Matayo 25 - Nouveau Testament en Ngombe 1961

Mondɛ moBaseka Domi

¹ A ehola emina, Bokumu boDiko bôda obaseka domi. Ibo batomba paka jibu, na bakɛ a bolenoana momi obolongana.

² Ba’bu batano badaka na bondanga, na batano koko badaka na bowɛi.

³ Bindanga batomba paka jibu ngasa, pɛ botomba nongo munɛ.

⁴ Baya badaka na bowɛi batomba paka jibu na milangi mimunɛ pongono.

⁵ Yana ayeyoa momi obolongana a njea, ibo basusu bapɔngɔpɔngɔ na hiɔ, na bahwɛ oko bohwɛ.

⁶ Na bulu tei, moto abekoa bo, Momi obolongana akɛkɛ adoe. Kɛni a bomolenoana.

⁷ Baseka bamina basisoa basusu, na basɛlingoa paka jibu.

⁸ Bindanga babala na baseka babowɛi bo, Pani so ekenge emunɛ monu, mojɔ bo paka jisu jibengi bodimoa.

⁹ Babowɛi ko babasɔmbeja bo, Pɛpɛ, motabwana na su na nu pongono. Kɛni ai bato babwasa, okasombeni a mojɔ monu bɛnɛ.

¹⁰ Ama bo kɛ a bosomba munɛ, momi obolongana ami mea oko bomea; baya badaka na mosɛlingo bakwea na nde a libonje lilihango, na modipe modipama.

¹¹ Baseka batongo badoa ngɔngɔ, na babala bo, Kumu, kumu, kina so bokwee.

¹² Iyo ko abasɔmbeja bo, Mbi natɔndɔkɔ no na soti bo nitajebaka no.

¹³ A mojɔ momina, toma sɛnjɛlɛni, mojɔ bo otajebakani busa na ehole.

Mondɛ moKumu na Bato Bande

¹⁴ Mojɔ momina modi koko o moto yona okɛ mokina mɔngɔ. Abea bakɔmɛli bande, na akaba na bu likonja linde.

¹⁵ Apa okina talenta jitano, yona otongo talenta jibae, na otongo koko talenta emɔci. Angɛ oko na mwɛngi mua mobwana na moto na moto, na akɛ a mɔngɔ monde.

¹⁶ Moto yona osɔ talenta jitano, akɛ a bokɔ bwasa na likonja, na ahɛjɛ likonja limina na talenta jitongo jitano.

¹⁷ Oko boa koko, yona osɔ talenta jibae akɛ na akɔ bwasa na likonja, na ahɛjɛ likonja limina na talenta jibae jitongo.

¹⁸ Yona ko asɔ talenta emɔci akɛ a bolonga mombɔndɔ, na abomba likonja limoswa’nde oko ena.

¹⁹ Moswa obakɔmɛli bamina ayeyoa ekoka. Yana ahula yo, akokeleja elomu ebu ebwasa.

²⁰ Yona osɔ talenta jitano adoa na likonja limina, na abakea koko talenta jitano. Abala bo, Moswa’mbi, opani talenta jitano; anja edɛyɛ; nabolojai litomba, talenta jitano.

²¹ Moswa ’nde abala na nde bo, Bopele! wɛ odi mokɔmɛli mopele; obɔngi. Alongi wɛ na libondo likɛkɛ, nadi bokina leka lonɛnɛ a mɔmɔ mawɛ. Doa a bosepa na moswa’wɛ.

²² Yona osɔ talenta jibae adoa, na abala bo, Moswa’mbi, opani talenta jibae. Anja edɛyɛ; nabakei diko talenta jibae jitongo,

²³ Moswa’nde abala na nde bo, Bopele! wɛ odi mokɔmɛli mopele; obɔngi. Alongi wɛ na libondo likɛkɛ, nadi bokina leka lonɛnɛ a mɔmɔ mawɛ. Doa a bosepa na moswa’wɛ.

²⁴ Yona oso oko talenta emɔci pɛ adoa pongono. Iyo abala bo, Moswa’mbi, najebaka bo wɛ odi moto mopipo. Obukaka ndongo a esika edi wɛ pɛ bona, Otombaka a esika edi wɛ pɛ bohɛhɛ.

