Luka 22 - Nouveau Testament en Ngombe 1961

Ndungu Ebowa Yesu

¹ Edika oko mweka pɛ a Kola emilɛmbɛ mia mipeliti lipetu, yena edi na kombe Kola-eBonɔ.

² Basuku banganga na basɔni badaka na posa a bonɛ ekina njea bo bamowejae, cinabo badaka na bɔ a mojɔ mobato bangando.

³ Satana ko akwea a tei eYuda yona odaka na kombe Iskalio, okina obu Domi-na-babae.

⁴ Iyo akɛ adumbe ndungu na basuku banganga na basuku batempelo bo akabe Yesu ai bo.

⁵ Ibo badaka na sepi, na bajima na nde bo bamopɛ likonja.

⁶ Iyo ajima mojɔ momina, na abanga boduka ehole bo amokabe yana adaka pɛpɛ bato bangando ena.

Yesu na Bacingami Bande a Kola

⁷ Busa boMilɛmbɛ mia mipeliti lipetu bohoa, oko busa bowaka bo mwana-bata a mojɔ moKola-eBonɔ.

⁸ Oko boa, Yesu aloma Pɛtɛlo na Yoane, abala na bu bo, Kɛni, sɛlingoani Kola-eBonɔ a mojɔ mosu bo boyake.

⁹ Ibo babala na nde bo, Esika epalaka wɛ bo bosɛlingoe edi jɔ?

¹⁰ Iyo abasɔmbeja bo, Ikani; okameani a ngando, odini bosongana na okina momi yona otombaka teni emadiba; mosusani oko a ndako ekɛkɛ yo.

¹¹ Balani na moswa’ndako bo, Mokoja ahɔjɔkɔ wɛ bo, Ekenge endako edi jɔ, bo mbi nayake Kola-eBonɔ na bacingami bambi?

¹² Iyo adi boneja no ekenge endako a mboba ediko yenaedi engɛbɛnɛke. Sɛlingoani oko ena.

¹³ Oko boa bakɛ, batana o ama yo bala na bu, na basɛlingoa Kola-eBonɔ.

¹⁴ Iyana abwana ehole, Yesu ada a mesa na babwɛnji bande.

¹⁵ Abala na bu bo, Mbi nadaki na posa enɛnɛ bo nayake na nu Kola ye eBonɔ, oko adi mbi pɛ bopeta dingoa.

¹⁶ Mojɔ bo natɔndɔkɔ no bo mbi nitaeyaka koko, oko adi yo pɛ bopeta ngama a Bokumu bo-Njambe.

¹⁷ Iyo atomba kɔpɔ, ajongoa, na abala bo, Asɔni, kabani a tei enu.

¹⁸ Mojɔ bo, mbi natɔndɔkɔ no bo nitaya mwaka muswa mombuma jivine, oko adi Bokumu boNjambe pɛ bopeta doa.

¹⁹ Atomba molɛmbɛ pongono, ajongoa, abuka molɛmbɛ na abapa. Abala bo, Imu modi mokuku mombi mua mopami a mojɔ monu. Kɔni mojɔ mu bo osalɛjeni ai mbi.

²⁰ Aseja bo boyaka, atomba kɔpɔ pongono, abala na bu bo, Kɔpɔ ye edi mokongo moyene momakia mambi maya masopei a mojɔ monu.

²¹ Ikani ko; ebɔ emokabi ombi edi na mbi a mesa.

²² Mwana ’Moto adi boyana oko a njea yena ehɛngɛmɛ ai yo. Monongo ko ai moto yona odi bomokaba!

²³ Oko boa babanga bobomana kitɛ a mojɔ momoto yona odi bokɔ mojɔ momina.

²⁴ Banoana mwano pongono a mojɔ momoto obu yona obwana boda mosuku obu.

²⁵ Yesu ko abala na bu bo, Bakumu bamakota badi na kpaci ai bo, na basuku babu badi na kombe bakɔmeja.

