Luka 6 - Nouveau Testament en Ngombe 1961

MoJɔ moSabata

¹ Bokina busa boSabata, Yesu alena njea egbie jilɔsɔ. Bacingami bande batwa jikina ngbɛlɛnga jilɔsɔ, baji’bɔ na mɔmɔ, na bayaka.

² Bakina BaPalusi babala na bu bo, Ino okɔkɔni boa mojɔ moye? Osopakani mobeko moSabata.

³ Yesu abasɔmbeja bo, Ino olangakinini mojɔ mokɔ Dawidi yana akaka yo nja, yo mɛnɛ na bato baya badaka na nde?

⁴ Iyo akwea a ndako eNjambe, atomba milɛmbɛ mimokako mia mihɛngɛmɛ oko ai nganga pɛ. Ayaka milɛmbɛ mimina, na amikaba na bato baya badaka na nde.

⁵ Yesu abala na bu bo, Mwana ’Moto adi Kumu oSabata.

Yesu Aheleja Moto na Ebɔ Endɔke

⁶ Yesu akwea a smagoge, na akoja bato bokina busa boSabata. Momi omɔci adaka ena, yona odaka na ebɔ endɔke.

⁷ Basɔni na BaPalusi bamonja na bopipo, a bonɛ isa adi bosengoa a busa boSabata, bo bamodumbe na mojɔ momina.

⁸ Yesu ko ajeba bilɛli bibu, na abala na moto yona odaka na ebɔ endɔke bo, Angɔ; ima ya a ndanda. Iyo angɔ na ama mema.

⁹ Yesu abala na bato bamina bo, Mbi nahɔjɔkɔ no mojɔ; Njea eMibeko edi bo? Bobwani bokɔ bopele isa bobe, bobwani boheleja isa bowa, a busa boSabata?

¹⁰ Abanja basusu a dɔngɔ na dɔngɔ, na abala na moto omina bo, Ninoja ebɔ ewɛ. Iyo akɔ boa, na ebɔ ende eninoa oko boninoa.

¹¹ Bato bamina ko bakɛnjɔ kɛnjɔ enɛnɛ, na babalana a boduka njea a bodumba Yesu.

Yesu Ahɔ Bacingami Domi-na-Babae

¹² Yesu akɛ bokina busa a mono a mojɔ mobo’nga, na ayeyoa na bulu bosusu oka a bonga Njambe.

¹³ Yana ahoa busa, abolea bacingami bande. Ahɔ domi-na-babae a tei ebu, na ababakea kombe babwɛnji.

¹⁴ Simona (amobakea koko kombe Pɛtɛlo), mwangwa ’nde Andalea, Yakobo na Yoane,

¹⁵ Pilipo na Balatelemi, Matayo na Toma, Yakobo mwana oAlapayo, na Simona yona odaka na kombe Selote;

¹⁶ Yuda mwana oYakobo, na Yuda Iskalio yona omokaba.

¹⁷ Yesu atita na bu a mono, na ama a molaba. Bacingami bande banɛnɛ badaka na nde. Bato banɛnɛ batongo batitana ai yo bo bamoke, na bo bahele a bego bibu, bato bangando jisusu jiYuda na Yelusalema, na bato baTula na Sidona a dɔngɔ dimadiba-mamukwa.

¹⁸ Bato baya badingoaka a mojɔ momiembo mibe bahela pongono.

¹⁹ Bato basusu baemumu bakenga bomobɛnjɛ na momɔ, mojɔ bo ekina ngulu emanaka ai yo na ebaheleja basusu.

Yesu Akoja Bato

²⁰ Yesu anja bacingami bande, na abala bo, Bojongoa ai no bato babokwali, mojɔ bo Bokumu boNjambe bodi ai no.

²¹ Bojongoa ai no baya badi na nja edɛye, mojɔ bo ôgolani. Bojongoa ai no baya bayeaka bio edɛye, mojɔ bo ôsepani.

²² Bato bakalona no, bakabengana no, bakanɔngeja no, na baka-Pɔmbeja kombe enu a mojɔ moMwana ’Moto,—bojongoa ai no.

²³ Sepani a busa bomina; pimboani na enanga; ndese enu êda enɛnɛ oho Diko, mojɔ bo basangwa ’bu bakɔ koko boa na batɔndɔi.

²⁴ Bodingoa ko ai no konji; ino osini ndese enu.

²⁵ Bodingoa ai no baya badi na ligola edɛye; ino ôyeani bio na mbisoli.

²⁶ Bocingoa ai no yana asakoaka bato basusu no, mojɔ bo basangwa ’bu bakɔ koko boa na batɔndɔi babokosea.

