Matayo 14 - Nouveau Testament en Ngombe 1961

Bogwa boYoane

¹ Kumu Elode aka gala eYesu a masu mamina

² na abala na bakɔmɛli bande bo, Iyo adi Yoane Mobatisi. Ahuli a bogwa, na akɔkɔ mindumba mimina.

³ Mojɔ bo, Elode apea Yoane, amokanda mbɔci, na amosa ta blɔkɔ a mojɔ moElodia mwali oPilipo yona odaka mwanange ’Elode,

⁴ Mojɔ bo, Yoane abala na Elode bo, Mobeko molembaka wɛ bo otasɔ mwali mina.

⁵ Elode adaka na posa bo awoe Yoane; yo ko abangaka bato bangando, mojɔ bo, ibo banjaka Yoane o motɔndɔi.

⁶ Iyana ko adaka bo na yenga enɛnɛ a mojɔ mobusa bobobotama boElode, mwamwali oElodia abua ngɔmɔ a boso bobato babea yo, na asepeja Elode.

⁷ A mojɔ momina, Elode ajima na bɛli bo mwamwali omina aka’nga ekina eka, adi bomopa eka emina.

⁸ Ngwa’nde asa a molema monde bo abale bo, Pani molo moYoane a esei.

⁹ Elode ajasa dosa. A mojɔ mobɛli ende ko, na bato babea yo, abekea bo bamopɛ.

¹⁰ Aloma monɔkɔ bo batɛndɔe molo moYoane a blɔkɔ.

¹¹ Badoa na molo monde a esei. Bamopa ai moseka omina; iyo akɛ na mu ai nango na amopa.

¹² Bacingami baYoane badoa a botomba njemba ende na baepusea. Ngɔngɔ jimina, bakɛ a bojebeja Yesu.

¹³ Iyana aka Yesu mojɔ momina, atamba a bwato, na adonga ena a bokɛ a ekina esika ebowi a lisobe. Bato ko, ama bo jeba, ba’mi donga oko a ngando na ngando, na bamokimana a njea engondo.

Yesu apa Molɛmbɛ ai Bato koto jitano

¹⁴ Oko boa, yana aduboa yo a bwato, anɛ bato banɛnɛ, kanga emumu mɛnɛ. Aba’kea wa, na aheleja bato babu baya badaka na bego.

¹⁵ Iyana adipa busa, bacingami bande badoa, babala na nde bo, Iso bodi ya a esika, na busa bodipi. Yaneja bato bo bakaduke milɛmbɛ a ngando.

¹⁶ Yesu ko abala bo, Ebɔngiti bo bayane. Bapani dia no bɛnɛ.

¹⁷ Ibo bajɔ na nde bo, Bodi ya oko na milɛmbɛ mitano pɛ, na swi babae.

¹⁸ Iyo abala bo, Panini ke leka lomina.

¹⁹ Apa monɔkɔ bo bato badae na mbondo a njienjie. Atomba milɛmbɛ mitano na swi babae. Akahoa miso diko, na ajongoa, Abuka milɛmbɛ na swi, amipa ai bacingami, na bacingami bamipa ai bato.

²⁰ Bato bayaka kanga basusu mɛnɛ, na bagola. Bandoa koko bikenge bia bidika, na balumeja sanga domi-na-jibae.

²¹ Bami baya bayaka badaka koto jitano na dea, pɛ bolanga etango ebali na bana.

Yesu adala a diko diMadiba

²² Yesu atambeja bacingami bande a bwato bo balekele a ngunda etongo, na yo adika a bosɔmbeja bimumu bibato.

²³ Ama yo sɔmbeja bato, ami kɛ oko a mokina mono monɛnɛ yo buki a mojɔ mobo’nga, na adaka oho yo buki pɛ a ehole emɔkɔmɔkɔ.

²⁴ Bwato ko bopɛkɛpɛkɛkɛ a boliko a mojɔ momula, cina bo pwea edongaka a ngunda ekɛkɛ bo.

²⁵ Yesu akɛ oho ai bo a ehole emojukakeli, akadale a diko dimadiba.

²⁶ Bacingami, ama bo monɛ akadale a diko dimadiba, ba’mi ko banga oko bobanga. Bajɔ bo, Edi oko mongɔli! na balebɔ na bɔ.

²⁷ Yesu ko abala na bu bokpa bo, Titejani milema minu; mbi yoyo, t’obangeni oko!

²⁸ Pɛtɛlo amosɔmbeja bo, Kumu, isa edi wɛ soti, beani oho adi wɛ a diko dimadiba.

²⁹ Yesu abala bo, Doa. Pɛtelo amana a bwato, na adala a diko dimadiba bo akɛe ai Yesu.

³⁰ Pɛtɛlo ko, yana anja yo mopomba, adaka na bɔ, na abanga bodinda. Abekoa bo, Kumu, helejani!

³¹ Yesu aninoja ebɔ ende bokpa, amopea, na abala na nde bo, Ejimeli etaki na wɛ. Odaki na mokakwano mojɔ moye?

³² Batamba a bwato, na pwea eyɛyɔ oko boyɛyɔ.

³³ Baya badaka a bwato basakoa Yesu na babala bo, Wɛ odi Mwana oNjambe soti,

³⁴ Asɛmɛ bo a mbongu, baduboa a likota liGenesaleta.

³⁵ Bato baesika emina bambetea Yesu, na baloma ndɔsɔ ebato basusu baya badaka na bego a likota libu lisusu, na badoa na bu ai Yesu,

³⁶ Bamongɔɔnɔ bo babɛnjɛe oko linyanga likasaka ende, na baya bakɔ boa bahela a bego bibu.