Matayo 23 - Nouveau Testament en Ngombe 1961

Eleho eYesu a Mojo moBaPalusi

¹ Yesu aleha bato na bacingami bande a ehole emina.

² Abala bo, Basɔni na BaPalusi badi a mongbɛlɛngɔ moMose.

³ Oko boa sumani na kɔni ngando jisusu jikojaka bo no. Pɛ ko bokoanani na bikɔmɛli bibu, cina bo bikɔmɛli bibu na bibaeli bibu bisangiti.

⁴ Bakandaka mina mimanji mia midi na kpɔkɔsɔ a botomba, na bamilwajaka a malɔkubku mabato, bo bɛnɛ ko pe bongɔjɔ nongo mosapi a bokɔmeja,

⁵ Bilomu bibu bisusu bidi oko na njingo bo bato babanɛe. Balwaka misɔnɔ minɛnɛnɛ a macinga mambanda, na kasaka jibu jidi na manyanga manɛnɛnɛ.

⁶ Bapalaka bisika biekumu a mabonje, na bidie biboso a matitana.

⁷ Bapalaka bo bato bababɛjɛe njɛbɛ a esanjo, na bo bababee Labi.

⁸ Ino ko, t’ojimeni oko bo bato babee no na kombe Labi; mojɔ bo mokoja onu adi, na odini baninga no bɛnɛ.

⁹ T’obeeni oko moto ya nase sangwa’nu; mojɔ bo odini na Sangwa’nu oko omɔci, na yo adi a Diko.

¹⁰ T’ojimeni oko bo bato babee no baswa’bu; mojɔ bo, ino bɛnɛ odini na Moswa’nu omɔci, oko Masiya.

¹¹ Okina onu akada monɛne a tei enu, yɛ adae mokɔmɛli onu.

¹² Moto akasakumeja, adi bosamboa; na moto akasatiteja yo mɛnɛ, adi bosɔ ekumu.

¹³ Monɔngɔ ai no basɔni na BaPalusi, no bakosei! Mojɔ bo odipakani njea eBokumu boDiko ai bato. Otakweakani ena no bɛne, na otapakani njea ebokwea ai bato baya bapalaka bokwea.

¹⁴ Monɔngɔ ai no basɔni na BaPalusi, no bakosei! Okatoakani ndako jibali-babogwa, na okoseakani mojɔ na bingeeli binu biyaibiyai. Mokindo monu mônɔ na bopipo a mojɔ momina.

¹⁵ Monɔngɔ ai no basɔni na BaPalusi, no bakosei! Odini boleka madiba na bokɛ mɔngɔ moyai a ngondo, a bohekoja mopakano omɔci a dɔngɔ dinu. Akahekoa ko, okɔkɔni bo adae mwana oGehena, na bo anɔe no bɛnɛ na bobe.

¹⁶ Monɔngɔ ai no baya bagwa miso na onejakani bato batongo njea! Obalakani bo moto akabɛlɛ bɛli na tempelo, edi bɛli engasa; na akabɛlɛ bɛli na wɔlɔ etempelo, bɛli ende edi epipo.

¹⁷ Ino bigegele baya bagwa miso! Edi boso nde? isa wɔlɔ etempelo? isa tempelo mɛnɛ yena ekɔkɔ bo wɔlɔ emina edae ehɛngɛmɛke ai Njambe?

¹⁸ Obalakani koko bo moto akabɛlɛ bɛli na litumbu litempelo, edi eka engasa; na akabɛlɛ bɛli na epeeli yena edi a litumbu, bɛli ende edi epipo.

¹⁹ Ino bato bamiso mago! Edi boso nde? isa epeeli? isa litumbu lia lihɛngɛkɛ epeeli ai Njambe?

²⁰ Moto akabɛlɛ bɛli na litumbu, abɛlɛkɛ bɛli na leka losusu lua lodi a litumbu.

²¹ Moto akabɛlɛ bɛli na tempelo, abɛlɛkɛ bɛli na tempelo, na Yona odi a tei etempelo pongono.

²² Moto akabɛlɛ bɛli na Diko, abɛlɛkɛ bɛli na mongbɛlɛngɔ moNjambe, na Yona odi a mongbelɛngɔ pongono.

²³ Monɔngɔ ai no basɔni na Bapalusi, no bakosei! Opakani bipeeli ai Njambe, libondo lidomi limondumbamba, na aneto, na kumini. Obosakani ko mijɔ minɛnɛne miMibeko, bodongo, na wa, na ejimeli, Obwanini bokɔ ngando jiji, na obwanitini bobosa ngando jia jitongo.

²⁴ Odini na miso mago, na onejakani bato batongo njea. Okangoakani mongi, na omeakani kamela!

²⁵ Monɔngɔ ai no basɔni na BaPalusi, no bakosei! Osɛnojakani kɔpɔ na saani oko a sokolu; jilumi ko a tei oko na liba na lisɔngi.

²⁶ Wɛ MoPalusi yona ogwa miso! Peta sosa saani na kɔpɔ a tei, osa ko osose sokolu pongono.

²⁷ Monɔngɔ ai no basɔni na BaPalusi, no bakosei! Odini o bisɛmɔ bia bidi na pɛmbɛ, bia bidi na esɛngɔ a sokolu; bilumi ko a tei oko na kua, na njemba jibato, na tungu jisusu jibikuulu.

²⁸ Ino odini koko boa. Bato bakanja no a sokolu, badi bolɛ bo odini bato bapele. A tei enu ko, olumini oko na bokosea, na bobe oko botɔ.

²⁹ Monɔngɔ ai no basɔni na BaPalusi, no bakosei! Okɔkɔni raiboku mimatai a bisɛmɔ bibatɔndɔi; obɔngejakani bisɛmɔ bibato babodongo;

³⁰ obalakani bo, Akɔkɔ so da a masu mabasangwa’su, ka so boicingama na bu a bowa batɔndɔi.

³¹ A mojɔ momina, onejakani no bɛnɛ bo odini bana babato baya bawa batɔndɔi.

³² Sejani ko elomu ebanga basangwa’nu.

³³ Ino njɔ! Ino bana bababate! Njea enu ebohela a mokindo moGehena edi jɔ?

³⁴ A mojɔ momina, mbi nalomeaka no batɔndɔi, na bawɛi, na basɔni. Ôwani na ôbakeani bakina babu a mele-mibokea. Ôtuani batongo a sinagoge, na ôbabenganani a ngando na ngando.

³⁵ A mojɔ momina, lindo jimakia mabato basusu babodongo, maya masopea a ngondo, jîda oko ai no; makia maAbela, moto obodongo boso; suka oko makia maSekalaya, mwana oBalakia, moto oweja no a sibano etempelo na litumbu.

³⁶ Mbi nabalaka na nu soti bo mijɔ mi misusu midi bokwa na elulu ye.

³⁷ Ee, Yelusalema. Yelusalema! Ino owakani batɔndɔi, na o’lakani bato matai baya badoa na bwɛnji ai no. Mbi nadaka na posa bihole binɛnɛ bo nabolee bana banu, o aboleaka kɔkɔ bana bande cina jimapapulapu mande; ino ko oipalani nongo.

³⁸ Ndako enu edikai ngasa edɛye o mopɔtu.

³⁹ Mbi natɔndɔkɔ no bo otanɛni mbi koko, oko adi no pɛ bopeta bala bo, Bojongoa ai yona odoaka a kombe eKumu.