abala bo, Nongo ibo basusu bakasaka libaku a mojɔ mowɛ, mbi nitasaka nongo libaku.

³⁴ Yesu abala na nde bo, Mbi natɔndɔkɔ wɛ na soti bo odi bongana mbi ngana jisato na bulu bubu, oko kɔkɔ abelekoakini.

³⁵ Pɛtɛlo amosɔmbeja bo, Nongo nakagwa na wɛ, nitangana wɛ! Bacingami basusu bajima koko boa.

³⁶ Yesu amea na bu a ekina esika yena edi na kombe Gɛtɛsemane. Abala na bacingaimi bo, Ino dikani yaya; mbi nakɛkɛ bobo a mojɔ mobo’nga.

³⁷ Abea oko Pɛtɛlo na babami babae baSebede bo bamopakae, na abanga boda na wa na molɔbɔ.

³⁸ Abala na bu bo, Molema mombi modi na wa te’pele, oko yogo mɛne. Ambani ya a bokɛngɛlɛ na mbi.

³⁹ Akɛ koko boso mweka, asadumba nase, boso bonde oko a kpɔtɔ, na angɔɔnɔ bo, Sesa, kina kɔpɔ ye enɔe mbi isa njea edi. Endele ko, te mojɔ mopalaka mbi, oko mojɔ mopalaka wɛ.

⁴⁰ Ahula ai bacingami na abatana bahwɛli. Abala na Pɛtɛlo bo, Boni! Ino otahɔnɔkɔni boda misu na mbi nongo heure emɔci?

⁴¹ Kɛngɛlɛni; ingakani bo otakweani a bomeka. Mwembo modi na mokano soti, mokuku ko modi na bwɛmbu.

⁴² Asɔmbɔ koko na angɔɔnɔ bo, Sesa, isa njea editi bo kɔpɔ ye enɔe mbi, oko adi mbi pe bopeta mwaka, yɛ modae o apalaka wɛ.

⁴³ Ahula koko ai bacingami na abatana bahwɛli, mojɔ bo bangbɔngɔkɔ na hiɔ.

⁴⁴ Oko boa abakina, asɔmbɔ koko na angɔɔnɔ ngɔɔnɔ ejisato, o ama yo ngɔɔnɔ boso.

⁴⁵ Ahula koko ai bacingami, na abala na bu bo, Ino ohwɛkɛni oko hiɔ? Ohemakani? Hokeani; edikai mweka pɛ, na Mwana’Moto âkabama a mɔmɔ mabato babe.

⁴⁶ Angɔni so bokɛe! Anjani, mokabi ombi akɛkɛ adoe.

⁴⁷ Iyana abalaka Yesu boa, Yuda, okina obu Domi-na-babae, adoa na lindundu libato baya bapeaka babɛnɛ na pɛngu. Basuku banganga na basuku bangando babaloma.

⁴⁸ Mokabi onde ama pa bato bamina ekina embete. Abajebeja bo, Mbi nakahia okina obu, mopeani; edi oko yo.

⁴⁹ Iyo adoa ai Yesu bokpa na amobɛjɛ bo, Labi, mbalea! Na amohia.

⁵⁰ Yesu abala na nde bo, Moninga, odoi mojɔ? Kɔ mojɔ momina. Bato badoa a ehole emina na bapea Yesu oko bopea.

⁵¹ Okina obu baya badaka bacingi na Yesu ahwa abɛnɛ onde, akwɛle mobuli onganga monɛnɛ pola, na amolena litoi.

⁵² Yesu ko abala na nde bo, Sɔmbeja abɛnɛ owɛ ta ligbogbo; cina bo bato basusu baya batombaka abɛnɛ, yogo ebu oko abɛnɛ.

⁵³ Otajebaka bo mbi nakabea mbuni ai Sangwa’mbi, abwani bolomeani babwɛnji-baDiko, mandundu domi-na-mabae?

⁵⁴ Mbi ko nakakɔ boa, Misɔnɔ midi bongama na ye, mia mitɔndɔkɔ bo mojɔ mumu modi boda boa?

