Luka 4 - Nouveau Testament en Ngombe 1961

Bomeka boYesu

¹ Yesu aluma na Mwembo Mosɛnɔke na ahula Yoladene. Mwembo momolindea a lisobe, na Satana amomeka oho masu domi-inɛi.

² Aiyaka nongo eka a masu mamina, na aka nja a suka eehole emina.

³ Satana abala na nde bo, Isa wɛ odi Mwana oNjambe, bala na litaidi bo libongoe molɛmbɛ.

⁴ Yesu amosɔmbeja bo, Mosɔnɔmɔ bo, Moto t’ahelake na molɛmbɛ pɛ.

⁵ Satana akɛ na nde diko, amoneja makumu masusu mangondo a ehole emɔci.

⁶ Abala na nde bo, Mbi nadi bopa wɛ kpaci emina esusu, na ekumu emakumu ma masusu; mojɔ bo madi oko ai mbi bo napɛ moto ojimaka mbi.

⁷ Oko boa, okatita na magbunda a boso bombi, mojɔ mosusu môda oko ai wɛ.

⁸ Yesu amosɔmbeja bo, Mosɔnɔmɔ bo, Toma sakoa Kumu Njambe owɛ; toma kɔmɛ oko yo pɛ.

⁹ Satana akɛ na nde a Yelusalema, amobakea diko dimonjongele motempelo, na abala na nde bo, Isa wɛ odi Mwana oNjambe, sadumba oho nase.

¹⁰ Mojɔ bo, mosɔnɔmɔ bo, Âpa babwɛnji bande mobeko bo babanee wɛ.

¹¹ Mosɔnɔmɔ koko bo, Bâbanda wɛ na mɔmɔ mabu, Bo ebota ewɛ esaka lakimea a litai.

¹² Yesu amosɔmbeja bo, Ebaeli edi bo, T’odingee oko Kumu, Njambe owɛ.

¹³ Yana amaja yo bomeka bosusu, Satana amokina bo ambe ekina ehole etongo.

Yesu a Nasaleta

¹⁴ Yesu adoa koko a Galile na ngulu eMwembo, na esakoli ende enangana a makota ma masusu.

¹⁵ Akojaka bato a sinagoge jibu, na bato basusu bamokumejaka.

¹⁶ Amea a Nasaleta, oko a ngando ema yo kandoa, na akwea a sinagoge a busa boSabata, mojɔ bo ekɔmɛli ende edaka boa. Angɔ bo alange mokanda,

¹⁷ na bamopa mokanda momotɔndɔi Yisaya. Adipoa yo mokanda, anɛ esika yena edi na mosɔnɔ bo,

¹⁸ Mwembo moKumu modi ai mbi, Gina bo ahɛngɛ mbi a botɔndɔ bato babokwali Mwako Mopele; Alomini bo najebejae masungu mojɔ mobocingoa, Bo natɔndɔe bato baya bagwa miso mojɔ mosengo emiso; Alomini bo nabuke minyɔlɔ mibato baya bagboki,

¹⁹ Na a botɔndɔ mojɔ moyanga emonganji moKumu.

²⁰ Adipa mokanda, amosɔmbeja ai mokoja, na akada. Ibo basusu baya badaka a sinagoge bamonja ngbe.

²¹ Iyo abanga bobatɔndɔ bo, Mosɔnɔ moki no mongami busa bu.

²² Ibo basusu bamosakoa, na bakamoa a mojɔ mobikenge bimonganji bibala yo. Babala bo, Iyo, te mwana ’Yosepa?

²³ Yesu abala na bu bo, Nadingaka bo odini bobala na mbi oko mondɛ mu, bo, Monganga, sesengoa wɛ mɛnɛ. Kɔ jɔno a likota liwɛ mɛnɛ, ngando jikaka so bo okɔi oho Kapalanauma.

²⁴ Abala na bu koko bo, Soti mɛnɛ, te basɔke nongo motɔndɔi a ngando ende mɛnɛ.

²⁵ Mbi natɔndɔkɔ no na soti bo, bali-babogwa badaka banɛnɛ a Yisalaele a masu maEha, yana adipama Diko bianga bisato na songe basamano, a ehole edaka linjale linɛnɛ a ngondo esusu.

²⁶ Elia ko ailomama ai okma obu. Alomama oko ai okina mwali-obogwa oSalepeta pɛ, a likota liSidona.

²⁷ Bato bamaba badaka koko banɛnɛ a Yisalaele a masu mamotɔndɔi Ehse. Pɛpɛ nongo omɔci obu ohela ko; yona ohela, oko Namana pɛ, moto oSilia.

²⁸ Yana aka ho bikenge bimina, bato basusu baya badaka a sinagoge bakɛnjɔ oko bokɛnjɔ.

²⁹ Bangɔ, bamobengana a ngando, na bakɛ na nde a diko dimono bo bamodumbe nase, mojɔ bo ngando ebu edaka a mono momina.

³⁰ Iyo ko anɔ a tei ebu, na ayana.

Yesu a Kapalanauma

³¹ Yesu akɛ a ekina ngando eGalile, kombe Kapalanauma. Yana akojaka yo bato a busa boSabata,

³² bakamoa a mojɔ mobokoja bonde, cina bo ebaeli ende edaka na kpaci.

³³ Okina momi adaka a sinagoge yona odaka na mwembo mobe, na yo abekoa bo,

³⁴ Wɛ, Yesu oNasaleta, mojɔ modukaka wɛ na su nda? Odoi jɔno a bowa so? Mbi najebaka wɛ. Odi Yona Mosɛnɔke oNjambe.

³⁵ Yesu alemoa na nde, na abala bo, Wɛ, da bogo; imana ai moto omina! Mwembo mobe modumba moto omina gbu a ndanda ebato, na momana ai yo pɛ bomobeneja nongo.

³⁶ Bato basusu babanga, bɔ mɛnɛ, na babalana bo, Gina eekenge emina edi bo? Iyo abekeaka miembo mibe na kpaci na ndangasa bo mimane, na mimanakadea.

³⁷ Na esako ende enangana a ngando jisusu jilikota limina.

³⁸ Amana Yesu a sinagoge, akɛ a ndako eSimona. Bokio boSimona adaka asambi na mɔlɔ, na ba’nga Yesu a mojɔ monde.

³⁹ Iyo ama a dɔngɔ dinde, alemoa na yogo, na esia oko bosia. Na mwali angɔ bokpa na abakɔmɛ.

⁴⁰ Basusu baya badaka na bato babego tungu na tungu, badoa na bu ai Yesu a ehole edipaka busa. Iyo abakea mɔmɔ mande ai bo, moto na moto, na abaheleja basusu.

⁴¹ Miembo mibe pongono mimana ai bato banɛnɛ na migboma bo, Wɛ odi Mwana oNjambe. Iyoko alemoa na miembo; aijima bo mibale, cina bo mijebaka bo adi Masiya.

⁴² Yana ahoa busa, amana na akɛ a ekina esika a lisobe. Bato banɛnɛ ko babanga bomoduka, na bamea oko ai yo. Bapala bo bamo-dipe njea bo atabakina.

⁴³ Iyo ko abala na bu bo, Ebɔngi bo natɔndɔe Mwako Mopele moBokumu boNjambe a ngando jitongo pongono. Mbi nalomami oko a mojɔ momina.

⁴⁴ Oko boa akɛ atɔndɔe Miako Mipele a sinagoge jiGalile.