Matayo 22 - Nouveau Testament en Ngombe 1961

Mondɛ moLihonje Lilihango

¹ Yesu abakoja koko namindɛ.

² Abala bo, Bokumu boDiko bodi o kumu omɔci yona okalea libonje lilihango limwana’nde momi,

³ Aloma bakɔmɛli bande a ndɔsɔ ebato baya bama yo bea a lihango. Ibo ko balona bodoa.

⁴ Aloma koko bakɔmɛli batongo. Abala na bu bo, Jebejani bato babea mbi bo nasɛlingoi libonje lilihango. Nawoi ngɔmbɔ na bingbende bimbi bimuta. Leka losusu lobwani. Doani a libonje lilihango.

⁵ Bato bamina ko baihokea nongo bwɛnji, na bakɛ, okina a gbie ende, na otongo a elomu ende ebwasa,

⁶ Bakina batongo bapea bakɔmɛli bande, babasamboja, na babawa.

⁷ Kumu agbilimwana kɛnjɔ. Aloma basoda bande a bowa bawoi bamina, na batumba ngando ebu.

⁸ Abala koko na bakɔmɛli bande bo, Libonje lilihango libwani, Bato ko babea mbi babɔngiti.

⁹ Oko boa, toma kɛni a mɛlɛ manjea, na beani bato basusu bâtana no oho bo badoe a libonje lilihango.

¹⁰ Bakɔmɛli bamina bamana, bakɛ a macilinga, na batitaneja bato basusu batana bo oho, na babe na bapele pongono, Ndako elibonje eluma na bato botɔ.

¹¹ Yana akwea kumu a bonja bato, anɛ momi omɔci yona oidaka na molilo molibonje lilihango.

¹² Abala na nde bo, Moninga, okwei jɔno, pɛ bopeta lwa molilo molihango mojɔ moye? Moto omina aidipoa nongo monɔkɔ.

¹³ Kumu abala na bakɔmɛli bande bo, Mokandani mɔmɔ na mako, na modumbani sokolu a modidi, a esika êda bio na bokpɛkpɛnɛ bomino.

¹⁴ Mojɔ bo, bato banɛnɛ babeamaka, baya bahɔmɔkɔ ko badi oko baleka pɛ.

Lihɔjɔ liBaPalusi

¹⁵ Ngɔngɔ jimina, BaPalusi bakɛ na badumba ndungu bo badumbe Yesu na poloso a mojɔ moebaeli ende.

¹⁶ Bamolomea bakina bacingami babu, na bakina bato baElode, a bohɔjɔ Yesu bo, Mokoja, iso bojebaka bo we odi moto osoti. Okojaka njea eNjambe na soti mɛnɛ. Otabangaka nongo moto, mojɔ bo ekumu emoto edi eka engasa a miso mawɛ.

¹⁷ Oko boa, cingea so mojɔ mu; wɛ olɛkɛ bo? Ebɔngi bo bopute tako ai Kaisala, isa ebɔngiti?

¹⁸ Yesu ko acingea ndungu ebu ebe, na abala bo, Ino bakosei, odingeakani mbi mojɔ moye?

¹⁹ Anejani mbi ekenge elikonja liputaka no na tako, Bamopeja flanka,

²⁰ na yo abahɔjɔ bo, Elimo ye na mosɔnɔ mu monda?

²¹ Bamosɔmbeja bo, Oko moKaisala. Iyo abala na bu bo, Kabani ai Kaisala libondo liKaisala, ai Njambe ko, libondo liNjambe.

²² Yana aka bo ekenge emina bakamoa oko bokamoa; bamokina boa na bayana.

Lihɔjɔ liBaSadoki

²³ BaSadoki badoa koko ai yo a busa bomina. Ibo te bajimake bo bato badi bongɔ a bogwa,

²⁴ Bahɔjɔ Yesu bo, Mokoja, Mose abala bo moto akagwa, pɛ bokina bana, mwangwa’nde adi bosɔ mwali onde bo abote na nde bana a mojɔ momwa’nango.

²⁵ Oko boa so bodaka na bato bami sambo a ngando esu, bana banange emɔci. Yona oboso aso mwali, na agwa, pɛ bobota nongo bana. Mbakeli onde adika na mwali onde.

²⁶ Iyo ko agwa koko boa, na yona obasato pongono, na bo basusu sambo.

²⁷ Suka mɛnɛ, mwali agwa pongono.

²⁸ Oko boa, bagwake bakangɔ, mwali omina adi boda mwali onda? Mojɔ bo, ibo basusu sambo bamosɔ.

²⁹ Yesu abasɔmbeja bo, Odini na libunga, mojɔ bo otacingeakani Misɔnɔ na ngulu eNjambe.

³⁰ Bagwake bakangɔ, batasɔ nongo bali, na batahanga bali ta meki. Bâda o babwɛnji baNjambe.

³¹ Ino olangakinini ekenge ebala Njambe na nu a mojɔ mo bongɔ bobagwake? Iyo abala bo,

³² Mbi nadi Njambe oAbalayama, Njambe oIsaka, na Njambe oYakobo. Njambe aditi Njambe obagwake. Adi oko Njambe obato baya badi mɔ.

³³ Bato baemumu baka ekenge emina, na bakamoa a mojɔ mobokoja bonde.

Lihɔjɔ liBaPalusi

³⁴ Iyana aka BaPalusi bo Yesu ama gbokeja BaSadoki, ibo batitana ai yo;

³⁵ na okina obu, mokoja oMibeko, amomeka na lihɔjɔ bo,

³⁶ Mokoja, mobeko mua modi boso bomibeko misusu mitongo modi bo?

³⁷ Yesu amosɔmbeja bo, Toma pala Kumu Njambe owɛ na molema mowɛ mosusu, na mwembo mowɛ mosusu, na bolɛ bowɛ bosusu.

³⁸ Mobeko moboso, mobeko mua monɔi misusu mitongo oko mobeko momina.

³⁹ Mobeko momibae modi koko boa, Toma pala motuteano mowɛ o asapalaka wɛ mɛnɛ.

⁴⁰ Alibeko misusu, na misɔnɔ misusu mibatɔndɔi, micingi oko na mibeko mi mibae.

Lihɔjɔ liYesu

⁴¹ Adaka BaPalusi baboli boa, Yesu abahɔjɔ lihɔjɔ pongono.

⁴² Abala bo, Ino olɛkɛni bo a mojɔ moMasiya? Adi Mwana onda? Ibo bɛ bo, Mwana oDawidi.

⁴³ Yesu abala na bu bo, Oko boa, yana adaka Dawidi a Mwembo, yo amobea Kumu mojɔ moye? Iyo abala bo,

⁴⁴ Kumu abali na Kumu ombi bo, Da ya a ebɔ embi ebami, Oko a ehole êdumba mbi soki jiwɛ a cina jibibota biwɛ.

⁴⁵ Isa Dawidi amobeaka Kumu, adi boda koko Mwana onde o bo?

⁴⁶ Ibo basusu bahogoga bogo, pɛ bomosɔmbeja nongo ekenge. Donga oko a busa bomina, badaka na bɔ a bomohɔjɔ koko mahɔjɔ.