²⁶ Ino ko otadani nongo boa. Yona odi mosuku onu, yɛ adae o yɛngɛ. Yona odi boso, yɛ adae o mokɔmɛli.

²⁷ Odi boso nda? isa yona odi a mesa, isa yona okɔkɔ elomu emesa? Te yona odi amesa? Mbi ko nadi a tei enu o mokɔmɛli.

²⁸ Ino ko oyeyoini na mbi na lingbangba a tei eminɔngɔ mimbi.

²⁹ Sangwa’mbi apani bokumu. A mojɔ momina, mbi napaka no bisika a bokumu bombi,

³⁰ bo oyakeni na omwakeni a mesa mambi; na ôdani a mingbɛlɛngɔ a bosambeja makota maYisalaele domi-na-mabae.

³¹ Kumu abala bo, Simona, Simona, Satana angaka na bopipo bo apee no a bohɛhɛ no o ahɛhɛkɛ moto ndongo.

³² Mbi ko nangɔɔni a mojɔ mowɛ, bo ejimeli ewɛ etambɛ. Na okahekoa koko ai mbi, toma mbilimeja baninga bawɛ.

³³ Iyo amosɔmbeja bo, Kumu, mbi nadi na mosɛlingo a bokɛ na wɛ a blɔkɔ na a bogwa na wɛ.

³⁴ Yesu abala bo, Pɛtɛlo, mbi natɔndɔkɔ wɛ bo odi bongana mbi ngana jisato bo otajebaka mbi, oko kɔkɔ abelekoakini busa bu.

³⁵ Abala na bu koko bo, Yana aloma mbi no oko ngasa mɛnɛ, pɛpɛ litɔngi lilikonja, pɛpɛ libenga, pɛpɛ sapata, ekina eka etaka na nu? Ibo bɛ bo, Pɛpɛ nongo eka.

³⁶ Iyo abala na bu bo, Edɛye ko, yona odi na litɔngi lilikonja abwani bohtomba, na libenga pongono. Isa moto apeliti embombo, abwani bongɛjɛ kasaka ende bo asombe ekina.

³⁷ Mbi natɔndɔkɔ no bo ekenge ye eMisɔnɔ edi bongama na mbi; Bamolanga a libondo libato babe. Mojɔ bo edikai mweka pɛ, bo ngando jisusu jia jisɔnɔmɔ a mojɔ mombi jidi bongama.

³⁸ Ibo babala bo, Kumu, anja, iso bodi na bimbombo bibae! Iyo abala na bu bo, Ebwani boa.

Gɛtɛsemane

³⁹ Yesu amana na akɛ a Mono moOlive o akɔkɔ yo masu masusu. Bacingami badaka bacingi na nde engbanga.

⁴⁰ Yana amea yo a esika emina, abala na bu bo, Ingakani bo otakweani a njea ebomeka.

⁴¹ Abakina, na akɛ bohali mweka, mosiso momoto aka’ma litai. Atita na magbunda, na angɔɔnɔ bo,

⁴² Sesa, dongeja kɔpɔ yeye ai mbi, isa bolulea bowɛ bodi boa. Endele ko, yɛ modae o apalaka wɛ, te mua mopalaka mbi.

⁴³ Okina obwɛnji oDiko adoa ai yo na amopa ngulu a molema.

⁴⁴ Adaka yo na molɔbɔ mɛnɛ, angɔɔnɔ na bopipo, na midungu minde mitanga a kpɔtɔ o matanga mamakia.

⁴⁵ Asieja yo bo’nga, angɔ na adoa ai bacingami, na abatana bahwɛli a mojɔ momo-bimba.

⁴⁶ Abala na bu bo, Ino ohwɛini hiɔ mojɔ moye? Angɔni, ingakani bo otakweani a bomeka.

Bapea Yesu

⁴⁷ Amaka yo bala boa, bato ba’mi mea oko lindundu mɛnɛ. Okina obu Domi-na-babae adalaka a boso bobu, kombe ende Yuda. Iyo abatama na Yesu bo amohie.

