Matayo 21 - Nouveau Testament en Ngombe 1961

Yesu Akwea a Yelusalema

¹ Babenga bomea a Yelusalema, na yana amea bo a Betepage, oko a Mono moOlive, Yesu aloma bacingami bande babae na bwɛnji.

² Abala na bu bo, Suani boso a ngando yena oho; ônɛni bokpa okina punda acingi, na mwana’nde pongono. Bacingoani, na doani na bu ai mbi.

³ Moto akabala na nu a mojɔ momina, balani oko bo Kumu ababeaka; na adi bobaloma bokpa.

⁴ Modaka boa a bongameja ekenge ebala motɔndɔi bo,

⁵ Balani na mwamwali oSiona bo, Anja, Kumu owɛ akɛkɛ adoe ai wɛ. Adi na monganji; adi abaki a punda, Na a mwana-punda.

⁶ Bacingami bakɛ, na bakɔ o ama bala Yesu na bu.

⁷ Bahula na punda na mwana’nde. Babakea bisenja bibu ai bo na Yesu akonda.

⁸ Bato banɛnɛ baemumu batanda bisenia bibu a njea, na batongo balena mandɛndɛ na bamasambea a njea.

⁹ Lindundu libato bayai badalaka a boso bonde na ngɔngɔ ende babekoa bo, Osana ai Mwanai ’Dawidi! Bojongoa ai yona odoaka a kombe eKumu! Osana oho Diko!

¹⁰ Amea yo a Yelusalema, ngando esusu edaka na wokowoko. Bato babala bo, Iyo moto ndani?

¹¹ Bato baya badaka bacingi na nde basɔmbeja bo, Iyo adi motɔndɔi, Yesu oNasaleta oho Galile.

Yesu a Tempelo

¹² Yesu akwea a tempelo eNjambe, na abengana bato basusu baya bakɔkɔ bwasa a tempelo, Akukea mesa mabasɔmbɔtɔni balikonja, na bidie bibato baya bangɛjɛkɛ sungu.

¹³ Abala na bu bo, Mosɔnɔmɔ bo, Ndako embi êda na kombe Ndako ebo’nga. Ino ko oehekojaini bo edae esika etitanaka mibengo.

¹⁴ Bato baya bagwa miso, na bato bamitɛngu, badoa ai yo a tei etempelo, na abaheleja oko ena.

¹⁵ Basuku banganga na basɔni bakɛnjɔ oko bokɛnjɔ yana anɛ bo mindumba mikɔkɔ yo, na yana aka bo bɛngɛ bakabekoe a tempelo bo, Osana ai Mwana oDawidi!

¹⁶ Babala na Yesu bo, Okakadea mojɔ mobalaka bo? Iyo abasɔmbeja bo, Ee; ino ko olangakinini ekenge yeye? Obɔngejai njembo jibosakoa a minɔkɔ mibana bakɛkɛ na bana bamabɛi.

¹⁷ Abakina boa na adonga a ngando bo akee a Betania, na ahwe oko oho.

Mondɛ Momole Mua Mogwa

¹⁸ Yana ahulaka Yesu a Yelusalema ehuma, aka nja.

¹⁹ Anɛ mokina mole a dɔngɔ dinjea, na akɛ oko a mole momina, pɛ ko bonɛ nongo mbuma, oko kasa pɛ. Abala na mole bo, Otabota koko mbuma na ikina. Na mole mohɔlɔngɔnɔ bokpa.

²⁰ Yana anɛ bacingami mojɔ momina, bakamoa bou mɛnɛ, na babala bo, Mole mohɔlɔngɔni bokpa boa na ye?

²¹ Yesu abasɔmbeja bo, Mbi natɔndɔkɔ no na soti bo okadani na ejimeli, pɛpɛ nongo boboma kitɛ, otakɔni oko mojɔ mo’mi mbi kɔ a mole pɛ; odini bobala na mono mu bo modonge ena a bokwa a madiba-mamukwa, na modi bokɔ boa.

²² Oka’ngani na ejimeli a bo’nga bonu, odini bosɔ ngando jisusu jingaka no.

Yesu na Nganga

²³ Yesu akwea a tempelo, na yana akojaka yo ena, basuku banganga na basuku bangando badoa na bamohɔjɔ bo, Wɛ okɔkɔ ngando jiji na kpaci enda?

