Matayo 2 - Nouveau Testament en Ngombe 1961

Bato Babowɛi

¹ Yana abotama Yesu a Bɛtɛlɛmɛ a likota liYuda, a ehole ekumu Elode, bato babowɛi badonga a ɛsɛta, na bamea a Yelusalema.

² Bahɔjɔ bo, Yona obotami kumu oBaYuda adi jɔ? Iso bonɛ monjɔtɔ onde a dɔngɔ diɛsɛta, na bodoi bo bomosakoe.

³ Kumu Elode, ama yo ka mojɔ momina, ami ko da oko na mokakwano, na bato basusu ba Yelusalema pongono.

⁴ A mojɔ momina, yo abolea likita libasuku banganga na basɔni bangando, na abahɔjɔ esika ebobotama boMasiya.

⁵ Ibo babala na nde bo, A Bɛtɛlɛmɛ, ngando eYuda; mojɔ bo motɔndɔi asɔnɔ boa bo,

⁶ Wɛ Bɛtɛlɛmɛ a likota liYuda; Oditi ngɔngɔ jibakumu basusu baYuda; Mojɔ bo okina kumu adi bomana ai we, Yona ôda mobanei obato bambi baYisalaele.

⁷ Elode abea bato babowɛi na poloso, na abakokeleja a mojɔ moehole emana monjɔtɔ.

⁸ Abaloma a Bɛtɛlɛmɛ, na abala na bu bo, Kɛni aduke mwana omina na bingi. Okamobolojani, doani a bojebeja mbi, bo mbi nakɛe namosakoe pongono.

⁹ Aka bo ekenge yena ekumu, bakɛ oko a njea ebu. Monjɔtɔ monɛ bo a ɛsɛta akɛkɛ boso bobu, na ama a diko diesika edaka mwana.

¹⁰ Basepa bou mɛnɛ yana anɛ bo monjɔtɔ.

¹¹ Akwea bo a ndako, banɛ mwana na ngwa’nde Malia; na basumana na banmosakoa. Baloloja leka lobu, na bamopa bipeeli biwɔlɔ, na malasi, na mila.

¹² Njambe ko abajebeja a njɔti bo bata-sɔmbɔ ai Elode; na bayana a ngando ebu a njea etongo.

Bocia a Ejipito

¹³ Ama bo yana, okina obwɛnji oKumu ami doa oko ai Yosepa a njɔti. Abala na nde bo, Angɔ; tomba mwana na ngwa’nde, cia na bu oho Ejipito. Yeyoa oho oko a ehole êbala mbi na wɛ, mojɔ bo Elode akɛkɛ aduke mwana bo amowoe.

¹⁴ Yosepa angɔ, atomba mwana na ngwa’nde na bulu; akɛ a Ejipito

¹⁵ na ayeyoa oho oko a bogwa boElode, a bongameja ekenge ema bala Kumu na motɔndɔi bo, Mbi nabei mwana’mbi bo ahule Ejipito.

¹⁶ Elode ko, yana anɛ yo bo bato babowɛi bamokosea, aka kɛlɛ enɛnɛ. Adumba mobeko bo bawoe bana-bami basusu baya badaka na bianga bibae na dea, a ngando eBɛtɛlɛmɛ na a likota dia lisusu. Iyo ahieja ehole, cina bo ama kokeleja mojɔ na bato babowɛi.

¹⁷ Oko boa ekenge esɔnɔ motɔndɔi Yelemaya engama bo,

¹⁸ Ba’ka hulɔ a Lama, Bio na kɔndɔ enɛnɛ. Lakɛlɛ ayeaka bana bande. Molema monde motagɔmbɔ, Mojɔ bo bana bande baditi koko.

¹⁹ Yana agwa Elode, obwɛnji oKumu adoa ai Yosepa a njɔti oho Ejipito.

²⁰ Abala na nde bo, Angɔ; tomba mwana na ngwa’nde, sɔmbɔ na bu a ngondo eYisalaele, mojɔ bo baya baduka mwana bo bamowoe bagwi.

²¹ Oko boa yo angɔ, atomba mwana na ngwa’nde, na asɔmbɔ na bu a ngondo eYisalaele.

²² Yanako aka yo bo Alukelao asangoa bokumu boYuda a esika esangwa ’nde Elode, adaka na bɔ a bokɛ oho. Na Njambe amojebeja a njɔti bo akɛe a likota liGalile.

²³ Akɛ oho, na ada a ekina ngando yena edi na kombe Nasaleta. Oko boa mojɔ mobala batɔndɔi mongama bo, Bâmobea moto oNasaleta.