Matayo 16 - Nouveau Testament en Ngombe 1961

BaPalusi Baduka Embete

¹ BaPalusi na BaSadoki badoa ai Yesu bo bamodingee, Bamo’nga bo abanejae ekina embete eDiko.

² Yesu abasɔmbeja bo, Isa biyembi bidi bikpetu a ehole edipaka busa, obalakani bo, Busa bôbɔngɔ puma.

³ Ehumahuma ko, isa biyembi bidi bikpetu, na isa busa bohindi, obalakani bo, Mbua âkwa busa bu. Ojebakani bocingea bimbete bibusa, pɛ ko bombetea embete eehole yena ebwani.

⁴ Bato baelulu ebe na elulu ebɔɔli bapalaka bonɛ eikina embete; batanɛ nongo embete, oko embete eJona pɛ. Yesu abakina boa, na adonga a esika emina.

⁵ Yana alekela bacingami a dɔngɔ ditongo, babosa milɛmbɛ botomba.

⁶ Yesu abala na bu bo, Nganjamani bopele a mojɔ molipetu liBaPalusi na BaSadoki.

⁷ Bacingami babomana kitɛ a mojɔ momina, na bajɔ bo, Edi mojɔ bo botombiti milɛmbɛ.

⁸ Yesu, yana anɛ yo mojɔ momina, abala na bu bo, Obomakani kitɛ mojɔ bo opelitini molɛmbɛ cina eye? Ejimeli enu edoni?

⁹ Ocingeakinini mojɔ? Obosaini mojɔ momilɛmbɛ mitano na bato koto jitano, na etango esanga jilumejai no?

¹⁰ na mojɔ momilɛmbɛ sambo na bato koto jinɛi, na etango esanga jilumejai no?

¹¹ Otacingeakani mojɔ? Abali mbi na nu bo onganjameni a mojɔ molipetu liBaPalusi na BaSadoki, nabaliti a mojɔ momolɛmbɛ.

¹² Oko boa bacingea bo abalɛjɛkɛ a mojɔ mobokoja boBaPalusi na BaSadoki, te nongo a mojɔ molipetu limolɛmbɛ.

Ejimeli ePɛtɛlo

¹³ Iyana amea Yesu a likota liKaisalia-Pilipo, ahɔjɔ bacingami bande bo, Bato babalaka bo Mwana ’Moto adi nda?

¹⁴ Ibo bɛ bo, Bakina babalaka bo odi Yoane Mobatisi. Batongo babalaka bo odi Elia; na batongo koko babalaka bo odi Yelemaya, isa okina motɔndɔi otongo.

¹⁵ Yesu abahɔjɔ bo, Ino bɛnɛ ko obalakani bo? Nadi nda?

¹⁶ Simona Pɛtɛlo amosɔmbeja bo, Wɛ odi Masiya, Mwana ’Njambe obomɔ.

¹⁷ Yesu amosɔmbeja bo, Odi na bojongoa, wɛ Simona mwana ’Yona. Cina bo obolojaiti nongo mojɔ momina na bowɛi bomoto. Sangwa’mbi ko yona odi oho Diko amobolojai ai wɛ.

¹⁸ Mbi natɔndɔkɔ wɛ bo, Wɛ odi Pɛtɛlo, na mbi nâyoa Denga dimbi a diko dilitai di; na ngulu eGehena etabwana boedumba.

¹⁹ Mbi nadi bopa wɛ sabe jiBokumu boDiko. Okakanda ekina eka ya nase, êda ekandamake oho Diko. Na okacingoa ekina eka ya nase, êda ecingoamake oho Diko.

²⁰ Yesu asi ko alehi bacingami bande bo batatɔndɔ nongo moto bo yo adi Masiya.

²¹ Yesu abanga bojebeja bacingami bande a ehole emina bo adi bokɛ a Yelusalema, bo basuku bangando, na nganga, na basɔni, badi bomodingoja bou mɛnɛ, bo badi bomowa, na bo adi bongɔ koko a busa bomasato,

²² Pɛtɛlo amohɛngɛ a dɔngɔ dimɔci, na abanga bolemoa na nde. Abala bo, Kumu, yɛ bobala boa! Mojɔ momina motakwa nongo na wɛ.

²³ Yesu ahekoa, abala na Pɛtɛlo bo, Donga ya Satana; ngɔngɔ jimbi! Odi oko libaku a njea embi. Mijɔ milɛkɛ wɛ midi oko mibato pɛ, te nongo miNjambe.

Bocingama Na Yesu

²⁴ Yesu abala na bacingami bande bo, Isa moto apalaka bocingaraa na mbi, adi bosalona yo mɛnɛ, adi botomba mole-mobokea monde bo asuse mbi.

²⁵ Mojɔ bo, yona opalaka bobanea mohelo monde âmobungeja, na yona obungejaka mohelo monde a mojɔ mombi, âmoboloja.

²⁶ Nongo moto akakonja ngondo esusu mɛne, na akabungeja mohelo monde, adi bobɔngɔ na ye? Moto adi bosikoa mohelo monde na ye?

²⁷ Mojɔ bo, Mwana ’Moto adi bodoa na babwɛnji bande a ekumu eSangwa’nde, na adi bokaba ai moto na moto libondo lia libwani na bikɔmɛli binde a ehole emina.

²⁸ Mbi natɔndɔkɔ no na soti bo bakina ba’mi yaya baya batagwa oko banɛkini Mwana ’Moto akadoe a Bokumu bonde.