Matayo 10 - Nouveau Testament en Ngombe 1961

¹ Yesu abolea bacingami bande domi-na-babae. Abapa kpaci a bomeja miembo mibe, na a bosengoa bego na biɛmɛ bisusu.

² Kombe jibabwɛnji domi-na-babae oko jiji; yona oboso oko Simona yona odi na kombe Pɛtɛlo, na mwangwa’nde Andalea; Yakobo mwana ’Sebede, na mwangwa’nde Yoane;

³ Pilipo na Balatelemi, Toma na Matayo moputeja otako; Yakobo mwana oAlapayo, na Tadayo;

⁴ Simona oKanana, na Yuda Iskalio yona omokaba.

⁵ Yesu abaloma, domi-na-babae, oko na eleho ye, Pɛ bokɛni a njea ebapakano, isa a ngando jiSamalia.

⁶ Kɛni oko ai bata babungake badenga diYisalaele.

⁷ Kɛni atɔndɔeni mwako bo, Bokumu boDiko bobengi bomea.

⁸ Helejani baya badi na bego. Angɔjɔni bagwake. Sɛnojani bato bamaba, na imejani miembo mibe. Ino osini bosɔ, pɛ nongo bosomba; pani koko boa.

⁹ Pɛ botombani likonia liwɔlɔ, isa palata, isa flanka a mabenga manu;

¹⁰ pepɛ nongo litɔngi a mojɔ momɔngɔ monu, isa kasaka jibae, isa sapata, isa pango; cina bo mosali abwani bosɔ dia dinde.

¹¹ Okameani a ekina ngando, isa cnɛnɛ isa ekɛkɛ, dukani moto oesako epele, na yeyoani a ndako ende oko a ehole enu eboyana.

¹² Okakweani a ekina ndako, abɛjɛni njɛbɛ.

¹³ Ndako emina ekabɔngɔ, kinani bowi bonu bodae ena. Emiti bɔngɔ ko, kinani bowi bonu bohule ai no.

¹⁴ Bamiti sɔ no bopele, na bamiti hokea mwako monu, kinani ndako emina, isa ngando emina, na hakoani dutu libibota binu.

¹⁵ Na esambi eSɔdɔmɔ na Gomola, na esambi engando emina, mbi natɔndɔkɔ no bo esambi engando emina enɔbí na bopipo a busa boEsambi.

¹⁶ Hokeani; mbi nalomaka no o bata baya bahikami na swa. A mojɔ momina, toma dani na bopasa bonjɔ na bowi bosungu.

¹⁷ Anganjamani ko na bato; mojɔ bo badi bogbula no a bisambi, na bâtua no a sinagoge.

¹⁸ Bâlinda no a boso bobakumu na bakonji a mojɔ mombi, bo odaeni batati bambi ai bo na ai bapakano.

¹⁹ Bakapea no, t’odaeni oko na mokakwano a mojɔ mokɔpi enu na ebaeli enu; mojɔ bo ôsɔni bikenge bibobala a ehole emina.

²⁰ Mwembo moSangwa’nu a tei enu modi bobala, te no bɛnɛ.

²¹ Moto adi bokaba mwananango bo agwɛ. Sange’moto âkaba mwana’nde. Bana bâna na baboti, na bâbaweja.

²² Bato basusu bâlona no a mojɔ mokombe embi. Yona ko ôda mombilimake oko a suka, yo âhela.

²³ Bakanɔngeja no a ngando emɔci, ciani a ngando etongo. Mojɔ bo mbi natɔndɔkɔ no na soti mɛnɛ bo Mwana ’Moto adi bodoa oko omeakinini a ngando jisusu jiYisalaele.

²⁴ Moto yona okoaka t’anɔke mokoja onde. Mokɔmɛli t’anɔke moswa ’nde.

²⁵ Libondo limokoja libwani koko na yona okoaka, na lia limoswa libwani na mokɔmɛli. Bakabakea moswa ondako kombe Balasebuba, esingaiti bakɔmɛli bande!

²⁶ Yɛni ko bobanga bato bamina; mojɔ bo ngando jisusu jia jikundami jîkundoama, na jia jibombami jîboloa.

²⁷ Tɔndɔni a bohu ngando jibalaka mbi na nu a modidi; bekoani a diko dibitondo jia jikaka no na polipoli.

²⁸ Yeni bobanga baya bawaka mokuku, mojɔ bo te bahɔnɔke bowa mwembo. Odini bobanga oko yona odi na ngulu a bowa mokuku na mwembo pongono a Gehena.

²⁹ Dɛkɛ babae batakwaka likota limɔci? Pɛpɛ nongo omɔci ko odi bokwa nase, na Sangwa’nu pɛ bojeba.

³⁰ Iyo ko ajebaka etango eswe jimelo minu.

³¹ A mojɔ momina, ino obwanitini bobanga, Ino na dɛkɛ, banɔi na bobuno ada, te no?

³² Moto akajima bo adi moto ombi a boso bobato, mbi nadi bojima moto omina a boso boSangwa’mbi yona odi oho Diko.

³³ Moto ko aka’ngana a boso bobato bo adi moto ombi, mbi nadi bongana moto omina a boso boSangwa’mbi yona odi oho Diko.

³⁴ T’olɛeni oko bo mbi nadoi a bopa ngondo bowi; pɛpɛ nongo mweka. Mibi nadoi, te a bopa bowi; nadoi oko na mopamba.

³⁵ Nadoi a bobɔteja moto na sangwa’nde, mwamwali na ngwa’nde, na mwali na bokio bonde mwali.

³⁶ Soki ilmoto jîda oko bato badenga dinde mɛnɛ.

³⁷ Epaeli emoto ai sangwa’nde isa ai ngwa’nde ekanɔ epaeli ende ai mbi, moto omina abɔngiti na mbi.

³⁸ Moto amiti tomba mole-mobokea monde a bocingaraa na mbi, abɔngiti na mbi.

³⁹ Yona obaneaka mohelo monde âmobungeja, na yona obungejaka mohelo monde a mojɔ mombi, âmobanea.

⁴⁰ Moto akasɔ no, asɔkɔ mbi; na yona osɔkɔ mbi, asɔkɔ yona olomani.

⁴¹ Moto akasɔ motɔndɔi mojɔ bo adi motɔndɔi, âsɔ ndese emotɔndɔi. Akasɔ moto obodongo mojɔ bo adi moto obodongo, âsɔ ndese emoto obodongo.

⁴² Moto akapa kɔpɔ emadiba ai okina obana ba bakɛkɛ mojɔ bo adi mocingami ombi, mbi natɔndɔkɔ no na soti bo atataka bosɔ ndese ende.