Luka 7 - Nouveau Testament en Ngombe 1961

Yesu Aheleja Mobuli oKapitɛni

¹ Yana asieja Yesu bobala mijɔ minde misusu na bato baya bamohokeaka, akɛ a Kapalanauma.

² Okina kapitɛni obasoda adaka na mobuli, na amopalaka bou. Iyo apekaka, na yogo ende egbasoa.

³ Kapitɛni, ama yo ka mojɔ moYesu, ami loma oko bakina basuku baBaYuda ai yo na bo’nga bo adoe a boheleja mobuli onde.

⁴ Amea bo ai Yesu, bamongɔɔnɔ na bopipo, na babala bo, Obwani bokɔ mojɔ mu ai yo, mojɔ bo adi moto mobɔngɔke.

⁵ Adi na epaeli ai bato basu, na ayoa sinagoge a mojɔ mosu.

⁶ Yesu akɛ na bu; abatama yo ko na ndako, kapitɛni amolomea monɔkɔ na bina ’nde bo, Kumu, yɛ bosanɔngeja; mbi nitabɔngɔ bo nasɛ wɛ a ndako embi.

⁷ Mbi nakɛiti ai wɛ mbi mɛnɛ, mojɔ bo nalɛki bo nabɔngiti. Bala oko ekenge emɔci pɛ, na mobuli ombi âhela.

⁸ Mbi mɛnɛ nasumaka baya badi boso bombi. Nadi koko na basoda ngɔngɔ jimbi. Nakabala na okina bo akɛe, adi bokɛ. Nakabala na otongo bo adoe, adi bodoa. Nakabala na mobuli ombi bo akɔe ekina elomu, adi bokɔ.

⁹ Yesu akamoa bou a mojɔ mokapitɛni yana aka yo bikenge bimna. Ahekoa, na abala na bato baya badaka bacingi na nde engbanga bo, Mbi natɔndɔkɔ no na soti bo napakiti nɛ ejimeli enɛnɛ boa, nongo a Yisalaele mɛnɛ.

¹⁰ Baya badoa na bwɛnji basɔmbɔ a ndako, na banɛ bo mobuli ama hela a yogo ende.

Yesu Angɔjɔ Moto oNaina

¹¹ Yana ahoa busa, Yesu akɛ a ekina ngando kombe Naina. Bacingami bande bakɛ na nde, na bato batongo banɛnɛ pongono.

¹² Yana abatama yo na toolo engando, bato bamana baya batombaka okina momi yona oma gwa. Ngwa’nde adaka mwali-obogwa na adaka namwana yona omɔci pɛ. Bato bangando banɛnɛ badaka bacingi na nde.

¹³ Kumu, yana anɛ yo mwali omina, amokea wa. Abala na nde bo, Yɛ boyea!

¹⁴ Abatama na ekinda, abakea ebɔ ai yo, na baya baetombaka ba’ma. Yesu abala bo, Mwamomi, mbi natɔndɔkɔ wɛ; angɔ!

¹⁵ Yona mogo angɔ oko bongɔ, abanga bobala kɔpi, na Yesu amopa ai ngwa’nde.

¹⁶ Bato basusu bagasima, bɔ bonɛnɛ. Basakoa Njambe, na babala bo, Motɔndɔi monɛnɛ angɔi a tei esu! Njambe adoi a bonja bato bande.

¹⁷ Batɔndɔ mojɔ mu a ngando jisusu jiYuda, na gala ende enangana a makota matongo a mojɔ momina.

Lihɔjɔ liYoane

¹⁸ Bacingami baYoane bamojebeja ngando ji jisusu.

¹⁹ Oko boa, Yoane abea bacingami bande babae, na abaloma na lihɔjɔ ai Yesu bo, Edi wɛ yona odaka na sako ebodoa, isa bombe okina otongo?

²⁰ Amea bo ai Yesu, babala na nde bo, Yoane Mobatisi alomi so ai wɛ na lihɔjɔ di; Edi wɛ yona odaka na sako ebodoa, isa bombe okina otongo?

²¹ A ehole emina, Yesu ahelejaka bato banɛnɛ a bego, na bipeko, na miembo mibe; adipoaka koko miso mabato banɛnɛ baya bagwa miso.

²² Iyo abasɔmbeja bo, Kɛni atɔndɔe Yoane mijɔ mini no na mijɔ miki no. Baya bagwa misɔ basɔkɔ njɛnɛ; bato bamitɛngu badalaka; bato bamaba bahelaka; bato babohoka badi na njoki; bagwake basɔkɔ bomɔ; bato babokwali bakaka Mwako Mopele.

²³ Isa mbi naditi libaku a njea emoto, moto omina âda na sepi.

²⁴ Ayana bato baloma Yoane na bwɛnji, Yesu abanga bobala na emumu ebato a mojɔ moYoane. Abala bo, Ino okɛkɛni oho a lisobe a bonja ndeni? mongongo mokakumane na pwea?

