Luka 24 - Nouveau Testament en Ngombe 1961

Yesu Angɔ a Bogwa

¹ Yana abenga bohoa busa boboso, bali batomba malasi masɛlingoa bo, na bakɛ a esɛmɔ a elɔngɔ mɛnɛ.

² Bane bo litai lima hilingojama, na lidonga a esɛmɔ.

³ Akwea bo ko a tei, bainɛ nongo mokuku moKumu Yesu.

⁴ Akakwanaka bo a mojɔ momina, bato-bami babae bamana mbalakaka, na ba’ma a dɔngɔ dibu. Bisenja bibu bidaka na bolailai.

⁵ Bali baluluma na bɔ, na basunea maso mabu oko a kpɔtɔ. Bami babahɔjɔ bo, Ino odukakaniyona odi mɔ a esika ebagwake mojɔ moye?

⁶ Iyo aditi ya; angɔi! Leni mojɔ mobala yo na nu yana adaka yo a Galile.

⁷ Abala bo badi bokaba Mwana ’Moto a Inɔmɔ mabato babe, bo badi bomowa amole-mobokea, na bo adi bongɔ a bogwa na masu masato.

⁸ Oko boa bikenge biYesu bihula a milema mibu.

⁹ Badonga a esɛmɔ, basɔmbɔ a botɔndɔ babwɛnji domi-na-omɔci mojɔ momina mosusu, na batɔndɔ bacingami batongo pongono.

¹⁰ Baya batɔndɔ babwɛnji ngando jimina badaka Malia oMagadala, na Yoana, na Malia nange eYakobo, na bakina bali batongo baya badaka na bu.

¹¹ Babwɛnji ko balɛ bo bikenge bimina bidaka oko ebalabala pɛ; baijima nongo.

¹² Pɛtɛlo ko angɔ, na apota ebango a esɛmɔ. Asasunea a bonja a tei, na anɛ oko bisenja pɛ bisambi, na asɔmbɔ a ngando oko na bokamoa a mojɔ momina.

Njea eEmau

¹³ Bakina babu babae bakɛ busa bomina a ekina ngando kombe Emau, mosiso o kilometa domi-na-jibae.

¹⁴ Ibo basolanaka a mojɔ mongando ji jisusu.

¹⁵ Abalanaka bo boa na masolo mabu, Yesu yo mɛnɛ abatama, na abapaka a njea.

¹⁶ Ibo ko baimombetea na miso mabu.

¹⁷ Iyo abala na bu bo, Mijɔ misolanaka no a njea enu midi bo? Ibo ba’ma oko bo’ma, na badaka na wa a miso mabu.

¹⁸ Okina obu, kombe ende Kɛlɔpa, amosɔmbeja bo, Mokɛndɛli omɔci a Yelusalema yona odi pɛ bojeba mijɔ mia mikwabi oho na masu ma, oko wɛ pɛ?

¹⁹ Yesu abala na bu bo, Mijɔ mimina nda? Ibo bamosɔmbeja bo, Oko mojɔ moYesu oNasaleta yona odaka motɔndɔi. Bilomu binde, na bibaeli binde, bidaka na ndangasa a boso boNjambe, na a boso bobato basusu.

²⁰ Basuku banganga ko, na bakumu basu, bamopeabi, bajimabi bo agwɛ, na bamowabi a mole-mobokea.

²¹ Iso ko bodaka na njingo bo yo adae mosikoi oYisalaele. Ee, ngando ji jidaki boa, masu masi edɛye masato.

²² Bakina bali basu ko bakamojai so bou.

²³ Ibo bakɛi a esɛmɔ ehuma mɛnɛ, na baniti nongo mokuku monde. Oko boa babuli ai so, na batɔndɔi so bo bani bakina babwɛnji baDiko baya babali bo adi oko mɔ.

²⁴ Bakina bato basu bakɛi a esɛmɔ, na bani o ami bala bali bamina. Iyo ko—bamotaniti.

²⁵ Yesu abala na bu bo, Ino bato balibunga! Milema minu midi na kitɛ a mojɔ mongando jisusu jibala batɔndɔi cina eye?

