Luka 5 - Nouveau Testament en Ngombe 1961

Eweeli Eswi Enɛnɛ

¹ Yana adaka Yesu a mbongu elibale liGenesaleta, bato banɛnɛ bamohika a boka mwako moNjambe.

² Iyo anɛ mato mabae masɛmi a mbongu; badukeli ko baidaka a mato, mojɔ bo basosaka biyoma bibu.

³ Atamba a bwato bomɔci, oko bwato boSimona, na amonga bo asɛngojae bwato bosine. Ada na mobondo a bwato, na akoja bato boa.

⁴ Asieja yo mwako botɔndɔ, abala na Simona bo, Sɛngoja bwato oho a boliko, na dumba bikoto binu a mojɔ moboduka swi.

⁵ Simona amosɔmbeja bo, Moswa’mbi, so bodukaki na bulu bosusu oko na edukea pɛ; pɛ mojɔ, mbi nadi bodumba bikoto a mojɔ moekenge ewɛ.

⁶ Akɔ bo boa, bawa swi kanga banɛnɛ mɛnɛ. Bikoto bibu bibanga botweana

⁷ na babea bina’bu baya badaka a bwato botongo, bo badoe a bokɔmeja. Adoa bo, balumeja mato mabae botɔ na mapaka dinda.

⁸ Simona Pɛtɛlo, yana anɛ yo mojɔ momina, akwa nase a boso boYesu; abala bo, Kumu, pɛ bobatama na mbi, mojɔ bo nadi moto mobe.

⁹ Iyo adaka na bɔ mɛnɛ a mojɔ moeweeli ebu eswi, na bo basusu baya badaka na nde,

¹⁰ na Yakobo na Yoane pongono, bana baSebede baya badaka na Simonaa elomu. Yesu abala na Simona bo, Yɛ bobanga; banga na busa bu, ôda modukeli obato.

¹¹ Ama bo sɛmeja mato mabu, ba’mi kina oko leka losusu na bacingama na nde.

Moto Omaba Ahela

¹² Adaka Yesu a ekina ngando, okina moto yona odaka na maba botɔ adoa ai yo, asadumba nase, boso bonde oko a kpɔtɔ, na amongɔɔnɔ bo, Kumu, wɛ okapala, obwani boheleja mbi.

¹³ Yesu aninoja ebɔ, amobɛnjɛ, abala na nde bo, Najimi; hela oko bohela; na maba mande masia oko bosia.

¹⁴ Yesu amoleha na bopipo bo atatɔndɔ nongo moto. Abala bo, Kɛ asanejae ai nganga; pa epeeli ebekea Mose a mojɔ mobohela bowɛ, bo bato bajebe.

¹⁵ Gala ende ehɛ oko bohɛ, na ekɛ hohali. Bato hadoa banɛnɛ mɛnɛ a bomoka, na bo abahelejae a bego bibu.

¹⁶ Iyo ko adonga ena, na akɛ a lisobe yo buki pɛ a mojɔ mobo’nga.

Moto oMokɔbɛlɛ Ahela

¹⁷ Yana akojaka Yesu bokina busa, BaPalusi na nganga baMibeko badaka ena. Ibo bama donga a ngando jisusu jiGalile na Yuda na Yelusalema. Ngulu eKumu edaka na nde a mojɔ mobosengoa.

¹⁸ A ehole emina, bakina bami badoa na moto omokɔbɛlɛ. Bamotombaka a litɔkɔ, na bakenga bokwea na nde a tei, bo bamosambee a boso boYesu.

¹⁹ Bainɛ ko nongo pokiso a bokwea a tei, a mojɔ moembamba ebato. Oko boa, bawea diko dindako na bamosoloja a esambe ende a njea eetondo, a ndanda ebato na a boso boYesu.

²⁰ Yana anɛ Yesu ejimeli ebu, abala bo, Momi, jibe jiwɛ jikinami.

²¹ Basɔni na BaPalusi ko babanga bobomana kitɛ; babala bo, Iyo moto ndani yona obalaka mijɔ mibosambolu? Odi bokina jibe nda, te Njambe pɛ?

²² Yesu acingea bilɛli bibu, na abasɔmbeja bo, Odini na bilɛli bimina a milema minu mojɔ moye?

²³ Mojɔ monɔi na bopipo nda?—bobala bo, Jibe jiwɛ jikinami, isa bobala bo, Angɔ, dala?

²⁴ Ino ko odini bojeba bo Mwana ’Moto adi na kpaci ya nase a bokina jibe;—oko boa abala na moto omokɔbɛlɛ bo, Mbi natɔndɔkɔ wɛ; angɔ, tomba litɔkɔ liwɛ, kɛ a ndako ewɛ.

²⁵ Iyo angɔ bokpa a boso bobu, atomba litɔkɔ linde, na akɛ a ndako ende oko na bosakoa ai Njambe.

²⁶ Bato basusu bakamoa bou mɛnɛ. Bakumeja Njambe, na badaka koko na bɔ a milema. Babala bo, Iso boni mijɔ mibokamoa busa bu.

Yesu Abea Lewi

²⁷ Amana Yesu ngɔngɔ, atana okina moputeja otako, kombe ende Lewi, yona odaka a bilo etako. Yesu abala na nde bo, Gingama na mbi.

²⁸ Iyo akina leka losusu, angɔ, na acingama na Yesu.

²⁹ Lewi asɛlingoa libonje linɛnɛ a ndako ende. Bato banɛnɛ badaka na bu a mesa, baputeja batako, na bato batongo pongono.

³⁰ BaPalusi na basɔni ko babala na bacingami baYesu oko na manungunungu bo, Ino oyakakani na omwakakani na baputeja batako na bato babe mojɔ moye?

³¹ Yesu abasɔmbeja bo, Babwani na monganga oko baya bapekaka, te baya badi banjilake.

³² Mbi nadoiti a bobea bato babodongo bo bahekojae milema; nadoi a bobea oko bato babe.

³³ Ibo babala na nde bo, Bacingami baYoane bakiaka mia bihole binɛnɛ, na bakɛkɛ a bonga. Bacingami baBaPalusi badi koko na ekɔmɛli emina. Bacingami bawɛ ko te bakiake mojɔ moye?

³⁴ Yesu abasɔmbeja bo, Momi obolongana akada na bina’nde a lihango, odingakani bo badi bokia mia?

³⁵ Momi obolongana ko adi bobɔtɔ na bu a masu mangɔngɔ, na badi bokia mia a masu mamina.

³⁶ Abatɔndɔ mondɛ mu pongono. Moto t’alake eyale ekasaka eyene bo abambe na kasaka eyou. Akakɔ boa, adi bobeja kasaka eyene; na ebolo eyene, na kasaka eyou bisangiti.

³⁷ Moto t’ahangojake vino eyene ta bikutu bibiobo biyou. Akakɔ boa, vino eyene edi bobatoja bikutu bibiobo, na êsopea; bikutu bibiobo binama pongono.

³⁸ Vino eyene ebwani oko na bikutu bibiobo biyene.

³⁹ Isa moto amwaki vino eyou, atapala vino eyene. Adi bobala bo, Yena eyou enɔi na bopele.