Luka 9 - Nouveau Testament en Ngombe 1961

Yesu Aloma Domi-na-Babae a Blomu

¹ Yesu abolea bacingami bande domi-na-babae. Abapa ngulu na kpaci a bodumba miembo mibe, na a boheleja bato a bego.

² Abaloma a botɔndɔ mwako moBokumu boNjambe, na a bosengoa babego.

³ Abala na bu bo, T’otombeni oko leka a mojɔ momɔngɔ monu; pɛpɛ nongo pango, isa litɔngi, isa molɛmbɛ, isa likonja, na pɛ botombani kasaka jibae.

⁴ Okakweani a ekina ndako, yeyoani a ndako emina oko a ehole enu ebodonga.

⁵ Bato bamiti sɔ no bopele a ekina ngando, okadongani a ngando emina, toma hakoani dutu libibota bmu, o eleho ai bo.

⁶ Oko boa bakɛ bakatɔndɔe Mwako Mopele a ngando na ngando, na basengoa babego a bisika bisusu.

⁷ Yana aka kumu Elode mwako mongando jisusu jikɔkɔ Yesu, adaka na mokakwano. Mojɔ bo bakina babalaka bo Yoane adaka koko mɔ.

⁸ Batongo babalaka bo Elia ahula; na batongo koko babalaka bo okina motɔndɔi oehelehele angɔ a bogwa.

⁹ Elode abala bo, Mbi natɛndɔ Yoane molo; ngando ko jikaka mbi a mojɔ momoto omina,—iyo ndani? Oko boa adaka na posa bo amonɛe.

Yesu Ayakeja Bato Koto Jitano

¹⁰ Yana ahula babwɛnji, batɔndɔ Yesu ngando jima bo kɔ. Iyo ababea bo bakɛe na nde a esika ebowi a dɔngɔ dingando, kombe Betesaida.

¹¹ Bato ko, aka bo mojɔ momina, bamokimana oho. Iyoaba’sɔ bopele, abala na bu a mojɔ moBokumu boNjambe, na aheleja bato baya badaka na bego.

¹² Abenga busa bodipa, bacingami domi-na-babae badoa, babala na nde bo, Yaneja bato edɛye bo bakɛe a ngando jia jibati na su, na a ngando jibato bagbie, a mojɔ mobohwɛ, na a boduka leka loboyaka; mojɔ bo esika ye edi so edi oko ngasa.

¹³ Iyo abala na bu bo, Bapani leka Ioboyaka no bɛnɛ. Ibo basɔmbeja bo, Iso bodi oko na milɛmbɛ mitano pɛ, na swi babae,—bomiti kɛ a bosomba mia a mojɔ mobato ba basusu.

¹⁴ Mojɔ bo bato badaka koto jitano na dea. Yesu abala na bacingami bande bo, Dejani bato nase mongbanga-mongbanga, bato domi-itano domi-itano.

¹⁵ Ibo bakɔ boa, na badeja bato basusu nase.

¹⁶ Yesu atomba milɛmbɛ mitano na swi babae; akahoa miso diko, ajongoa milɛmbɛ na swi, amibuka, na amipa ai bacingami bo bamikabe na bato.

¹⁷ Ibo bayaka kanga basusu, ligola mɛnɛ. Bandoa koko bikenge bia bidika, sanga domi-na-jibae botɔ.

Mojimo moPɛtɛlo

¹⁸ Yana adaka Yesu a bonga yo buki, bacingami badaka na nde hulelu. Iyo abahɔjɔ bo, Bato babalaka bo mbi nadi nda?

¹⁹ Bamo-sɔmbeja bo, Yoane Mobatisi; bakina batongo ko babalaka bo odi Elia, na bakina batongo koko babalaka bo okina motɔndɔi oehelehele ahuli.

²⁰ Ahahɔjɔ koko ho, Ino bɛnɛ ko obalakani bo mbi nadi nda? Pɛtɛlo amosɔmbeja bo, Masiya oNjambe.