²⁵ Ee, okɛkɛni oho a honja ndeni? moto yona olwaka bisenja biyɛmbuyɛmbu? Ikani, baya balwaka bisenja bibobuno na bibomwenga, na bayakaka oko leka lopele pɛ, badi oko a ndako jibakumu.

²⁶ Okɛkɛni oho a bonja ndeni? isa Motɔndɔi? Ee, mbi natɔndɔkɔ no bo, Na yo na motɔndɔi, yo anɔi bou mɛnɛ.

²⁷ Ekenge ye esɔnɔmɔ a Misɔnɔ oko a mojɔ monde bo, Anjani, mbi nalomaka obwɛnji ombi a boso bowɛ; Iyo âsɛimgoa njea ewɛ boso bowɛ.

²⁸ Mbi natɔndɔkɔ no bo pɛpɛ nongo moto yona obotama na mwali onɔi Yoane; endele ko, yona odi moto osuka a Bokumu boDiko adi boso boude.

²⁹ Bato basusu baya baka mojɔ momina, ee, na baputeja batako pongono, bakumeja Njambe, mojɔ bo bama batisama na batisimo eYoane.

³⁰ BaPalusi ko, na bakoja baMibeko, balona mokano moNjambe a mojɔ mobu, na baibatisama na Yoane.

³¹ Yesu abala bo, Mbi nadi bongɛ bato baelulu ye na ye? Bâdi o bo?

³² Badi oko na ekɔmɛli ebɛngɛ baya badi a ndanda engando, na bakina babu babalanaka na batongo bo, Iso bobomi ebumba a mojɔ monu, ino ko pɛ bobua; abomi so lingondo, no pɛ boyea.

³³ Mojɔ bo Yoane Mobatisi adoi, pɛ boyaka molɛmbɛ, pɛ bomwaka vino, na obalakani bo adi na mwembo mobe.

³⁴ Mwana ’Moto adoi, akayake na akamwake, na obalakani bo, Anjani mogbuko na molangoi, monengi mobaputeja batako na bato babe!

³⁵ Bowɛi bodi bolonga oko na bana babowɛi.

Mwali Asuoa Yesu Malasi

³⁶ MoPalusi omɔci abea Yesu bo ayake na nde. Yesu akwea a ndako eMoPalusi omina na ada a mesa.

³⁷ Okina mwali ongando emina, mwali ogala ebe, aka bo Yesu adaka a mesa a ndako eMoPalusi. Oko boa yo adoa na molangi moalabasata mua modaka na malasi botɔ.

³⁸ Ama a ngɔngɔ jiYesu, oko a bibota binde. Ayeaka bio, na mbisoli jinde jitanga a diko dibibota biYesu, na abihakoa na swe jimolo monde. Ahia bibota binde na abisuoa malasi.

³⁹ Iyo MoPalusi ko yona obea Yesu a boyaka, yana anɛ yo mojɔ momina, alɛ a molema monde bo, Moto yo, akɔki yo da motɔndɔi soti, ka ajebi mwali omina yona omobɛnjɛkɛ na mɔmɔ, na ajebi koko ekɔmɛli ende, mojɔ bo adi moto mobe.

⁴⁰ Yesu ko amosɔmbeja, abala na nde bo, Simona, mbi nadi na mokina mojɔ a bobala na wɛ. Iyo ajɔ bo, Mokoja, bala ke.

⁴¹ Yesu abala bo, Bato babae babeka likonja ai moto, okina obu, pata mikama mitano, yona otongo pata domi-itano.

⁴² Ibo ko baidaka na likonja a bosieja nongo, na yo abakinea oko bokinea. Obu babae, odi bonɔ na epaeli ai moto omina nda?

⁴³ Simona asɔmbeja bo, Yona olɛkɛ mbi, oko yona odaka na nongo enɛnɛ na amokinea. Yesu abala na nde bo, Olongi.

⁴⁴ Ahekoa ai mwali, na ahala na Simona bo, Onɛkɛ mwali yoyo? Akwei mbi a ndako ewɛ, opiti mbi madiba a mojɔ mobibota bimbi. Iyo ko atangejai mbisoli jinde a bibota bimbi, na abihakoi na swe jinde.

⁴⁵ Wɛ pɛ bohia mbi nongo; akwei mbi ya ko, yo akiniti bibota bimbi bohia.

⁴⁶ Wɛ osuoiti molo mombi sali. Iyo ko asuoi bibota bimbi malasi.

⁴⁷ A mojɔ momina, mbi natɔndɔkɔ wɛ bo jibe jinde jia jidi jinɛnɛ, jikinami, mojɔ bo adi na epaeli enɛnɛ. Moto ko akasɔ boyɛ bokɛkɛ, adi oko na epaeli ekɛkɛ.

⁴⁸ Yesu abala na mwali bo, Jibe jiwɛ jikinami.

⁴⁹ Baya badaka na nde a mesa babanga bobalana bo, Iyo moto ndani yona okinaka jibe?

⁵⁰ Yesu ko abala na mwali bo, Ejimeli ewɛ ehelejai wɛ; yana na bowi.