Matayo 11 - Nouveau Testament en Ngombe 1961

Lihɔjɔ liYoane

¹ Yana asieja Yesu bileho bimina ai bacingami bande domi-na-babae, adonga a esika emina bo akojae na atɔndɔe mwako a ngando jibu.

² Yana aka Yoane a blɔkɔ mojɔ mobilomu biMasiya, amolomea monɔkɔ na bacingami bande mɛne.

³ Amohɔjɔ bo, We odi yona odi na sako ebodoa, isa bodi bomba okina otongo?

⁴ Yesu abasɔmbeja bo, Sɔmbɔni ai Yoane; mojebejani ngando jikaka no na jinɛkɛ no.

⁵ Baya bagwa miso basɔkɔ njɛnɛ ebu. Bato bamitɛngu badalaka. Bato bamaba bahelaka. Bato babohoka badi na njoki, Bagwake bangɔi, na bato babokwali bakaka Mwako Mopele.

⁶ Bojongoa ai moto yona otabunga mojɔ mombi.

⁷ Ama bo yana, Yesu ami bala oko na emumu ebato a mojɔ moYoane. Abala bo, Ekɛ no oho a lisobe a bonja ndani? mongongo mokakumane na pwea?

⁸ Ee, eke no oho a bonja ndani? moto yona olwaka bisenja bibopɛtɛpɛtɛ? Ikani! baya balwaka bisenja bibopetɛpetɛ badi oko a ndako jibakumu.

⁹ Ekɛ no oho mojɔ moye?—a bonja motɔndɔi? Ee, mbi natɔndɔkɔ no bo yo anɔi motɔndɔi.

¹⁰ Mojɔ mu mosɔnɔmɔ a mojɔ monde bo, Anjani, mbi nalomi obwɛnji ombi a boso bowɛ; Iyo âsɛlingoa njea a boso bowɛ.

¹¹ Mbi nabalaka na nu na soti mɛnɛ bo pɛpɛ nongo moto omɔci yona obotama na mwali onɔi Yoane Mobatisi Endele ko, yona odi ngɔngɔ mɛnɛ a Bokumu boDiko adi boso bonde.

¹² Bato babanga bokwea a Bokumu boDiko na bopipo a masu maYoane Mobatisi, na edɛye pongono, bato babotepeli bakweaka ena na bopipo.

¹³ Batɔndɔi basusu, na Mibeko pongono, batɔndɔ ngando jia jidi bokwa ngɔngɔ, oko a ehole eYoane.

¹⁴ Isa ejimeli enu ebwani na mojɔ mumu—Yoane adi oko Elia yona odaka na sako ebodoa.

¹⁵ Isa moto adi na matoi manjoki, yɛ ahokee.

¹⁶ Mbi nadi bonge elulu ye na ye? Babwani oko na bɛngɛ baya batitani a ndɔngɔ, na babekoaka ai bina’bu bo,

¹⁷ Iso bobomi ebumba, ino ko pɛ bobua ngɔmɔ, Bobomi lingondo, ino ko pɛ boyea kɔndɔ.

¹⁸ Mojɔ bo Yoane adoiti na eyakeli na emwakeli, na babala ka bo adi na mwembo mobe.

¹⁹ Mwana ’Moto ko adoi, akayake na akamwake, na babalaka bo, Anjani moto omogbuko na molangoi; apanganaka na baputeja batako na bato babe. Bowɛi bodi bolonga oko na bilomu bibowɛi.

Mojɔ moBato baPɛndɔ

²⁰ Yesu abanga bolemoa na bato a ngando jikɔkɔ yo mindumba minde minɛnɛ, cina bo baihekoja milema mibu.

²¹ Abala bo, Monɔngɔ ai ho Kolasina! Monɔngɔ ai no Betesaida! Akɔkɔ bo nɛ mindumba minɛkɛ no oho Tula na Sidona, ka bahekoja milema mibu eyou, na balwa bipupu, na basasuoa mihulu.

²² Mbi natɔndɔkɔ no bo bodingoa bonu bonɔbí bua boTula na Sidona a busa boEsambi.

²³ Ino Kapalanauma—obakini diko? Pɛpɛ, otitabíni nase oko a Gehena, Nongo Sɔdɔmɔ, akɔkɔ bo nɛ mindumba minɛkɛ no, ka badi oko busa bu.

²⁴ A mojɔ momina, mbi nabalaka na nu bo esambi enu enɔbí yena eSɔdɔmɔ na bopipo a busa boEsambi.

²⁵ A ehole emina, Yesu abala bo, Sesa, Kumu oDiko na nase, mbi nasakoaka wɛ cina bo obomba ngando jiji ai bato babowɛi, ai bato baya bacingeaka mijɔ, na ojibolojai ai bana bakɛkɛ.

²⁶ Ee Sesa; bolulea bowɛ bopele bodaka boa.

²⁷ Sangwa’mbi apani kpaci a ngando jisusu. Pɛpe nongo moto ojebaka Mwana. Edi oko Sango pɛ yona omojebaka. Pɛpɛ nongo moto ojebaka Sango. Edi oko Mwana pɛ yona omojebaka, Na Mwana akajima, amobolojaka ai bato bo bamojebe.

²⁸ Doani ai mbi, ino basusu baya bangwai, na baya ba’mbi na mina, bo mbi nahemejae no.

²⁹ Tombani mosongo mombi. Ikoani na mbi, mojɔ bo mbi nadi na molema motitake.

³⁰ Mosongo mombi moditi na kpɔkɔsɔ, na muna mombi modi mohahanake.