²¹ Iyo ko abaleha na bopipo, na abalemba bo batatɔndɔ nongo moto mojɔ momina.

²² Abala bo, Mwana ’Moto adi bodingoa bou mɛnɛ. Basuku, na basuku banganga, na basɔni, badi bomodumba na bâmowa, na ângɔ koko a busa bomasato.

Mojɔ Mobosusa Yesu

²³ Abala na bu basusu bo, Isa okina moto apalaka bosusa mbi, yɛ apete salona yo mɛnɛ, atombe mole-mobokea monde tu busa bo asuse mbi.

²⁴ Mojɔ bo, moto na moto yona opalaka bobanea mohelo monde, âmonameja oko bonameja. Moto ko yona onamejaka mohelo monde a mojɔ mombi, âmoheleja.

²⁵ Mojɔ bo, moto akakonja ngondo esusu mɛnɛ, na akanameja mohelo monde, isa akasabungeja, adi bobɔngɔ na ye?

²⁶ Isa moto a’kaka sɔni a mojɔ mombi na bibaeli bimbi, Mwana ’Moto âmokea sɔni yana âdoa yo a ekumu ende na ekumu eSango na babwɛnji basɛnɔke.

²⁷ Mbi natɔndɔkɔ no na soti bo bakina badi ya mema baya bata’nɛ bogwa oko banɛkini Bokumu boNjambe.

Yesu Akindoa Elimo Etongo

²⁸ Bikenge bimina bisia, na yana anɔ masu bomwambe, Yesu abea Pɛtɛlo na Yoane na Yakobo, na akɛ na bu a mono a mojɔ mobo’nga.

²⁹ Yana angaka yo, boso bonde bokindoa elimo etongo; bisenja binde bipua bopɛɛ mɛnɛ, na bidaka na bolailai.

³⁰ Bato bami babae, oko Mose na Elia, badoa bundumo na basola na nde.

³¹ Ibo bamana a eyembi eekumu, na babala a mojɔ mobogwa bonde bokɛkɛ yo agwɛ a Yelusalema.

³² Pɛtɛlo ko na bacingami batongo baya badaka na nde, bangbɔngɔkɔ na hiɔ; endele ko, badika misu. Oko boa banɛ ekumu ende, na bami babae baya badaka na nde.

³³ Yana abɔtɔnɔkɔ bato bamina na Yesu, Pɛtɛlo abala na nde bo, Moswa’su, modi mojɔ mopele bo so bodae ya. Kina bopike maako masato, dikina a mojɔ mowɛ, ditongo a mojɔ moMose, na ditongo koko a mojɔ moElia,—cina bo aijeba mojɔ mobobala.

³⁴ Abalaka yo boa, eyembi etita na ebahua. Ibo badaka na bɔ yana akwea bo a eyembi.

³⁵ Na kɔpi emana a eyembi bo, Iyo adi Mwana’mbi. Mbi namobɔ; mohokeani.

³⁶ Yana abalaka kɔpi emina, Yesu adika yo buki pɛ. Bacingami babomba mojɔ momina. Baitɔndɔ nongo moto a masu mamina mojɔ monɛ bo.

Yesu Aheleja Mwana-Momi

³⁷ Batita a mono yana ahoa busa, na bato banɛnɛ badoa a bosongana na nde.

³⁸ Okina momi adaka a tei eemumu ebato, na yo abekoa bo, Mokoja, mbi nangɔɔnɔkɔ wɛ bo onje mwana’mbi momi; mwana’mbi omɔci oko yo.

³⁹ Mokina mwembo momopeaka, na agamaka bokpa. Mwembo momodumbaka gbu, na mapuli mamanaka a monɔkɔ monde; monaka na nde na bopipo mɛnɛ, na mokamana ai yo momokinaka na pola jinɛnɛ.

⁴⁰ Nangɔɔnɔki bacingami bawɛ bo bamejae mwembo, bo ko pɛ bohɔnɔ.

