Luka 3 - Nouveau Testament en Ngombe 1961

Blomu eYoane Mobatisi

¹ Ebaeli eNjambe edoa ai Yoane, mwana oSekalaya a esika, yana adaka Kaisala Tibelia kumu biango domi-na-bitano. Pontio Pilato adaka gouverneur oYuda a ehole emina; Elode adaka kumu oGalile; mwangwa’nde Pilipo adaka kumu oItulia na Tulakomte;

² Lusania adaka kumu oAhilene; Ana na Kayapa badaka basuku banganga.

³ Yoane akɛ adale a bisika bisusu a dɔngɔ diYoladene, a botɔndɔ mwako mobatisimo cina ebobekoja bomilema, bo bato basɛ boyɛ bojibe.

⁴ Mojɔ momina mosɔnɔmɔ boa a mokanda momotɔndɔi Yisaya bo, Kɔpi emoto yona obekoaka a lisobe bo, Sɛlingoani mokɛngɛ moKumu; Tangbojani njea jinde.

⁵ Mibukubɔngɔ misusu miluma; Meno minɛnɛnɛ na mikɛkɛlɛkɛ mîda yeyi; Makulu masusu mâtangboa; Njea jia jidi na bibubɔndɔ jitambuma,

⁶ Bato basusu bânɛ boheleja boNjambe.

⁷ Bato bakɛ ai Yoane banɛnɛ mɛnɛ bo ababatise. Iyo ko abala na bu bo, Ino bana banjɔ! Olehi no nda bo ocieni likundu lia likɛkɛ adoe?

⁸ Anejani bikɔmɛli a bongameja dosa linu. Yɛni bobala bo, Abalayama adi tata osu. Mbi natɔndɔkɔ no bo Njambe abwani botomba matai ma bo angɔjɔe bana ai Abalayama.

⁹ Epondo esambi edɛye a cina jimele. Mole mobotiti mbuma jipele môkwɛlɛmɛ, na môdumbama a mosa.

¹⁰ Bimumu bibato bamohɔjɔ bo, Êkɔ so ndeni?

¹¹ Iyo abasɔmbeja bo, Isa moto adi na simisi jibae abwani bopa emɔci ai moto yona odi ngasa. Yona odi na mia abwani bokɔ koko boa.

¹² Baputeja batako badoa ai yo pongono bo ababatise. Ibo bamohɔjɔ bo, Mokoja, êkɔ so ndeni?

¹³ Iyo abasɔmbeja bo, T’onɔjɔeni oko bobuno botako yena ebwani.

¹⁴ Basoda bamohɔjɔ koko bo, Iso ko bôkɔ boni? Iyo abasɔmbeja bo, T’odaeni oko na sanga ai bato bo bapute no likonja. T’odumbeni oko moto na bokosea. Jimani oko bo likonja lisɔkɔ no libwani.

¹⁵ Bato badaka na njingo a mojɔ moYoane. Ibo basusu badaka na bolɛ a milema mibu isa yo adi Masiya.

¹⁶ Yoane ko abasɔmbeja, abala na bu basusu bo, Mbi nabatisaka no oko a madiba. Okina otongo ko akɛkɛ adoe yona onɔi mbi na ngulu. Mbi nitabɔngɔ bo nacingoe licinga lisapata jinde. Iyo adi bobatisa no a Mwembo Mosɛnɔke na a mosa.

¹⁷ Adi na ehɛihɛi a ebɔ ende a bosɛnoja moboku monde kanga bopɛɛ mɛnɛ. Abolea ndongo a edejai ende; âtumba ko poso oko a mosa mua mobwaniti bodimea.

¹⁸ Yoane atɔndɔ bato Mwako Mopele boa, na abaleha na hileho binɛnɛ.

¹⁹ Kumu Elode ko abakea mojɔ mu mobe a ngando jisusu jibe jima yo kɔ,—asa Yoane a blɔkɔ.

²⁰ Mojɔ bo Yoane alemoa na Elode a mojɔ moElodia, mwali omwananango, na ngando jisusu jibe jima yo kɔ.

Batisimo eYesu

²¹ Yana abatisama bato basusu, Yesu abatisama pongono. Yana angaka yo, Diko didipoama oko bodipoama,

²² na Mwembo Mosɛnɔke motita ai yo o ekɔmɛli esungu. Kɔpi emana koko oho Diko bo, Wɛ odi Mwana’mbi ongɛnjɔ. Nadi na sepi enɛnɛ a mojɔ mowɛ.

Batata baYesu

²³ Yana abanga Yesu elomu ende, adaka na bianga domi-isato na dea. Bato bamonjaka o mwana oYosepa,

²⁴ mwana oEli, mwana oMatata, mwana oLewi, mwana oMeleki, mwana oYanai, mwana oYosepa,

²⁵ mwana oMatatia, mwana oAmosa, mwana oNauma, mwana ’Eseli, mwana oNaga,

²⁶ mwana oMata, mwana oMatatia, mwana oSimi, mwana ’Yoseke, mwana ’Yoda,

²⁷ mwana ’Yoana, mwana oLesa, mwana oSelubabela, mwana oSalatiele, mwana oNeli,

²⁸ mwana oMɛliki, mwana ’Adi, mwana oKosama, mwana ’Elamadama, mwana ’Ele, mwana ’Yesu,

²⁹ mwana ’Eliasele, mwana ’Yolima, mwana oMatata, mwana oLewi,

³⁰ mwana oSimeona, mwana ’Yuda, mwana ’Yosepa, mwana ’Yonama, mwana ’Eliakima,

³¹ mwana oMelea, mwana oMena, mwana oMatata, mwana oNatana, mwana oDawidi,

³² mwana ’Yisai, mwana ’Obede, mwana oBoasa, mwana oSalamona, mwana oNasona,

³³ mwana ’Aminadaba, mwana ’Aluni, mwana ’Eselona, mwana oPalɛsɛ, mwana ’Yuda,

³⁴ mwana ’Yakobo, mwana ’Isaka, mwana ’Abalayama, mwana oTela, mwana oNakola,

³⁵ mwana oSeluga, mwana oLeu mwana oPalega, mwana ’Ɛbɛlɛ, mwana oSela,

³⁶ mwana oKainana, mwana ’Alapasada, mwana oSema, mwana oNoa, mwana oLameka,

³⁷ mwana oMatusala, mwana ’Enoka, mwana ’Yaleda, mwana oMalalele, mwana oKainana,

³⁸ mwana ’Enosa, mwana oSete, mwana ’Adama, mwana oNjambe.