Malako 2 - Nouveau Testament en Ngombe 1961

Moto oMokɔbɛlɛ

¹ Yana anɔ makina masu, Yesu asɔmbɔ koko a Kapalanauma. Mwako monangana bo adaka andako,

² na bato batitana banɛnɛ mɛnɛ. Ndako embambama; pɛpɛ nongo pokiso edika, nongo a monɔkɔ mondako, yana atɔndɔkɔ yo mwako.

³ Bakina bato badoa ai yo na moto omokɔbɛlɛ, na bato banɛi bamosongaka.

⁴ Ibo ko bainɛ nongo njea a bobatama na nde a mojɔ moembamba ebato. Oko boa, bahoja njea a mwanja mondako edaka Yesu; basoloja esambe oko a lipose limina, na moto omokɔbɛlɛ adaka asambi ena.

⁵ Iyana anɛ Yesu ejimeli ebu, abala na moto omokɔbɛlɛ bo, Mwana, jibe jiwɛ jikinami.

⁶ Bakina basɔni ko badaka ena baya basahɔjɔkɔ a milema mibu bo,

⁷ Moto yoyo abalaka boa mojɔ moye? Atangolaka Njambe. Odi bokina jibe nda, te Njambe pɛ?

⁸ Yesu ajeba a mwembo monde bo badi na mahɔjɔ mamina a milema mibu, na abala na bu bokpa bo, Ino odini na mahɔjɔ mamina a milema minu mojɔ moye?

⁹ Mojɔ monɔi na bopipo nda? A bobala na moto omokɔbɛlɛ bo, Jibe jiwɛ jikinami; isa, Angɔ, tomba esambe ewɛ na dala?

¹⁰ Ino ko odini bojeba bo Mwana ’Moto adi na kpaci ya nase a bokina jibe. Oko boa abala na moto omokɔbɛlɛ bo,

¹¹ Mbi nabalaka na wɛ; Angɔ, tomba esambe ewɛ, yana a ndako ewɛ.

¹² Iyo angɔ, atomba esambe ende bokpa, na amana a boso bobu basusu. Ibo basusu bakamoa a mojɔ momina, bakumeja Njambe, na babala bo, Iso bopakiti nɛ mokina mojɔ boa.

Yesu Abea Lewi

¹³ Yesu akɛ koko a dɔngɔ dimbongu elibale. Bato basusu badoa ai yo na abakoja.

¹⁴ Yana adalaka yo a njea, anɛ Lewi, mwana oAlapayo; adaka na mobondo a bilo etako, na abala na nde bo, Gingama na mbi. Iyo angɔ oko bongɔ, na acingama na Yesu.

¹⁵ Adaka Yesu a mesa a ndako eLewi, baputeja batako, na bato bagala ebe banɛnɛ, badaka na Yesu na bacingami bande a mesa, mojɔ bo banɛnɛ babu bamosusaka.

¹⁶ Yana anɛ Basɔni na BaPalusi bo Yesu ayakaka na bato bagala ebe na baputeja batako, babala na bacingami bande bo, Iyo ayakaka na baputeja batako na bato bagala ebe mojɔ moye?

¹⁷ Aka Yesu mojɔ momina, abala na bu bo, Bato banjilake babwaniti na monganga, oko baya bapekaka. Mbi nadoiti a bobea bato babodongo, nadoi oko a bobea bato babe.

¹⁸ Bacingami baYoane na BaPalusi badaka na bikia. Bato badoa ai Yesu na babala na nde bo, Bacingami baYoane na bacingami baBaPalusi badi na bikia. Bacingami bawɛ ko te bakiake mojɔ moye?

¹⁹ Yesu abala na bu bo, Bato badi bokia mia a lihango yana adi bo a dɔngɔ dimomi obolongana? Babwaniti bokia nongo eka yana adi momi obolongana a tei ebu.

²⁰ Endele ko, momi obolongana adi bobakina a masu mangɔngɔ. Badi bokia a busa bomina.

²¹ Pɛpɛ nongo moto obambaka kasaka eyou na ebolo eyene. Akakɔ boa, ebolo eyene edi bodonga, na edi bohɛjɛ lipose oko bohɛjɛ.

²² Pɛpɛ nongo moto olumejaka bikutu biyou na vino eyene. Akakɔ boa, vino eyene edi bobatoja bikutu. Vino edi bonama, na bikutu pongono. Vino eyene ebwani oko na bikutu biyene.

Mojɔ moSabata

²³ Yesu alena njea egbie jilɔsɔ bokina busa boSabata. Yana adalaka bo a njea, bacingami bande babanga botwa jikina ngbɛlɛnga jilɔsɔ.

²⁴ BaPalusi ko babala na nde bo, Anja; ibo bakɔkɔ boa, na basopaka mobeko moSabata mojɔ moye?

²⁵ Yesu abasɔmbeja bo, Ino olangakinini mojɔ mokɔ Dawidi? Yana adaka yo na nja na taka, yo mɛnɛ na bato bande,

²⁶ akwea a ndako eNjambe a ehole edaka Abiatale nganga otempelo; ayaka milɛmbɛ mimokako na amikaba na bato baya badaka na nde, oko milɛmbɛ mia mihɛngɛmɛ ai nganga pɛ.

²⁷ Yesu abala na bu bo, Busa boSabata bodi a mojɔ mobato; bato ko baikɔɔmɔ a mojɔ moSabata.

²⁸ Oko boa, Mwana ’Moto adi Kumu oSabata.