Luka 23 - Nouveau Testament en Ngombe 1961

Esambi ePilato

¹ Bato balikita bangɔ basusu, na bakɛ na Yesu boso Pilato.

² Babenga bomodumbea ebango bo, Iso bobolojai moto yo na mojɔ. Apangoaka bato balikota lisu, na alembaka bato bo bataputa tako eKaisala. Abalaka koko bo yo mɛnɛ adi Masiya na Kumu.

³ Pilato amohɔjɔ bo, Wɛ odi Kumu oBaYuda? Iyo amosɔmbeja bo, Wɛ obali boa.

⁴ Pilato abala na basuku banganga, na bato balikita bo, Mbi mtanɛkɛ nongo mojɔ na moto omina.

⁵ Ibo ko bahɛjɛ bingi. Babala bo, Iyo apangoaka bato a makota masusu maYuda. Abanga bokoja oho Galile, na edɛye amei oko ya.

⁶ Yana aka Pilato ekenge emina, ahɔjɔ isa Yesu adi moto oGalile.

⁷ Ajeba yo bo adi moto olikota liElode, amoloma ai Elode, mojɔ bo yo adaka a Yelusalema a ehole emina.

⁸ Elode adaka na posa ehole eyai bo anɛe Yesu. Oko boa, yana amonɛ yo, adaka na sepi enɛnɛ. Mojɔ bo ama ka mijɔ minde, na adaka na njingo bo Yesu amonejae ekina embete.

⁹ Oko boa, akokeleja Yesu na mahɔjɔ manɛnɛ. Yesu ko aimosɔmbeja nongo ekenge.

¹⁰ Basuku banganga na basɔni badaka hulelu, na bamodumbea ebango na bopipo mɛnɛ.

¹¹ Elode na basoda bande bamokotoa, bamota mota, bamolwaja kasaka eyai ekumu, na amosɔmbeja ai Pilato.

¹² Elode na Pilato bapanda limbaci a busa bomina, mojɔ bo bama da oko soki.

¹³ Pilato abolea likita libasuku banganga, na bakumu, na bato bangando.

¹⁴ Abala na bu bo, Ino odoini na moto yo a esambi embi o moto yona opangoaka bato. Ikani! Mbi namokokelejai a boso bonu, na nani bo aditi nongo na lindo a mojɔ mongando jilangaka no.

¹⁵ Elode koko boa, mojɔ bo yo amosɔmbejai ai so. Ikani! yo akɔiti nongo mojɔ mua mobwani na mokindo mobogwa.

¹⁶ Oko boa nadi bomotua, na nâmocingoa.

¹⁷ (Cina bo acingoaka moto omɔci tu yanga a kola emina.)

¹⁸ Ibo basusu ko babekoa na monɔkɔ momɔci bo, Yɛ agwɛ! Cingoa Balaba ai so!

¹⁹ Balaba adaka a blɔkɔ a mojɔ mobowa, na a mojɔ modane a ngando.

²⁰ Pilato abaleha koko, mojɔ bo yo adaka na posa bo acingoe Yesu.

²¹ Ibo ko babekoa bo, Mobakea a mole-mobokea! Mobakea a mole-mobokea!

²² Pilato abala na bu bala ejisato bo, Mojɔ moye? Bobe bokɔi yo nda? Mbi naniti nongo mojɔ na nde mua mobwani na mokindo mobogwa. Oko boa nadi bomotua, na nâmocingoa.

²³ Ibo ko babɛjɛ bingi; babekoa na bopipo, na ba’nga oko bo agwɛ a mole-mobokea. Oko boa Pilato aka minɔkɔ mibu.

²⁴ Alena mojɔ boa, na ajima bo akɔe o apalaka bo.

²⁵ Ba’nga koko bo acingoe moto yona odaka a blɔkɔ a mojɔ mobowa na dane, na amocingoa. Apeja Yesu ko a mɔmɔ mabu bo bakɔe na nde o apalaka bo.

Bogwa boYesu

²⁶ Abenga bo bodala na Yesu, bapea moto oKulene, kombe ende Simona. Iyo adaka a njea elihule a esika, na bamotombeja mole-mobokea a ngɔngɔ jiYesu.

²⁷ Bato badaka bacingi ngɔngɔ jinde lindundu linɛnɛ; na bali basabimboaka ta mupa, na bayeaka bio a mojɔ monde.

²⁸ Yesu ko ahekoa, abala na bn bo, Ino bana-bali baYelusalema, t’oyeeni oko a mojɔ mombi; yeani oko a mojɔ monu bɛnɛ na bana banu.

