Matayo 13 - Nouveau Testament en Ngombe 1961

Mondɛ moNgua

¹ Yesu amana a ndako a busa bomina, na akɛ akadae a mbongu.

² Bato batitana ai yo banɛnɛ mɛnɛ, na bamohika. A mojɔ momina, yo atamba a bokina bwato bo adae ena, na bato basusu ba’ma oko a mbongu.

³ Iyo abala na bu mijɔ minɛnɛ oko na mindɛ. Abala bo, Okina moto akɛ a bomɛsɛ ngua ta gbie.

⁴ Yana amɛsɛkɛ yo, jikina ngua jikwa a dɔngɔ dinjea; mbulu badoa na bayaka ngua jimina.

⁵ Jikina ngua jitongo jikwa a bisika bidaka matai, pɛpɛ kpɔtɔ jinɛnɛ. Ngua jimina jiiyeyoa na bo’tɔ, cina bo kpɔtɔ jidaka oko mweka pɛ.

⁶ Ama mana mo ko, jimi wɔsɔsɔ oko bowɔsɔsɔ, na jigwa, mojɔ bo njeli jiidaka na ndinda.

⁷ Jikina ngua jitongo jikwa a bisika bidaka njani; njani jidaka na bohohu, na jidimoja ngua.

⁸ Jikina ngua jitongo jikwa a kpɔtɔ jipele. Ngua jimina jibota, jikina mokama, jikina jitongo macinda masato, na jitongo koko licinda-na-domi.

⁹ Isa moto adi na matoi manjoki, yɛ ahokee.

¹⁰ Bacingami badoa na babala na nde bo, Obatɔndɔkɔ oko minde pɛ mojɔ moye?

¹¹ Yesu abasɔmbeja bo, Ino osini bocingea a bojeba ngando jibombamake jiBokumu boDiko; ibo ko basiti bocingea.

¹² Yona opeli, asɔ koko libondo bo adae na lituna. Moto ko yona odi oko ngasa,—badi bokatoa yena epeli yo.

¹³ A mojɔ momina, mbi nabatɔndɔkɔ oko mindɛ pɛ; mojɔ bo, nongo adi bo na miso, batanɛkɛ eka na miso; adi bo na matoi, te bakake nongo.

¹⁴ Eseko epa motɔndɔi Yisaya engami soti na bato bamina. Iyo abala bo, Ô’kani na matoi, na otacingeani nongo. Ôajani na miso, na otanɛni nongo.

¹⁵ Mojɔ bo milema mibato ba midi na bondanga. Matoi mabu madi na bohoka. Badipi miso mabu oko bodipa, Bo bata’nɛ na miso, na bata’ka na matoi, Na batacingea na milema, Basaka hekoa ai mbi bo nabahelejae.

¹⁶ Ino odini na bojongoa, mojɔ bo miso manu madi na njɛnɛ, na matoi manu madi na njoki.

¹⁷ Mbi najebejaka no na soti bo batɔndɔi na bato babodongo banɛnɛ badaka na posa a bonɛ ngando jinɛkɛ no, na a boka ngando jikaka no; baijinɛ ko, na baijika.

¹⁸ Hokeani ko cina emonde momomɛsei ongua.

¹⁹ Moto aka’ka mwako moBokumu, na yo pɛ bocingea, yona Mobe adoaka a bocinoa mua momɛsɛmi a molema monde. Mojɔ monde modi o ngua jia jikwa a dɔngɔ dinjea.

²⁰ A mojɔ mongua jia jikwa a bisika bidaka matai; jidi oko mwako mokaka moto yona osɔkɔ mwako momina na sepi.

²¹ Iyo ko apeliti njeli a tei ende, na t’ayeyoake nongo ekoka. Mokina monɔngɔ mokadoa, isa jɔɔlɔ, a mojɔ moEbaeli, adi bongwa oko bongwa.

²² Ngua jia jikwa a bisika bidaka njani jidi oko mwako mokaka moto, Mwako ko mogbokaka oko na mikakwano a mojɔ mongando jingondo ye, a mojɔ mobokosea bomakonja, na motabotaka nongo.

²³ Ngua jia jikwa a kpɔtɔ jipele jidi oko mwako mokaka moto na bocingea. Iyo abotaka soti; ngua emɔci ebotaka mokama, etongo macinda masato, na etongo koko licinda-na-domi.

Mindɛ Mitongo

²⁴ Abatɔndɔ mokina mondɛ motongo. Abala bo, Bokumu boDiko bodi o moto yona ona ngua jipele a gbie ende.

²⁵ Yana ko adaka bato bahwɛli, soki ende adoa. Iyo ana ngua jinjani a esika edaka lɔsɔ, na ayana.

²⁶ Yana atɔ ngua na jikwea, ngua jitongo jitɔ pongono.

²⁷ Basali bakɛ ai moswa’bu na bamohɔjɔ bo, Kumu, wɛ oina ngua jipele a gbie ewɛ? Oko boa njani jia jitɔi ena jihuli jɔ?

²⁸ Iyo abasɔmbeja bo, Okina moto yona odi na mbi soki akɔi mojɔ mu. Basali babala na nde bo, Opalaka bo so bokɛe bojibikoe?