²⁵ A mojɔ momina, mbi nadaka na bɔ, Nakɛ, nabomba likonja liwɛ a kpɔtɔ. Anja, likonja liwɛ didi.

²⁶ Moswa’nde amosɔmbeja bo, Wɛ mokɔmɛli mobe, mokɔmɛli obomɛli! Isa ojebaka bo mbi nabukaka ndongo a esika edi mbi pe bona, na bo natombaka a esika edi mbi pɛ bohehɛ,

²⁷ oikɔ bwasa na likonja limbi mojɔ moye, bo nasɛ likonja limbi a lihule limbi, na litomba pongono?

²⁸ Katoani likonja limina ai yo, na pani ai yona odi na talenta domi.

²⁹ Mojɔ bo, yona opeli asɔ koko, bo adae na lituna. Moto ko akada ngasa, badi bokatoa oko eka epeli yo.

³⁰ Dumbani mokɔmɛli omina yona odi edada sokolu a modidi, a esika ebio na bokpɛkpɛnɛ bomino.

Esambi eMakota

³¹ Mwana ’Moto akadoa na babwɛnji bande basusu a ekumu ende, adi boda a ngɛndɛ eekumu ende.

³² Âbolea makota masusu a boso bonde, Âbabɔteja, o abɔtejaka mobanei bata na kambɛli.

³³ Âkaba bata a dɔngɔ diebɔ ende ebami, kambɛli ko a dɔngɔ diebɔ ende ebali.

³⁴ A ehole emina, Kumu âbala na bato a dɔngɔ diebɔ ende ebami bo, Doani. Bojongoa boSangwa’mbi bodi ai no, Sangoani Bokumu bua bosɛlingoama a mojɔ monu oko a bobanga bongondo.

³⁵ Mojɔ bo, adaka mbi na nja, ino opakani mia. Ekangola ekɔkɔni, na onusakani madiba. Adaka mbi mokɛndɛli, ino osɔni mbi a ndako jinu.

³⁶ Adaka mbi oko mbundu, ino olwajakani mbi. Adaka mbi nasambi na yogo, ino obaneakani mbi. Nadaka a blɔkɔ, na odoakani a bonja mbi.

³⁷ Bato babodongo ko badi bomosɔmbeja bo, Kumu, Iso bonɛ wɛ na nja, na bopa wɛ mia a ehole eni? Bonɛ wɛ na ekangola, na bonusa wɛ madiba a ehole eni?

³⁸ Iso botana wɛ mokɛndɛli, na bosɔ wɛ a ndako jisu a ehole eni? Botana wɛ mbundu na bolwaja wɛ a ehole eni?

³⁹ Iso bonɛ wɛ osambi na yogo, isa a blɔkɔ, na bokɛ a bonja we a ehole eni?

⁴⁰ Kumu ko âbasɔmbeja bo, Mbi nabalaka na nu na soti bo, Bihole bisusu bikɔ no boa ai okina obaninga bambi yona onɔi na bokɛkɛ, okɔni ai mbi mɛnɛ.

⁴¹ Adi bobala na bato baebɔ ebali bo, Dongani ai mbi, ino bato bandakeja. Kɛni oko a mosa mua motadimea, mua mohɛngɛmɛ ai Satana na babwɛnji bande.

⁴² Mojɔ bo, yana adaka mbi na nja, oipakani nongo dia diboyaka. Adaka mbi na ekangola, oinusani mbi madiba.

⁴³ Adaka mbi mokɛndɛli, oisɔni nongo mbi a ndako jinu. Adaka mbi mbundu, oilwajani mbi, Adaka mbi nasambi na yogo na a blɔkɔ, oidoani a bonja mbi.

⁴⁴ Ibo koko bâmosɔmbeja bo, Kumu, ehole enɛ so wɛ na nja, isa na ekangola, isa mbundu, isa na yogo, isa a blɔkɔ, na so pɛ bokɔmeja we, ehole eni?

⁴⁵ Iyo âbasɔmbeja na âbala bo, Mbi natɔndɔkɔ no na soti bo, Oikɔmejani nongo okina mokɛkɛ obaninga bambi; oko boa oikɔmejani mbi.

⁴⁶ Bato bamina badi bokɛ oko a bodingoa bua bopeliti nongo suka. Bato balilonga ko badi bokɛ oko a bomɔ, oko na bosusu.