²⁴ Yesu abasɔmbeja bo, Mbi nadi koko ha lihɔjɔ a bohɔjɔ no. Okasɔmbejani, mbi nadi bojebeja no yona opani kpaci ebokɔ na ngando jiji.

²⁵ Batisimo eYoane ehula jɔ? Edi mojɔ moDiko isa mobato? Ibo babomana kitɛ, na babalana bo, Bokabala bo ehula Diko, yo adi bohɔjɔ so bo, Oko boa, oimojimeani mojɔ moye?

²⁶ Bokabala bo edi mojɔ momoto pɛ, bodi na bɔ a mojɔ mobato bangando, cina bo bajimaka bo basusu bo Yoane adaka motɔndɔi.

²⁷ Oko boa, basɔmbeja Yesu bo, Botajebakadea. Na Yesu abala na bu bo, Mbi koko boa, nitajebeja no yona opani kpaci ebokɔ na ngando jiji.

Mondɛ moBana Babae

²⁸ Ino olɛkɛni bo? Okina momi adaka na bana-bami babae. Akɛ ai mosuku na abala na nde bo, Mwana’mbi, kɛ akɔe elomu a gbie busa bu.

²⁹ Iyo asɔmbeja bo, Mbi naloni. Ambejɛ ko molema ngɔngɔ, na akɛ.

³⁰ Abala na mwana otongo koko boa. Mwana omina asɔmbeja bo, Ee sesa, najimi. Iyo ko aikɛ.

³¹ Obu babae, yona okɔ bolulea bosangwa’nde nda? Ibo bɛ bo, Oko yona oboso. Yesu abala na bu bo, Mbi natɔndɔkɔ no na soti bo baputeja batako, na bato babɔɔli, badi bonɔ boso bonu a njea eBokumu boNjambe.

³² Mojɔ bo Yoane adoa ai no a njea ebodongo, ino ko oimojimeani. Baputeja batako ko na bato babɔɔli bamojimea. Ino ko, nongo yana anɛ no mojɔ momina, oihekojani milema minu ngɔngɔ bo omojimeni.

Mondɛ moBasali a Gbie

³³ Hokeani mondɛ mosusu. Okina momi adaka na ndako, na ana gbie evine. Aehika na mongba, na asɛlingoa eboka a bonda mbuma. Apika ndako esinjili, akina gbie a mɔmɔ mabasali, na akɛ mokina mɔngɔ.

³⁴ Yana amea ehole ebobisa mbuma, yo aloma bakɔmɛli bande ai basali bo basɛ libondo linde.

³⁵ Basali bagbie ko bapea bakɔmɛli bande. Eatua okina, bawa otongo, na ba’la okina otongo matai.

³⁶ Aloma koko bakina bakɔmeli batongo; etango ebu enɔ baya baboso; na bakɔ na bu koko boa.

³⁷ Suka mɛnɛ, aloma mwana’nde mɛnɛ ai basali. Abala bo, Badi bosuma mwaria’mbi.

³⁸ Basali bagbie ko, yana anɛ bo mwana, bajɔ bo, Sangoli yona! Kɔni bomowoe, na bokatoe lisango linde,

³⁹ Oko boa bamopea, bamodumba a sokolu egbie na bamowa.

⁴⁰ Moswa ’gbie akadoa, âkɔ na basali bamina bo?

⁴¹ Bamosɔmbeja bo, Âwa bato ba babe na sanga, na âkina gbie ende a mɔmɔ mabato batongo baya badi bomopa libondo linde a ehole ebobisa.

⁴² Yesu abala na bu bo, Ino olangakinini bikenge bi a Misɔnɔ? Litai lidumbi bayoi Lidi edɛye litai limogbukusu. Njambe akɔi mojɔ mu, Na modi mojɔ mobokamoa a miso masu.

⁴³ A mojɔ momina, mbi nabalaka na nu bo, Bokumu boDiko bôka-toama ai no, na bôpama a likina likota lia libotaka mbuma jiBokumu.

⁴⁴ Moto akasaka a litai di, âbukana na du; likakwa ko diko dimoto, lîmominakaka oko bominakaka.

⁴⁵ Yana aka BaPalusi na nganga mindɛ mi miYesu, basipoa bo abalaka a mojɔ mobu,

⁴⁶ na baduka njea bo bamopee. Badaka ko na bɔ a mojɔ mobato bangando, cina bo, ibo bajimaka bo adi motɔndɔi.