Luka 20 - Nouveau Testament en Ngombe 1961

Lihɔjɔ liNganga

¹ Yesu adaka a tempelo bokina busa; akojaka bato na atɔndɔkɔ Mwako Mopele. Basuku banganga, na basɔni, na basuku bangando, badoa ai yo

² na babala na nde bo, Wɛ okɔkɔ ngando jiji na kpaci enda? Opa wɛ kpaci emina nda? tɔndɔ so.

³ Iyo abasɔmbeja bo, Mbi nadi bohɔjɔ no lihɔjɔ pongono.

⁴ Batisimo eYoane ehula Diko isa ai bato? tɔndɔni mbi.

⁵ Ibo babalana a tei ebu a mojɔ momina, na babala bo, Bokabala bo ehula Diko, yo adi bohɔjɔ so bo, Oimojimani mojɔ moye?

⁶ Na bokabala bo ehula ai bato, bato basusu badi bo’la so matai, mojɔ bo bajimaka bo Yoane adaka motɔndɔi.

⁷ Oko boa basɔmbeja bo bajebiti esika ehula batisimo eYoane.

⁸ Na Yesu abala na bu bo, Na mbi pongono, nitatɔndɔ no yona opani kpaci ebokɔ na ngando ji.

Mondɛ Mogbie na Basali Babe

⁹ Yesu abala na bato mondɛ mu. Okina momi ana gbie. Aekina a mɔmɔ mabasali, na akɛ a likota litongo a boyeyoa.

¹⁰ Yana akpeta mbuma, aloma mobuli ai basali bo bamopɛ libondo limbuma jigbie. Basali ko batua mobuli, na bamoyaneja boa ngasa.

¹¹ Aloma okina mobuli otongo. Bamotua, bamosamboja na bamoyaneja koko boa ngasa.

¹² Aloma koko mobuli obasato. Babeneja mobuli omina, na bamodumba a sokolu.

¹³ Moswa’gbie abala bo, Mbi nâkɔ boni? Nâloma mwana’mbi ongɛnjɔ; isa badi bomosuma.

¹⁴ Basali ko, yana anɛ bo mwana, babalana bo, Sangoli yona! Kɔni bomowoe, nongo bosangoe so bɛnɛ.

¹⁵ Oko boa, bamodumba a sokolu egbie na bamowa oko bowa. Moswa’gbie adi bokɔ bo ai bato bamina?

¹⁶ Adi bodoa, âwa basali bamina, na âpa gbie ai batongo. Aka bo ekenge emina, babala bo, Yɛ bobala boa!

¹⁷ Yesu ko abanja, abala na bu bo, Oko boa, cina eMosɔnɔ mu edi bo? Litai lilona bayoi Lidi edɛye litai limogbukusu lindako.

¹⁸ Moto akakwa a diko dilitai limina, âbukeana. Litai limina ko likakwa a diko dimoto, limopenjepenje.

Lihɔjɔ a Mojɔ Motako

¹⁹ Basɔni na basuku banganga baduka njea bo bamopee a ehole emina, mojɔ bo bacingea bo ama bala mondɛ momina oko a mojɔ mobu; badaka ko na bɔ a mojɔ mobato bangando.

²⁰ Oko boa bamosea, na baloma bato kɛngi ai yo. Bato bamina bakosea bo badi bato basoti, bo balokobane mijɔ minde na njingo bo bamotembee, na bamopɛ a momɔ magonverneur a bomosambeja.

²¹ Oko boa, bahɔjɔ Yesu bo, Mokoja, iso bojebaka bo mijɔ mibalaka wɛ na mikojaka wɛ midi oko mipele. Bato basusu badi amɛci a miso mawɛ, na okojaka njea eNjambe na soti mɛnɛ.

²² Ebɔngi bo so bopute tako ai Kaisala, isa ebɔngiti?

²³ Iyo ko anɛ poloso ebu. Abala na bu bo,

²⁴ Anejani Banka. Edi na elimo enda na kombe enda? Ibo bɛ bo, oko eKaisala.

²⁵ Oko boa abala na bu bo, Kabani ai Kaisala libondo liKaisala, libondo liNjambe ko, oko ai Njambe.

²⁶ Ibo bakamoa bou a mojɔ moekenge ebala Yesu, na badaka oko bogo. Oko boa baihɔnɔ bomodumba a boso bobato a mojɔ mongando jibala yo.

Lihɔjɔ liBaSadoki

²⁷ BaSadoki bajimaka bo bato batangɔ nongo a bogwa. Oko boa, bakina babu badoa na lihɔjɔ ai Yesu.

²⁸ Babala bo, Mokoja, Mose asɔnea so mobeko bo mwanange’moto akagwa, na akakina mwali ngasa, pɛpɛ bana, yo adi bosɔ mwali omina bo abote na nde bana ai mwananango.

²⁹ Badaka boa bananange jibato sambo. Yona mosuku asɔ mwali, na agwa pɛ bobota nongo mwana.

³⁰ Mbakeli onde asɔ mwali omina,

³¹ yona obasato koko, na basusu sambo koko boa, na bagwa pɛ bokina mongo mwana.

³² Mwali yo mɛnɛ agwa ngɔngɔ.

³³ Oko boa, bakangɔ a bogwa, yo adabi mwali onda? Mojɔ bo adaka mwali obu basusu sambo.

³⁴ Yesu abala na bu bo, Bana bangondo ye basɔkɔ bali, na basɔnɔkɔ bali.

³⁵ Bato ko baya babɔngi a bokwea a ngondo yena oho, na a bongɔ a bogwa, batasɔkɔ na batasɔnɔkɔ bali.

³⁶ Ibo bataya gwa, mojɔ bo badi o babwɛnji baDiko; badi bana baNjambe, mojɔ bo badi bana babongɔ a bogwa.

³⁷ Mose yo mɛnɛ ajebeja bo bagwake badi bongɔ, a esika esɔnɔ yo mojɔ molipumba limole. Iyo asemba Kumu bo, Njambe oAbala-yama, Njambe oIsaka, Njambe oYakobo.

³⁸ Njambe ko aditi Njambe obagwake. Adi oko Njambe obato baya badi mɔ; na bato basusu badi mɔ a miso mande.

³⁹ Bakina basɔni basɔmbeja bo, Mokoja, olongi.

⁴⁰ Oko boa badaka na bɔ a bomohɔjɔ koko lihɔjɔ.

Lihɔjɔ liYesu

⁴¹ Yesu abala na bu bo, Bato babalaka bo Masiya adi Mwana ’Dawidi mojɔ moye?

⁴² Dawidi yo mɛnɛ abalaka a mokanda moNjambe bo, Kumu abali na Kumu ombi bo, Da a ebɔ embi ebami,

⁴³ Oko a ehole êdumba mbi soki jiwɛ a cina jibibota biwɛ.

⁴⁴ Isa Dawidi abeaka Masiya Kumu onde, abwani boda mwana’nde na ye?

⁴⁵ Yesu abala na bacingami bande a boso bobato basusu bo,

⁴⁶ Toma nganjamani na basɔni! Posa ebu edi oko a bongɛ na bisenja biyaibiyai, na bo bato bababɛje njɛbɛ a jando. Bapalaka bidie biboso a sinagoge, na bisika biekumu a mabonje.

⁴⁷ Bapunjaka ndako jibali-babogwa, na bangaka bingeeli biyai oko a mojɔ mobokosea pɛ. Bato bamina bâsɔ mokindo monɛnɛ soti.