⁴⁸ Yesu ko abala na nde bo, Yuda, opalaka bo okabe Mwana ’Moto na bohia?

⁴⁹ Bato baya badaka bacingi na Yesu, yana anɛ bo mojɔ mua mokɛkɛ adoe, babala bo, Kumu, bota’na na bimbombo edɛye?

⁵⁰ Okina obu akwɛlɛ mobuli omosuku onganga, na amolena litoi liebɔ ebami.

⁵¹ Yesu ko abala bo, Kimani boa! Abakea ebɔ ende a litoi linde, na amoheleja.

⁵² Basuku banganga, na basuku batempelo, na basuku bangando, badoa bo bamopee. Yesu abala na bu bo, Ino odoini a bona na mobengo, na makɔngɔ na pɛngu?

⁵³ Adaka mbi na nu masu masusu a tempelo, oininojani nongo ebɔ a bopea mbi. Pɛ mojɔ; ehole enu emei, ehole endangasa emodidi.

⁵⁴ Bapea Yesu a ehole emina, na bakɛ na nde a ndako emosuku onganga. Pɛtɛlo abasusa bohali mweka.

⁵⁵ Batokana mosa a ndanda elopango, na bada na mobondo oko ena. Pɛtɛlo ada na mobondo a tei ebu.

⁵⁶ Okina moseka yona okɔkɔ elomu endako, anɛ Pɛtɛlo yana adaka yo na mobondo a mosa. Amonja linjenje lipipo, na abala bo, Moto yoyo adaki na nde pongono.

⁵⁷ Iyo ko angana oko bongana. Abala bo, Mwali, mbi nitamojebakadea.

⁵⁸ Okina moto otongo amonɛ ngɔngɔ mweka, na abala bo, Wɛ odi koko moto obu. Pɛtɛlo ko abala bo, Momi, te mbi.

⁵⁹ Yana anɔ isa heure emɔci, okina otongo abala na bopipo bo, Moto yoyo adaki na nde soti mɛnɛ, mojɔ bo adi moto oGalile.

⁶⁰ Pɛtɛlo ko asɔmbeja bo, Momi, mbi nitacingeaka mojɔ mobalaka wɛ. Amaka yo bala bikenge bimina, kɔkɔ ami belekoa oko bobelekoa bokpa.

⁶¹ Kumu ahekoa, na anja Pɛtɛlo oko bonja. Bikenge bibala Kumu na nde bihula a molema monde bo, Wɛ ôngana mbi ngana jisato oko kɔkɔ abelekoakini busa bu.

⁶² Oko boa amana sokolu na ayea bio oko na molɔbɔ.

⁶³ Bato baya basɛnjɛlɛkɛ Yesu bamololea na bamoboma.

⁶⁴ Bakanda litambala a miso mande, na babala na nde bo, Hieja; obomi wɛ nda?

⁶⁵ Babala na nde koko mijɔ minɛnɛ, na bamopɔmbeja.

⁶⁶ Yana ahoa busa, babolea likita libasuku bangando, na nganga, na basɔni, na bakɛ na nde a esambi ebu.

⁶⁷ Babala na nde bo, Isa wɛ odi Masiya, tɔndɔ so. Iyo ko abasɔmbeja bo, Nongo nakatɔndɔ no, otajimani.

⁶⁸ Mbi nakahɔjɔ no, ino otasɔmbejani.

⁶⁹ Endele ko, donga oko a busa bu, Mwana ’Moto âda a ebɔ ebami endangasa eNjambe.

⁷⁰ Ibo basusu bahɔjɔ bo, Wɛ odi Mwana oNjambe? Iyo abasɔmbeja bo, Ino obalakani bo mbi nadi yo.

⁷¹ Ibo babala bo, Bodi boduka tati etongo mojɔ moye? Iso bɛnɛ boki monɔkɔ monde mɛnɛ.