²⁷ Mbi ko natɔndɔkɔ no baya ba’kaka mbi bo, Palakani soki jinu; kɔkɔni bopele ai baya balonaka no.

²⁸ Jongoakani baya balakejaka no; ingakani a mojɔ mobato baya banɔngejaka no.

²⁹ Moto akabimboa wɛ a mobanga momɔci, mohekoja yo mobanga motongo. Moto akakatoa kasaka ewɛ, t’ojume oko yo simisi ewɛ pongono.

³⁰ Moto na moto yona ongaka wɛ eka, mopa yo; na moto akatomba leka lowɛ, t’obee bko leka lomina.

³¹ Kɔni ai bato batongo o apalaka no bo bakɔe ai no.

³² Isa odini na epaeli oko ai bato baya badi na epaeli ai no, obwanini bosɔ ndese a mojɔ momina? Nongo bato babe bakɔkɔ boa pongono ai baya badi na epaeli ai bo.

³³ Okakɔni bopele oko ai bato baya bakɔkɔ bopele ai no, obwanini bosɔ ndese a mojɔ momina? Nongo bato babe bakɔkɔ boa.

³⁴ Okabekejani mbeka oko ai baya badi bosɔmbeja koko ai no, bopele bodi jɔ? Nongo bato babe babɔjɔnɔkɔ njabo bo bajisɛ koko.

³⁵ Ino ko, toma dani na epaeli ai soki jinu; kɔkɔni bopele; bekejani na t’odaeni oko na tɛndɛ ebosɔ koko, na ndese enu êda enɛnɛ, na ôdani bana baYona oBonɔ; mojɔ bo yo akɔkɔ monganji ai baya badi na lima, na ai bato babe.

³⁶ Ikeani bato wa o adi Sangwa’nu na wa.

³⁷ T’osambejaeni oko, na ôtasambani; t’odumbeni oko na ôtadumbamani; kinani jibe, na bâkina jibe jinu.

³⁸ Dani na likabo, na bâda na likabo ai no; bâhangoja libondo lipele a esei ewɛ; bâedɛhɛ na bâepukusa bo edae botɔ mɛnɛ; mojɔ bo bâ’ngɛ libondo liwɛ oko na mwɛngi mongɛkɛ na wɛ mɛnɛ.

³⁹ Abala na bu mondɛ bo, Moto yona ogwa miso abwani bopaka moto otongo yona ogwa miso bo amonejae njea? Ibo basusu babae batakwa a libɛngɛ?

⁴⁰ Moto yona okoaka adi ngɔngɔ jimokoja onde; akabɔngɔ ko na bokoa bonde, adi bobwana na mokoja onde.

⁴¹ Onjaka mobumbu a diso limwangwao, pɛ bonɛ epaso yena edi a diso liwɛ mɛnɛ mojɔ moye?

⁴² Obwani bobala na mwangwao bo, Mwangwa ’mbi, yɛ nahwɛ mobumbu mua modi a diso liwɛ, ena ko wɛ pɛ bonɛ nongo epaso yena edi a diso liwɛ mɛnɛ? Mokosei, peta hwa epaso a diso liwɛ mɛnɛ; oko boa odi bonɛ bohu a bohwa mobumbu a diso limwangwao.

⁴³ Mole mopele te mobotake mbuma jibe, na mole mobe te mobotake mbuma jipele.

⁴⁴ Odi bombetea mole oko na mbuma jimole momina. Te batwake mbunga a bolongo, na mamwe a likpanda.

⁴⁵ Moto mopele adi na ekɔmɛli epele mojɔ bo amejaka ngando jipele a molema monde; na moto mobe adi na ekɔmɛli ebe, mojɔ boamejaka ngando jibe a molema monde. Mojɔ bo monɔkɔ momejaka oko ngando jia jinɛngi a molema.

⁴⁶ Obeakani mbi Kumu, Kumu, mojɔ moye, pɛ ko bokɔ ngando jitɔndɔkɔ mbi no?

⁴⁷ Mbi nadi boneja no elimo emoto yona odoaka ai mbi na okɔkɔ ngando ji’kaka yo na mbi.

⁴⁸ Adi o moto yona opika ndako; alonga mombɔndɔ na ndinda, na ayoa eyoeli ecina a diko dilitai. Yana apetoa pela, mopimbola molakimea ndako emina, na moibwana boebuka, mojɔ bo edaka embilimake.

⁴⁹ Moto ko aka’ka pɛ nongo bokɔ, yo adi o moto yona opika ndako a diko dikpɔtɔ, te nongo a diko dilitai. Mopimbola molakimea ndako emina, na ekwa bokpa mɛnɛ. Ndako emina ebeha esusu, mojɔ monɛnɛ.