Matayo 19 - Nouveau Testament en Ngombe 1961

Mojo moBolongana

¹ Yana asieja Yesu bobala ngando jimina, adonga a Galile. Aleka Yoladene, na amea a ngunda eYuda a dɔngɔ dia.

² Bato bamosusa oho kanga banɛnɛ menɛ, na abaheleja a bego oho.

³ BaPalusi badoa ai yo bo bamomeke na lihɔjɔ bo, Mwali omoto akada na mokina mojɔ, momi abwani bomoyaneja?

⁴ Iyo abasɔmbeja bo, Ino olangakinini bo yona obakɔ a bobanga, abakɔ momi na mwali,

⁵ na yo abala bo, A mojɔ momina, momi adi bokina baboti bande bo alongane na mwali onde, bo ibo babae badae oko omɔci pɛ.

⁶ Oko boa baditi koko babae; badi oko omɔci pɛ. A mojɔ momina, Njambe akakataneja bato, t’okine oko moto ababɔtejae.

⁷ Ibo babala na Yesu bo, Isa modi boa, Mose abekea bo bapɛ mwali mokanda mobobɔtɔnɔ bo bamoyanejae mojɔ moye?

⁸ Yesu abasɔmbeja bo, Mose ajima bo oyanejaeni bali banu oko a mojɔ momilema minu mipingamake. Moidaka nongo boa a bobanga,

⁹ Mbi ko natɔndɔkɔ no bo, Moto akayaneja mwali onde—emiti da cina ebɔɔli—na akasɔ mwali otongo, angɛkɛ na nde oko bɔɔli. Na moto akasɔ mwali oma yo yaneja, angɛkɛ na nde bɔɔli pongono.

¹⁰ Bacingami bande babala na nde bo, Isa mojɔ momomi na mwali modi boa, enɔi na bopele bo moto atasɔ nongo mwali.

¹¹ Iyo ko abasɔmbeja bo, Babwani bosɔ mojɔ momina, te nongo bato basusu, oko baya basi mojɔ momina o epeeli.

¹² Bakina babotama oko batete. Batongo badi boa mojɔ bo balenama na bato. Batongo koko badi boa baya basalena bo bɛnɛ a mojɔ moBokumu boDiko. Moto akahɔnɔ, yɛ asɛ mojɔ momina.

Yesu Apamboa Bana Bakɛkɛ

¹³ Badoa na bakina bana bakɛkɛ ai Yesu bo abakee mɔmɔ mande ai bo, na bo ange a mojɔ mobu. Bacingami ko balemoa na bu.

¹⁴ Yesu ko abala bo, Kinani bana ba bakɛkɛ; yɛni badoe ai mbi, mojɔ bo Bokumu boDiko bodi oko ai bo.

¹⁵ Abakea mɔmɔ mande ai bo na adonga ena.

Konji Ahɔjɔ Yesu Mojɔ

¹⁶ Okina moto adoa ai Yesu, na abala na nde bo, Mokoja, mojɔ mopele môkɔ mbi nda bo nasɛ bomɔ bua botasia?

¹⁷ Yesu amosɔmbeja bo, Ohɔjɔkɔ mbi a mojɔ mobopele cina eye? Omɔci pɛ adi mopele. Wɛ ko, isa opalaka bo okwee a bomɔ, toma suma mibeko.

¹⁸ Iyo ahɔjɔ bo, Mibeko nda? Yesu amosɔmbeja bo, T’owoe oko moto. T’ongɛe oko bɔɔli. T’obe oko.

¹⁹ T’otate oko tati ebokosea. Suma sangwao na ngwao, na toma pala motuteano mowɛ o asapalaka wɛ mɛnɛ.

²⁰ Mwenga omina abala na nde bo, Mbi namisumaka misusu. Mojɔ motongo motaki na mbi nda?

²¹ Yesu amosɔmbeja bo, Isa opalaka bobɔngɔ na soti mɛnɛ, kɛ angɛjɛe leka lowɛ losusu, na kaba na bato babokwali, nongo odae na likonja liyumu oho Diko; osa ko odoe a bocingama na mbi.

²² Yana aka yo ekenge emina, mwenga omina ayana na wa a molema monde, cina bo adaka na makonja manɛnɛ mɛnɛ.

²³ Yesu abala na bacingami bande bo, Mbi natɔndɔkɔ no na soti bo moto yona opeli likonja linɛnɛ adi bokwea a Bokumu boDiko oko na kpɔkɔsɔ.

²⁴ Ee, natɔndɔkɔ no koko bo, Bonɔ bokamela a diso litonga, na bokwea bomoto olikonja linɛnɛ a Bokumu boDiko, bokwea bomoto olikonja linɛnɛ a Bokumu boDiko bonɔi na kpɔkɔsɔ.

²⁵ Yana aka bacingami ekenge emina, bakamoa bou mɛnɛ, na babala bo, Ekada boa, odi bohela nda?

²⁶ Yesu abanja linjenje, na ajɔ na bu bo, Bato te babwanake na mojɔ mu. Njambe ko abwani bokɔ ngando iisusu.

²⁷ Pɛtɛlo amosɔmbeja bo, Ika; iso bokini leka losusu a bocingama na wɛ. Êsɔ so ndeni?

²⁸ Yesu abala na bu bo, Mbi natɔndɔkɔ no na soti bo Mwana ’Moto akadabí a ngɛndɛ eekumu ende a ngondo eyene, ino baya bacingami na mbi odabíni a mingbɛlɛngɔ domi-na-mibae a bosambeja makota maYisalaele domi-na-mabae.

²⁹ Moto akakina ndako, isa bananango, isa ngɛnɛ, isa sango, isa nango, isa bana, isa gbie, a mojɔ mokombe embi, adi bosɔ libondo lia linɔi na bonɛnɛ, na adi bosangoa bomɔ bua bodi na bosusu,

³⁰ Banɛnɛ ko baya badi saboso badi boda sanɔngɔ, na banɛnɛ baya badi sanɔngɔ badi boda saboso.