²⁶ Ebɔngiti bo Masiya adingoe boa, bo akwee a ekumu ende?

²⁷ Oko boa, yo abanga na mikanda miMose na batɔndɔi basusu, na abacingea ngando jisusu jia jidi a Misɔnɔ a mojɔ monde mɛnɛ.

²⁸ Babatama na ngando ekɛkɛ bo. Iyo ko akɔ bo adojae.

²⁹ Ibo ko bamongɔɔnɔ bo, Da na su, mojɔ bo busa bosɛlɛi edɛye. Edika mweka pɛ bo busa bodipe. Oko boa akwea bo adae na bu.

³⁰ Adaka yo na bu a mesa, atomba molɛmbɛ, ajongoa, abuka molɛmbɛ na abapa.

³¹ Miso mabu mahoa na bamombetea. Iyo ko adimoa, na baimonɛ koko na miso.

³² Ibo babalana bo, Milema misu mingoiti mosa a tei esu, yana asolaki yo na su a njea, na yana acingeaki so Misɔnɔ?

³³ Oko boa, bangɔ bokpa, basɔmbɔ a Yelusalema, na batana bacingami domi-na-omɔci baya bama titana na bakina batongo.

³⁴ Ibaba babala bo, Kumu angɔi a bogwa soti, na asabolojai ai Simona!

³⁵ Ibo pongono batɔndɔ mojɔ mua mokwa na bu a njea, na bo bamombetea yana abukaka yo molɛmbɛ.

Yesu Asaneja ai Bacingami

³⁶ Amaka bo bala bikenge bimina, Yesu ami ma oko bo’ma a ndanda ebu. Abala na bu bo, Bowi ai no!

³⁷ Ibo ko bagasima, na bangbɛngbɛmɛ bou, mojɔ bo balɛkɛ bo banɛkɛ oko mwembo.

³⁸ Iyo abala na bu bo, Ebangaka no ndeni? Odini na kitɛ a milema minu mojɔ moye?

³⁹ Anjani mɔmɔ mambi na bibota bimbi, bo edi oko mbi mɛnɛ. Bɛnjɛni mbi na mɔmɔ manu. Anjani na miso; mojɔ bo mwembo mopeliti mini na kua o anɛkɛ no bo mbi napeli.

⁴⁰ Abala yo boa, abaneja mɔmɔ mande na bibota binde.

⁴¹ Ibo ko badaka oko na kitɛ; bayegebana koko na bokamoa na sepi.

⁴² Oko boa Yesu abala na bu bo, Odini na eka eboyaka ya? Bamopa ekenge eswi ekaleamake,

⁴³ na atomba swi na ayaka a boso bobu.

⁴⁴ Abala na bu bo, Mijɔ mibalaka mbi na nu yana adaka mbi na nu oko mimi, bo ngando jisusu jia jisɔnɔmɔ a mojɔ mombi a Mibeko miMose, a mikanda mibatɔndɔi, na mokanda moNjembo, jidi bongama soti.

⁴⁵ A ehole emina, abapa bohu a milema mibu bo bacingee Misɔnɔ.

⁴⁶ Abala koko na bu bo, Oko boa, mosɔnɔmɔ bo Masiya adi bodingoa soti, bo angɔe a bogwa na masu masato,

⁴⁷ na bo batɔndɔe mwako a kombe ende a Yelusalema boso, na a makota masusu, a mojɔ mobokina bojibe na bohekoja bomilema.

⁴⁸ Ino odini batati bangando jimina.

⁴⁹ Ikani ko! mbi nalomeaka no mua modikeja Sangwa’mbi. Toma mbani ko a ngando oko adi ndangasa eDiko pɛ bopeta lwaja no.

Yesu Asɔmbɔ Oho Diko

⁵⁰ Asi ko akɛi na bu oko a Betania. Angɔjɔ mɔmɔ mande na abapamboa.

⁵¹ Yana abapamboaka yo, abɔtɔnɔ na bu na atombama oho Diko.

⁵² Ibo ko bamosakoa, basɔmbɔ a Yelusalema na sepi enɛnɛ,

⁵³ na bakɛkɛ a tempelo masu masusu a bosakoa Njambe.