Matayo 18 - Nouveau Testament en Ngombe 1961

Yona Odi Boso a Bokumu boDiko

¹ Bacingami baYesu badoa ai yo a ehole emina na bamohɔjɔ bo, Odi boso a Bokumu boDiko nda?

² Yesu abea okina mwana mokɛkɛlekɛ, amodeja a ndanda ebu,

³ na abala bo, Mbi natɔndɔkɔ no na soti bo omiti kindoani, bo odaeni o bana bakɛkɛlɛkɛ, otakweani nongo a Bokumu boDiko.

⁴ Moto akasatiteja bo adae o adi mwana yoyo, yo âda boso a Bokumu boDiko.

⁵ Iyona osɔkɔ okina mwana mokɛkɛlɛkɛ o adi yo, a kombe embi, asɔkɔ mbi mɛnɛ.

⁶ Moto ko akasakeja okina obu bakɛkɛlɛke baya bajimeaka mbi, bopele bo bacingee litai linɛnɛ a dɔli linde, na bamodumbe a madiba mandinda.

⁷ Monɔngɔ a ngondo a mojɔ momabaku! Mabaku madi boda soti. Monɔngɔ ko ai moto yona osakejaka batongo.

⁸ Ebɔ ewɛ isa ebota ewɛ ekasakeja wɛ, tɛndɔ, na dumba ebɔ emina, isa ebota emina. Na bokwea a bomɔ na eyɛmɛ, isa na motɛngu, na bodumbama na mɔmɔ mabae, sa bibota bibae, a mosa mua modi na bosusu, enɔi na bopele bo moto akwee a bomɔ na eyɛmɛ na motɛngu.

⁹ Okakɔ bobe a mojɔ modiso diwɛ, ihwa na dumba diso dimina. Na bokwea a bomɔ na diso limɔci, na bodumbama a mosa moGehena na miso mabae, enɔi na bopele bo moto akwee a bomɔ na diso limɔci.

¹⁰ Nganjamani bo otasɛtojani okina obana ba bakɛkɛlɛkɛ. Mbi natɔndɔkɔ no bo babwɛnji babu oho Diko banjaka boso boSangwa’mbi yona odi oho Diko.

Monde moBata Molaboake

¹¹ Mwana’Moto adoi a boheleja yona odaka mobungake.

¹² Ino olɛkɛni bo? Isa moto adi na bata mokama, na okina obu akalaboa, moto omina atakina bata domi-libwa na libwa a meno, bo akɛe a boduka yona omɔci molaboake?

¹³ Na akamoboloja, mbi natɔndɔkɔ no na soti bo, sepi ende a mojɔ mobata yona omɔci, edi bonɔ sepi ende a mojɔ mobata domi-libwa na libwa baya balaboiti.

¹⁴ Oko boa pongono, Sangwa’mbi yona odi oho Diko atapalaka bo okina obu bakekɛlɛke abunge.

Boyɛ boJibe

¹⁵ Mwangwao akakɔ wɛ bobe, ke abale na nde mojɔ momina oko no babae pɛ, Akahokea wɛ, oko boa osii mwangwao bosiili.

¹⁶ Amiti hokea wɛ ko, bea bakina bato batongo, omɔci isa babae na dea, a bolena mojɔ na ebaeli ebanjɛnɛki babae isa basato.

¹⁷ Akalona bobahokea, jebeja Denga mojɔ momina. Akalona koko bohokea Denga, yɛ adae o mopakano na moputejai otako a miso mawɛ.

¹⁸ Mbi natɔndɔkɔ no na soti bo leka losusu lokandaka no ya nase, lôkandama oho Diko. Na okalolojani leka ya nase, lôlolojama oho Diko.

¹⁹ Natɔndɔkɔ no koko bo, bakina banu babae bakada na molema momɔci ya nase a bonga mokina mojɔ, Sangwa’mbi yona odi oho Diko âkɔ mojɔ momina ai bo.

²⁰ Mojɔ bo, bato babae isa basato bakatitana a kombe embi, mbi mɛne nadi ena a ndanda ebu.

²¹ Pɛtɛlo adoa ai yo na amohɔjɔ bo, Kumu, mwangwa’mbi akakɔ mbi bobe, nabwani bomoye bihole beka? Oko bihole sambo?

²² Yesu abala na nde bo, Mbi nabalaka na we bo, Te nongo bihole sambo, oko bihole domi-sambo-sambo.

Mondɛ moMokɔmɛli Mobe

²³ Bokumu boDiko bodi o kumu omɔci yona opala bokokeleja mikanda mibakɔmɛli bande.

²⁴ Abanga yo bokokeleja, badoa ai yo na okina yona odaka na nongo ai yo, talenta koto domi.

²⁵ Iyo ko aidaka na likonia a bosieja nongo ende. Kumu onde ajima bo bangɛjɛe moto omina, na mwali onde, na bana bande, na leka londe losusu mɛnɛ, a mojɔ mobo’ta nongo.

²⁶ Mokɔmɛli omina atita na magbunda, na amongɔɔnɔ bo, Kumu, ambɛjɛ molema a mojɔ mombi. Nadi bo’ta kanga esusu mɛnɛ.

²⁷ Kumu omokɔmɛli omina amokea wa; amocingoa, na amokinea nongo emina.

²⁸ Mokɔmɛli omina ko, yana amana yo, asongana na okina mokɔmɛli otongo, yona odaka na nongo ai yo, flanka mokama. Amopea a ekoolo na abala na nde bo, Seja nongo ewɛ!

²⁹ Mokɔmɛli omina atita na magbunda na amo’nga bo, Ambɛjɛ molema a mojɔ mombi. Nadi bo’ta kanga esusu menɛ.

³⁰ Iyo ko aijima; akɛ na amosa ta blɔkɔ bo asiejae nongo.

³¹ Yana anɛ bina’nde bakɔmɛli mojɔ momina, badaka na wa enɛnɛ, na bake a botɔndɔ kumu obu mojɔ mosusu.

³² Kumu onde amolomeja, na abala na nde bo, Wɛ mokɔmɛli mobe! Mbi nakinei we nongo ewɛ esusu cina bo ongɔɔni mbi.

³³ Oko boa wɛ obwani bokea minao mokɔmɛli wa pongono, o akei mbi wɛ wa.

³⁴ Kumu onde aka kɛlɛ enɛnɛ, na amopa a mɔmɔ mabato bablɔkɔ oko adi yo pɛ bopeta sieja nongo ende esusu.

³⁵ Sangwa’mbi yona odi oho Diko adi bokɔ na nu koko boa, omiti yɛni moto na moto mwangwa’nde na molema monde mosusu.