⁵⁵ Yesu abala na lindundu libato a ehole emina bo, Odoini na babɛnɛ na pɛngu a bopea mbi; adi mbi mobengo? Mbi nadaka na mobondo a bokoja a tei etempelo busa na busa, na oipeani mbi.

⁵⁶ Mojɔ mu mosusu ko modi boa a bongameja misɔnɔ mibatɔndɔi. Bacingami basusu bamokina a ehole emina, na bacia oko bocia.

Yesu a Esambi eKayapa

⁵⁷ Yana apea bo Yesu, bakɛ na nde a ndako eKayapa yona odaka nganga monɛnɛ. Basɔni na basuku bangando bama titana oko ena.

⁵⁸ Pɛtɛlo asusa Yesu bohali mweka, oko a lopango longanga monɛnɛ. Akwea a tei elopango, na ada na mobondo a esika edaka bapolisi, bo anɛe suka emojɔ.

⁵⁹ Basuku banganga, na likita lisusu libajuji, baduka mokina mojɔ mobokosea a bodumba Yesu, bo bamowoe.

⁶⁰ Bakina bato badoa a botata, pɛ ko mojɔ boboloa.

⁶¹ Bakina babae ko badoa ngɔngɔ na babala bo, Moto yoyo abali bo, Mbi nabwani bobuka tempelo eNjambe na boeyoa koko na masu masato.

⁶² Nganga monɛnɛ angɔ na abala bo, Otasɔmbejaka nongo ekenge? Cina etati ebato bamina a mojɔ mowɛ edi bo?

⁶³ Yesu ko ahogoga oko bogo, Oko boa nganga monɛnɛ abala na nde koko bo, Mbi nabekeaka wɛ a kombe eNjambe obomɔ; tɔndɔ so isa we odi Masiya, Mwana oNjambe.

⁶⁴ Yesu amosɔmbeja bo, O abali wɛ. Mbi ko natɔndɔkɔ no bo odini bonɛ Mwana ’Moto na mobondo a dɔngɔ diebɔ ebami eNdangasa, na akadoe a diko dibiyembi biDiko.

⁶⁵ Nganga monɛnɛ ala bisenja binde oko bo’la, na abala bo, Iyo atangolaka Njambe, Bodi boduka banjɛnɛki batongo mojɔ moye? O’kini no bɛnɛ bo atangoli Njambe.

⁶⁶ Ino olɛkɛni bo? Bamosɔmbeja bo, Mokindo monde oko bogwa!

⁶⁷ Bamotwea masɔi a boso bonde; bamonda bibɔtu, bamola bipapata,

⁶⁸ na babala bo, We, Masiya! Tɔndɔ so; obomi wɛ nda?

Pɛtɛlo Angana Yesu

⁶⁹ Pɛtɛlo adaka na mobondo a sokolu, oko a lopango. Okina moseka adoa ai yo na abala na nde bo, Wɛ odaki koko na Yesu oGalile.

⁷⁰ Iyo angana a boso bobu basusu; abala bo, Nitacingeaka mojɔ mobalaka wɛ.

⁷¹ Akɛkɛ yo amane a dɔngɔ dimonɔkɔ molopango, moseka otongo amonɛ, na yo abala na bato baya badaka baboli ena bo, Moto yoyo adaki na Yesu oNasaleta.

⁷² Pɛtɛlo angana koko na abɛlɛ bɛli bo, Nitajebaka moto omina.

⁷³ Ngɔngɔ mweka, bakina baya badaka hulelu badoa ai Pɛtɛlo na babala na nde bo, Wɛ odi okina obu soti. Bombeteaka we na likɛkɔ liwɛ likɔpi.

⁷⁴ Iyo ko abanga bosinga, na abɛlɛ bɛli bo, Nitajebaka moto omina. Oko aehole emina, kɔkɔ abelekoa oko bobelekoa.

⁷⁵ Pɛtɛlo asi ko alɛi ekenge ema bala Yesu bo, Wɛ ôngana mbi ngana jisato oko kɔkɔ abelekoakini. Na amana sokolu na ayea bio na molɔbɔ mɛnɛ.