Matayo 24 - Nouveau Testament en Ngombe 1961

Minɔngɔ Misuka

¹ Yesu amana a tempelo, na yana adaka yo a njea eboyana, bacingami bande badoa bo bamonejae eyoeli etempelo.

² Iyo ko abasɔmbeja bo, Onɛkɛni leka lu losusu? Mbi natɔndɔkɔ no na soti bo pepe nongo litai limɔci lidi bodika diko dilitai litongo a esika ye; mâdumbama masusu.

³ Yana adaka Yesu yo buki a Mono moOlive, bacingami badoa ai yo, na babala na nde bo, Mojɔ momina môda a ehole eni? Embete ebodoa bowɛ na esuka engondo edi boda bo?

⁴ Yesu abasɔmbeja bo, Anganjamani na bato, bo basaka laboja no.

⁵ Mojɔ bo bato badi bodoa banɛnɛ a bobala bo, Mbi nadi Masiya; na badi bolaboja bato bou mɛnɛ.

⁶ Ô’kani koko mojɔ mobila na bijoki bibila; pɛ ko bodani na mokakwano, mojɔ bo ngando ji jibwani bodoa. Suka engondo ko êda oko ngɔngɔ, te a ehole emina.

⁷ Mojɔ bo likota lidi bona na likota; bokumu bodi bona na bokumu; manjale na majonga mangondo mâda a bikina bisika.

⁸ Ngando jimina ko jîda oko bobanga bomonɔngɔ.

⁹ A ehole emina, bâsɛnjoja no bo badingojae no, bâweja no, na bato bamakota masusu bâlona no a mojɔ mokombe embi.

¹⁰ Bato banɛnɛ bâsaka libaku a ehole emina, bâkambana na bâlonana.

¹¹ Batɔndɔi babokosea bâdoa na bâlaboja bato banɛnɛ.

¹² Epaeli ebato banɛnɛ êda etitamake, mojɔ bo bobe bodi bogbasoa.

¹³ Moto ko akada na lingbangba oko a suka, moto omina âhela.

¹⁴ Mwako mu moBokumu môpeta tɔndɔmɔ a ngondo esusu, bo makota masusu majebe; suka esa ko edoe.

¹⁵ Oko boa, yana ânɛ no eka yena emaneene a esika yena ehɛngɛmɛ ai Njambe, o abala motɔndɔi Daniele, (yona olangaka, ye acingee)

¹⁶ baya badi a Yuda ehole emina badi bocia a meno,

¹⁷ Moto yona odi a diko dietondo abwaniti botita a botomba leka londe a ndako tei.

¹⁸ Moto yona odi a gbie abwaniti bosɔmbɔ a botomba kasaka ende.

¹⁹ Bali baya badi na memi, na baya banungejaka bana, bâda na monɔngɔ a masu mamina.

²⁰ Ingakani Njambe bo ehole enu ebocia etada a edidi epio, isa a busa boSabata.

²¹ Mojɔ bo bodingoa bodi bogbasoa a ehole emina; tungu emina eipaka da, nongo a bobanga bongondo, suka oko busa bu, na botaya da boa.

²² Masu mamina makayeyoa, pɛpɛ nongo moto omɔci odi bohela; matada ko manɛnɛ, a mojɔ mobato bahɔ Njambe.

²³ Moto akabala na nu a ehole emina bo, Anjani, Masiya adi yaya! isa, Adi bobo! t’ojimeni oko.

²⁴ Mojɔ bo BaMasiya babokosea bâdoa banɛnɛ a masu mamina. Bâneja bimbete na mindumba mibokamoa, na êdika mweka pɛ bo balabojae bahɔmɔke baNjambe.

²⁵ Hokeani bopele. Mbi najebejaka no yana adi mijɔ mimina pɛ bopeta doa.

²⁶ Bakabala na nu bo, Anjani, adi oho ta esika! t’okɛeni oko oho. Na bakabala bo, Anjani, adi a ndako tei! t’ojimeni oko.