²⁹ Iyo abasɔmbeja bo, Pɛpɛ, osaka bikoani bsɔ pongono yana abikoaka no njani.

³⁰ Kinani tungu jisusu jibae jikpɛlɔe oko a ehole ebojua. Ehole ebojua ekamea, nadi botɔndɔ basali baya bajuaka bo, Peta ndoani njani na jikandani mobɔmbɔ mobɔmbɔ a mojɔ raobotumba. Boleani ko bsɔ a magasini mambi.

³¹ Abatɔndɔ koko mokina mondɛ motongo. Abala bo, Bokumu boDiko bodi o mongua mosinape. Moto amotomba na amona a gbie ende.

³² Mongua momina monɔi ngua jisusu na bojio. Mokatɔ ko, modi bokaa monɛnɛ, na mônɔ njua jisusu na buke; modi mole mɛnɛ, na mbulu badiko badi bodoa a boyoa mobo mabu a bitape bimole momina.

³³ Mondɛ motongo mobala yo na bu oko mu;—Bokumu boDiko bodi o lipetu litomba mwali; ali’sa a mitɛke mindongo, saani jisato; na mitɛkɛ misusu mipetoa.

³⁴ Yesu abala na bimumu bibato ngando ji jisusu na mindɛ, Aibala na bu mijɔ mitongo, oko mindɛ pɛ,

³⁵ bo angamejae ekenge ebala motɔndɔi bo, Mbi nâdipoa monɔkɔ mombi a bobala mindɛ. Nâbala mijɔ mia midaka mibombamake oko a libangake lingondo.

³⁶ Yesu ayaneja bato na akwea a ndako, Bacingami bande badoa ai yo na babala bo, Cingea so mondɛ mongua jinjani a gbie.

³⁷ Iyo abasɔmbeja bo, Yona cnaka ngua jipele adi oko Mwana ’Moto.

³⁸ Gbie edi ngondo. Ngua jipele jidi bana baBokumu. Njani jidi bana bayona Mobe. Soki yona oji’na adi oko Satana.

³⁹ Ehole ebojua edi oko suka eehole ye; na bato babojua badi babwɛnji-baDiko.

⁴⁰ Bandoaka na batumbaka njani, na modabí koko boa a suka eehole ye.

⁴¹ Mwana ’Moto alomabi babwɛnji bande baya badi bodongeja ngando jisusu jibe a Bokumu bonde, na bato basusu baya bakɔkɔ bobe,

⁴² na babadumbamabí a libulumeja limosa. Badabí oho oko na bio na bokpɛkpɛnɛ bomino.

⁴³ A ehole emina ko, bato babodongo badabi na bohu bomodika-busa a Bokumu boSangwa’mbi. Yona odi na matoi manjoki, yɛ ahokee.

⁴⁴ Bokumu boDiko bodi o leka loyumu lua lobombama a ekina gbie. Moto aboloja leka lomina, alokunda koko, na akɛ a bongɛjɛ leka londe losusu bo asombe gbie emina.

⁴⁵ Bokumu boDiko bodi koko o moto obwasa yona odukaka matai mayumu.

⁴⁶ Akaboloja litai limɔci libobuno bonɛnɛ, adi bokɛ a bongɛjɛ leka londe losusu bo alisombe.

⁴⁷ Bokumu boDiko bodi koko o eyoma edumabama a madiba, na edinga swi tungu na tungu,

⁴⁸ Eluma na swi, na badukeli baegbula a mbongu. Basa swi bapele a mitongo, na badumba swi babe.

⁴⁹ Ehole ye ekasia, edabí koko boa. Babwɛnji baDiko bamanabí a bobɔteja babe na bapele.

⁵⁰ Badumbabí babe a libulumeja limosa, na badabí oho oko na bio na bokpɛkpɛne bomino.

⁵¹ Ino ocingeini mijɔ mi misusu? Ibo bajima, Ee.

⁵² Yesu abala na bu bo, Mosɔni yona ocingeaka ngando jiBokumu boDiko adi o moto yona odi na ndako, na amejaka leka loyene na leka loyou a edejai ende.

Yesu a Nasaleta

⁵³ Asieja yo mindɛ mi, Yesu angɔ,

⁵⁴ asɔmbɔ a likota linde mɛnɛ, na akoja a sinagoge ebu. Bato bakamoa bou mɛnɛ na babala bo, Iyo asi bowɛi bomina jɔ, na ngulu a bokɔ mindumba mimina pongono?

⁵⁵ Iyo, te mwana osapante? Ngwa’nde te Malia? Bananango, te baYakobo, Yosepa, Simona na Yuda?

⁵⁶ Na ngɛnɛ jinde jisusu jiditi na su ya pongono? Oko boa, yo asi ngando jiji jɔ?

⁵⁷ Na bamolona oko bolona. Yesu ko abala na bu bo, Motɔndɔi adi o motongasa oko a ngando ende mɛnɛ pɛ, na a ndako ende mɛnɛ pɛ.

⁵⁸ Aikɔ bimbete binɛnɛ bingulu oho, cina epɛndɔ ebu.