²⁹ Mojɔ bo, ikani; masu makɛkɛ adoe yana âbala bato bo, Badi na pasa oko batete, oko sɔpɔ jia jiditi na libota, na mabɛi maya madi pɛ bonungea.

³⁰ Ehole emina ekamea, badi bobala na meno minɛnɛnɛ bo, Bobumana so; na bâbala na meno bo, Puseani so.

³¹ Isa bakɔkɔ mojɔ mu yana adi mole mɔ, badi bokɔ bo na mole mokakanake?

³² Bakɛ na bato batongo babae, bato babe; badaka bacingi na nde engbanga bo bagwɛ na nde.

³³ Yana amea bo a esika yena edi na kombe Engɔngɔ, babakea Yesu a mole-mobokea oko ena, na baya babe pongono, okina a dɔngɔ diebɔ ebami, yona otongo a dɔngɔ diebɔ ebali.

³⁴ Yesu abala bo, Sesa, kina bo, mojɔ bo batacingeaka mojɔ mokɔkɔ bo. Na bakina baboma jonga a mojɔ mobokaba bisenja binde.

³⁵ Bato bangando badaka hulelu a mojɔ mobonja. Basuku bangando ko bamokotoa; babala bo, Iyo ahelejai bato batongo; yɛ asahelejae yo mɛnɛ isa adi Masiya oNjambe, isa Njambe amohɔ.

³⁶ Basoda bamopɔmbeja pongono; bamoyɛjɛ madiba makpɔ,

³⁷ na babala bo, Isa wɛ odi Kumu oBayuda, saheleja.

³⁸ Mokina mosɔnɔ modaka a diko dinde bo, IYO ADI KUMU OBAYUDA.

³⁹ Okina obu babe baya bakaalejama, ananga na nde; abala bo, Wɛ oditi Masiya? saheleja wɛ mɛnɛ na so pongono.

⁴⁰ Yona otongo ko asɔmbeja na alemoa na nde bo, Wɛ, t’obangake Njambe, wɛ yona osi mokindo momina pongono?

⁴¹ Iso bobwani na mokindo momina; bosɔkɔ oko ndese ejibe jisu; yo ko akɔiti nongo mojɔ mobe.

⁴² Na yo abala bo, Yesu, pɛ bobosa mbi okasɔ bokumu bowɛ.

⁴³ Yesu amosɔmbeja bo, Mbi natɔndɔkɔ wɛ na soti bo odae na mbi a Paladiso oko busa bu.

⁴⁴ A ehole emidi, modidi modaka a ngondo esusu, na moyeyoa oko a trois heures.

⁴⁵ Modika-busa mohinda, na ehuako enɛnɛ yena ekabaka tempelo a tei elea oko bolea, bikenge bibae.

⁴⁶ Na Yesu abekoa na kɔpi epipo bo, Sesa, asɔ mwembo mombi a mɔmɔ mawɛ. Ama yo bala boa, mwembo monde mo’mi mana oko bomana.

⁴⁷ Yana anɛ kapitɛni obasoda mojɔ momina, asakaoa Njambe, na abala bo, Iyo adaki moto mopele soti.

⁴⁸ Bato basusu baya badaka ena a bonja, babulɛ oko bobulɛ yana anɛ bo mojɔ momina, na basabimboa ta mupa.

⁴⁹ Bina’nde basusu, na bali baya bama donga na nde a Galile, badaka ba’mi bohali mweka, na hanɛ mojɔ mosusu.

⁵⁰ Okina momi adaka ena, kombe ende Yosepa, moto oAlimate a likota liYuda. Iyo adaka moto olikita libasuku, moto mopele, moto ohodongo.

⁵¹ Iyo aijima nongo bosambeja bobu na mojɔ mokɔ bo. Ambaka koko Bokumu boNjambe na tɛndɛ.

⁵² Moto omina akɛ ai Pilato, na amonga mokuku moYesu.

⁵³ Amotiteja, amodinga na esenja enɛnɛ epu, na amosambea a esɛmɔ, oko atei eengbungulu yena etɔmɔ a litai. Baipaka sa moto ena.

⁵⁴ Busa bomina bodaka busa boMosɛlingo, cina bo busa boSabata bobenga bomea.

⁵⁵ Bali baya bama donga na Yesu a Galile, basusa Yosepa oho, na banɛ esɛmɔ na esika edaka mokuku moYesu.

⁵⁶ Oko boa basɔmbɔ a ngando, na basɛlingoa malasi, na kasa jisoo epele. Bahema a husa boSabata a mojɔ momobeko.