²⁷ Mojɔ bo bodoa boMwana ’Moto bôda o mokalimo. Mohulaka a dɔngɔ diɛsɛta, na mokɔkɔ njɛɛ oko a wɛsɛta.

²⁸ Miambenga badi botitana oko a esika edi ekuulu.

²⁹ Minɔngɔ mimasu mamina mikasia, modika-busa môhinda bokpa, na songe atada na monjolo. Njɔtɔ badiko bâkwa nase, na ngulu jibusa jidi bombɛ.

³⁰ Embete eMwana ’Moto êmana oho Diko a ehole emina. Makota masusu mangondo mâyea bio, na bânɛ Mwana ’Moto akadoe a biyembi bidiko na kpaci na ekumu enɛnɛ.

³¹ Iyo aloma babwɛnji bande a bohuea mondule na doi linɛnɛ, na bâbolea bahɔmɔke bande a pamba jisusu jinɛi, a suka ebusa emɔci, oko a suka etongo.

³² Ikoani na mondɛ momole mofiguier. Bitape bika’mbɛ, na bisanga biyene bikatɔ, ojebakani bo yanga esii.

³³ Oko boa pongono, okanɛni ngando ji jisusu, ôjebani bo yo adi hulelu, adi oko a modipe mɛnɛ.

³⁴ Mbi natɔndɔkɔ no bo ngando ji jisusu jidi bodoa oko elulu ye esiakini.

³⁵ Busa bodi bogwa, na ngondo edi bodimoa, bikenge bimbi ko bitakputoa.

³⁶ Pɛpɛ nongo moto omɔci ko ojebaka busa bomina na ehole emina, nongo babwɛnji baDiko isa Mwana; ojebaka oko Sango pɛ.

³⁷ Bodoa boMwana ’Moto bodi boda o adaka masu maNoa.

³⁸ A masu mamina, adaka pela eelalo pɛ bopeta doa, bayakaka na bamwakaka, basɔkɔ bali na bahangaka bali ta meki, oko a busa botamba Noa a masua.

³⁹ Baijeba nongo, oko a ehole edoa pela eelalo na ebadongeja basusu. Bodoa boMwana ’Moto bôda koko boa.

⁴⁰ Bami babae badi boda a gbie a ehole emina; okina obu âtombama, na otongo âdika.

⁴¹ Bali babae bâda a elomu endongo bonda; okina obu âtombama, na otongo âdika.

⁴² A mojɔ momina, toma kɛngɛlɛni, mojɔ bo otajebakani busa bohulaka Kumu onu.

⁴³ Pɛ ko bobosani mojɔ mumu; akɔki yo jeba ehole edoaki mobi na bulu, ka moswa ’ndako amosei, na ajimiti bo aluse ndako ende.

⁴⁴ Ino pongono, toma dani na mosɛlingo boa, cina bo Mwana ’Moto âdoa a ehole edi no pɛ bolɛ.

⁴⁵ Mokɔmɛli olisuma na bopasa adi jɔ, yona obwani bosɔ kpaci ai moswa’nde a bobanea ndako ende, na a bopa bato mia a ehole eboyaka?

⁴⁶ Moswa’nde akahula, na akamotana a elomu, adi bosepa na mokɔmɛli omina.

⁴⁷ Mbi natɔndɔkɔ no na soti bo adi bokina leka londe losusu a mɔmɔ mande.

⁴⁸ Mokɔmɛli omina ko akada mobe, na akalɛ a molema monde bo, Kumu ombi atahula bwango;

⁴⁹ na akabanga botua bina’nde, na akayaka na akalangoa na balangoi,

⁵⁰ moswa omokɔmɛli omina adi bohula bokina busa yana adi yo pɛ bolɛ, na a ehole edi yo pɛ bojeba.

⁵¹ Âmodingoja, na âmo’sa ta libondo libakosei, a esika ebio na bokpɛkpɛnɛ bomino.