Matayo 20 - Nouveau Testament en Ngombe 1961

Monde moBasali

¹ Mojɔ bo Bokumu boDiko bodi o moswa’ elomu yona omana ehuma a boduka basali a mojɔ moelomu egbie ende.

² Ajima na bu bo abapɛ tu busa pata emɔci-emɔci, na abaloma a gbie ende.

³ Amana koko a ngonga eneuf heures, na atana bakina batongo baya badaka ba’mi oko ema’ma a jando.

⁴ Ajɔ na bu bo, Ino pongono, kɛni a gbie embi, na nâpa no likonia lia libwani. Oko boa bakɛ.

⁵ Amana koko a midi na trois heures, na akɔ koko boa.

⁶ Amana yo a cinq heures, atana bakina batongo baya badaka oko ba’mi ema’ma; abala na bu bo, Ino odini ya busa bosusu edada mojɔ moye?

⁷ Ibo bamosɔmbeja bo, Mojɔ bo moto abeiti so a elomu. Iyo abala na bu bo, Ino pongono, kɛni a gbie embi.

⁸ Yana adipa busa, moswa ’gbie abala na kapita onde bo, Bea basali na bapa likonja libu. Banga na yona osuka, na sukeja na yona oboso.

⁹ Adoa basali baya bakwea a elomu a cinq heures, basɔ tu moto pata-pata.

¹⁰ Adoa ko basali baboso, ibo badaka na njingo bo likonja libu lidi bohɛ. Ibo ko basɔ koko pata-pata.

¹¹ Asɔ bo likonja limina, bahima moswa ogbie

¹² na babala bo, Iso bokɔi elomu busa bosusu na moi mopipo; ibo ko bangɔngɔ bakɔi elomu oko heure emɔci pɛ, na obabwanejai na su amɛci.

¹³ Iyo asɔmbeja okina obu bo, Moninga, mbi nitakɔkɔ wɛ bobe. Iso na wɛ bojimiti bo napɛ we pata emɔci?

¹⁴ Tomba libondo liwɛ na yana. Mbi najimaka bo napɛ moto osuka oko na mwɛngi mowɛ.

¹⁵ Nakapala bokɔ na likonja limbi boa, modi mojɔ mombi mɛnɛ. Odi na mbi lipɔle mojɔ bo nadi na likabo?

¹⁶ Oko boa baya basuka badi boda boso, na baya baboso badi boda oko a suka.

Yesu Abala a Mojɔ moBogwa Bonde

¹⁷ Iyana adaka Yesu a njea bo akɛe a Yelusalema, abea bacingami domi-na-babae a dɔngɔ dimɔci, na abala na bu a njea bo,

¹⁸ Hokeani; iso bokɛkɛ a Yelusalema, na Mwana ’Moto âkabama ai basuku banganga na basɔni, baya bâjima bo agwɛ.

¹⁹ Ibo bâmopa a mɔmɔ mabapakano bo bamopɔmbejae, bo bamotue na bamowoe a molemobokea; iyo ko ângɔ koko a busa bomasato.

Bana baSebede

²⁰ Nange ebana-bami baSebede adoa na bana bande ai Yesu, atita na magbunda a boso bonde a bomo’nga mokina mojɔ.

²¹ Yesu abala na nde bo, Epalaka wɛ ndeni? Asɔmbeja Yesu bo, Jima bo bana-bami ba bambi babae badae a bidie a Bokumu bowɛ, okina a ebɔ ewɛ ebami, na otongo a ebɔ ewɛ ebali.

²² Yesu asɔmbeja bo, Otacingakani mua mongaka no. Ino obwanini bomwa kɔpɔ ekɛkɛ mbi bomwa? Bamosɔmbeja bo, Bobwani.

²³ Yesu abala na bu bo, Odini bomwa kɔpɔ embi soti; mojɔ moboda ko a bidie a ebɔ embi ebami, na a ebɔ embi ebali, mocingiti na mbi. Modi mojɔ moSangwa’mbi yona obihɛngɛ ai bato bahɔ yo.

²⁴ Bacingami batongo domi, yana aka bo mojɔ momina, bakɛnjɔ na bananango babae.

²⁵ Yesu ko ababea ai yo na abala na bu bo, Ino ojebakani bo bakumu bamakota basakumejaka a boso bobato babu, na basuku babu badi na kpaci ai bo.

²⁶ Motada nongo boa a tei enu. Isa okina apalaka bo adae moto monɛnɛ a tei enu, yɛ adae mokɔmɛli onu.

²⁷ Isa okina apalaka bo adae kumu onu, yɛ adae oko mobuli onu,

²⁸ o adi Mwana ’Moto yona odoa bo apɛ mohelo monde o lisiko libato banɛnɛ, te bo bato badi bomokɔmɛ.

Bami Babae Basɔ Njɛnɛ

²⁹ Adongaka bo a Yeliko, bato badaka bacingi ngɔngɔ jinde banɛnɛ mɛnɛ.

³⁰ Bakina bami babae baya bagwa miso badaka na mbondo a dɔngɔ dinjea. Yana aka ’bo bo Yesu akanɔe, babekoa bo, Kumu, Mwana ’Dawidi, ikea so wa!

³¹ Bato ko balemoa na bu, na babatɔndɔ bo badae bogo. Ibo ko bahɛjɛ bingi, na babekoa na bopipo mɛnɛ bo, Kumu, Mwana ’Dawidi, ikea so wa!

³² Yesu ama, ababea na abala bo, Epalaka no bo nakɔe ai no ndeni?

³³ Bamosɔmbeja bo, Kumu, yɛ bosɛ njɛnɛ esu.

³⁴ Yesu aba’kea wa, abɛnjɛ miso mabu, na basɔ njɛnɛ ebu bokpa, na bacingama na nde.