⁴¹ Yesu asɔmbeja bo, Elulu epɛndɔ na libwano! enina ôda mbi na nu? nâhɔnɔ mijɔ minu ekoka o bo? Doa na mwana ’wɛ jɔno.

⁴² Yana adoaka yo, mwembo mobe momodumba na momolulumeja. Yesu ko alemoa na mwembo mobe, aheleja mwa’momi na amosɔmbeja ai sangwa’nde.

⁴³ Bato basusu bakamoa a mojɔ mongulu enɛnɛ eNjambe. Adaka bo basusu na bokamoa a mojɔ mongando jisusu jikɔkɔ Yesu, yo abala na bacingami bande bo,

Mojɔ Mobogwa na Bongɔ boYesu a Bogwa

⁴⁴ Hokeani bopele bikenge bimina, mojɔ bo Mwana ’Moto adi bokabama a mɔmɔ mabato.

⁴⁵ Bacingami ko baicingea ekenge emina; cina emina ebombama ai ’bo, bo batacingea; na baimohɔjɔ cina emina a mojɔ mobɔ.

⁴⁶ Bacingami babanga bobomana kitɛ a mojɔ momoto yona odaka na bosuku a tei ebu.

⁴⁷ Yana anɛ Yesu cina emojɔ mobomaka na bu kitɛ a milema mibu, atomba mwana mokɛkɛlɛkɛ, amodeja a dɔngɔ dinde,

⁴⁸ na abala na bu bo, Yona osɔkɔ mwana yoyo mokɛkɛlɛkɛ a kombe embi, asɔkɔ mbi mɛnɛ; na yona osɔkɔ mbi asɔkɔ yona olomani. Mojɔ bo yona odi ngɔngɔ jinu basusu, odi ng bosuku oko yo.

⁴⁹ Yoane amosɔmbeja bo, Moswa ’su, iso boni okina moto akadumbe miembo mibe a kombe ewɛ, na bomolembi, mojɔ bo atacingamaka na su.

⁵⁰ Yesu abala na nde bo, T’omolembeni oko; mojɔ bo isa moto aditi na su soki adi a dɔngɔ disu.

Njea eYelusalema

⁵¹ Yana abatama ehole ende ebodonga a ngondo, Yesu anda ngapa bo akɛe a Yelusalema, na asueja bato boso na bwɛnji.

⁵² Ibo bakɛ, na bamea a ekina ngando eBaSamalia bo basɛlingoe esika a mojɔ monde.

⁵³ Bato ko baipala bo bamo’sɛ, mojɔ bo boso bonde bonjaka oko njea eYelusalema.

⁵⁴ Yana anɛ bacingami bande Yakobo na Yoane mojɔ momina, babala bo, Kumu, opalaka bo bobee mosa mohule Diko a botumba bato bamina?

⁵⁵ Iyo ko ahekoa na alemoa na bu.

⁵⁶ Oko boa bakɛ a ekina ngando etongo.

⁵⁷ Amaka bo dala a njea, okina momi ami bala oko na nde bo, Mbi nadi bosusa wɛ a bisika bisusu hikɛkɛ wɛ.

⁵⁸ Yesu amosɔmbeja bo, Kpia badi na mikpo; mbulu badiko badi na mobo; Mwana ’Moto ko apeliti esika a bosuka molo monde.

⁵⁹ Abala na moto otongo bo, Gingama na mbi. Iyo ko asɔmbeja bo, Kumu, kinani napete kɛ a bopusea sangwa’mbi.

⁶⁰ Yesu abala na nde bo, Kina bagwake bapusee bagwake babu bɛnɛ. Wɛ ko, kɛ ananganejae mwako moBokumu boNjambe.

⁶¹ Okina otongo koko abala na Yesu bo, Kumu, mbi nadi bosusa wɛ; kinani ko napete kɛ a ndako embi bo naseane na bato bambi.

⁶² Yesu abala na nde bo, Moto yona obanga bolia gbie akangwa, atabɔngɔ na Bokumu boNjambe.