Malako 3 - Nouveau Testament en Ngombe 1961

Yesu Aheleja Moto na Ebɔ Endɔke

¹ Yesu akwea koko a sinagoge, na moto yona odaka na ebɔ endɔke adaka ena.

² Bato badoa kɛngi a bonja isa yo adi bomosengoa a busa boSabata, bo bamodumbe na mojɔ.

³ Yesu abala na moto yona odaka na ebɔ endɔke bo, Imana ya; ima a boso bobu.

⁴ Abala na bato bamina bo, A busa boSabata bobwani bokɔ bopele isa bobe? Bobwani boheleja moto isa bomowa? Ibo ko baisɔmbeja nongo ekenge.

⁵ Yesu abanja na kɛlɛ, na adaka koko na wa, mojɔ bo milema mibu midaka Inipipo. Abala na moto omina bo, Ninoja ebɔ. Iyo aninoja ebɔ ende, na yogo eebɔ ende esia oko bosia.

⁶ BaPalusi basi ko bamani, na badumba ndungu na bato baElode bo bawoe Yesu.

⁷ Yesu akɛ na bacingami bande a dɔngɔ di madiba. Bato banɛnɛ mɛnɛ bamosusa oho; bato baGalile, na Yuda,

⁸ na Yelusalema, na Bdome; bato badongo ditongo diYoladene, na lɔato baTula na Sidona pongono, bato kanga banɛnɛ mɛnɛ. Badoa ai yo mojɔ bo ba’kaka mwako mongando iikɔkɔ yo.

⁹ Yesu ajebeja bacingami bande bo basɛlingoe bwato, bo atabambama na bato, mojɔ bo badaka bato banɛnɛ mɛnɛ.

¹⁰ Iyo aheleja bato banɛnɛ a bego bibu. A mojɔ momina, bato basusu baya bapekaka baswianaka a bomea ai yo, bo bamobɛnjɛe na mɔmɔ.

¹¹ Yana anɛ miembo mibe Yesu, mikwa a boso bonde, na mibekoa bo, Wɛ odi Mwana oNjambe!

¹² Iyo ko abaleha na bopipo bo batajebeja bato mojɔ monde.

Yesu Ahɔ Domi-na-Babae

¹³ Yesu awea a mokina mono monɛnɛ. Abea ai yo bato bajimaka yo mɛnɛ, na bakɛ ai yo.

¹⁴ Abɔ domi-na-babae a boyeyoa na nde, bo abalome a botɔndɔ mwako,

¹⁵ na bo badae na kpaci a bomeja miembo mibe. Ahɔ domi-na-babae, oko ihaba;

¹⁶ Simona; amobakea kombe etongo, Pɛtɛlo;

¹⁷ Yakobo mwana oSebede, na Yoane mwananango; ababakea kombe etongo, oko Boanajisi. Cina ekombe emina edi Bana baBɛi.

¹⁸ Andalea na Pilipo, Ealatelemi na Matayo, Toma ha Yakobo mwana oAlapayo, Tadayo na Simona moto oKanana,

¹⁹ na Yuda Iskalio yona omokaba.

Mojɔ Momiembo Mibe

²⁰ Yesu ahula a ndako, na bato batitana koko banɛnɛ mɛnɛ. A mojɔ momina bainɛ nongo pokiso a mojɔ moboyaka.

²¹ Yana aka bato badenga dinde mɛnɛ mojɔ momina, badoa bo bamopee; mojɔ bo, babala bo, Iyo adi na lilale!

²² Basɔni baya badonga a Yelusalema babala bo, Iyo adi na Balasebuba a tei ende. Amejaka miembo mibe oko na kpaci ekumu omiembo mibe.

²³ Yesu ababea ai yo, abala na bu na mindɛ bo, Satana adi bodumba Satana?

²⁴ Bokina bokumu bokada na bobɔtɔ, bokumu bomina botayeyoa.

²⁵ Oenga dikada na bobɔtɔ, denga dimina ditayeyoa.

²⁶ Satana aka’na bila na yo mɛnɛ, na akada na lisoki ai yo mɛnɛ, atayeyoa nongo; na mojɔ monde modi bosia.

²⁷ Pɛpɛ nongo moto odi bokwea a ndako emoto mopipo a boba leka londe; adi bopeta gbokeja moto mopipo, asa ko abe leka londako emoto omina.

²⁸ Mbi natɔndɔkɔ no na soti bo jibe jisusu jibana babato jîkinama, na bibaeli bibu bisusu bibosambolu pongono.

²⁹ Moto ko akatangola Mwembo Mosɛnɔke, atakinama nongo. Lindo jibobe bonde jidi oko na bosusu.

³⁰ Yesu abala boa cina bo bama bala bo, Iyo adi na mwembo mobe a tei ende.

Yesu na Nango na Bananango

³¹ Nange ’Yesu adoa na bananango. Bama oko sokolu na bamolomea monɔkɔ bo amane.

³² Bato banɛnɛ badaka ena na bamohikaka. Bakina babala na nde bo, Ngwao na banangwao badi oho sokolu, na babeaka wɛ.

³³ Iyo abasɔmbeja bo, Ngwa’mbi na banangwa’mbi banda?

³⁴ Ahekoja miso mande a dɔngɔ na dɔngɔ a bonja bato baya bamohikaka, na abala bo, Anjani, ngwa’mbi na banangwa’mbi oko ba.

³⁵ Moto yona okɔkɔ bolulea boNjambe, yo adi mwangwa ’mbi na ngɛnɛ embi na ngwa’mbi.