Luka 2 - Nouveau Testament en Ngombe 1961

Bobotama boYesu

¹ Kaisala Auguseto abakea mobeko bo basɔne kombe jibato bamakota masusu a mikanda.

² Ibu boda bosɔnɔ boboso mɛnɛ, na Kuilinu adaka kumu oSilia a ehole emina.

³ Bato basusu bakɛ, moto na moto a ngando ende mɛnɛ, bo basɔne kombe jibu.

⁴ Yosepa pongono adonga a ngando kombe Nasaleta a likota liGalile, na akɛ Bɛtɛlɛmɛ, ngando eDawidi, a likota liYuda,

⁵ bo basɔne kombe ende, na kombe eMalia, mwali oma yo panda, yona odaka na demi; mojɔ bo Yosepa adaka moto ombota na denga diDawidi.

⁶ Ehole eMalia ebobota emea yana adaka bo oho.

⁷ Abota mwana’nde oboso, mwana-momi. Amodinga na bisenja, na amosambea a yulu edia dibingbende, cina bo ndako epasaje eidaka na pokiso a mojɔ mobu.

⁸ Bakina banjeli babata balikota limina badaka a esika a bobanea mela mabu mabata na bulu.

⁹ Obwɛnji oKumu adoa ai bo; ekumu eKumu ehoja esika edaka bo, na baluluma na bɔ.

¹⁰ Obwɛnji ko abala na bu bo, Yɛni bobanga! Mojɔ bo mbi nadoi na mwako mopele ai no, mua môda mojɔ mosepi enɛnɛ ai bato basusu.

¹¹ Moheleja abotami ai no busa bu a ngando eDawidi, Kumu Masiya.

¹² Ômombeteani na mojɔ mu; ônɛni mwana mokɛkɛlɛkɛ adingi na bisenja bimwana, na asambi a yulu edia dibingbɛndɛ.

¹³ Babwɛnji baDiko bamana bombelele a ehole emina, mandundu mɛnɛ, na badaka bacingi na obwɛnji yona otongo; basakoa Njambe bo,

¹⁴ Ekumu ai Njambe oho Diko; Bowi a ngondo a tei ebato bapalaka Yo.

¹⁵ Ama sɔmbɔ babwɛnji oho Diko, banjeli ba’mi bala oko bo, Yɛni so bokɛe a Bɛtɛlɛmɛ, bokanje mojɔ mobali Kumu na sn.

¹⁶ Bakɛ mbango, na batana Malia na Yosepa, na mwana asambi a yulu.

¹⁷ Yana amonɛ bo, batɔndɔ bwɛnji bosɔ bo a mojɔ momwana.

¹⁸ Bato basusu baya baka mojɔ mobala banjeli, bakamoa oko bokamoa.

¹⁹ Malia ko abomba ngando ji jisusu na ajilɛ a tei emolema monde.

²⁰ Banjeli badonga ena, bakakumejae na bakasakoe Njambe a mojɔ mongando jisusu jika bo na jinɛ bo, o ama bo ka boso.

Bakɛ na Yesu a Tenipelo

²¹ A busa bobolena ganda, oko a busa bobomwambe, bamobakea kombe Yesu, kombe epa obwɛnji oko nango alwakini demi.

²² Yana asia masu mabu maekia mabekeaka mobeko moMose, bakɛ na nde a Yelusalema bo bamopejae ai Kumu,

²³ (Mojɔ bo mosɔnɔmɔ a Mibeko miKumu bo, Bana basusu basɔmi bâhɛngɛmɛ ai Kumu,)

²⁴ na a bopeja bidoa babae isa bana basungu babae, epeeli ebekeama a Mibeko miKumu.

²⁵ Okina momi adaka a Yelusalema, kombe ende Simeona; yo adaka moto obodongo, moto olisuma ai Njambe. Ambaka bogɔmbeja boYisalaele na tɛndɛ, na Mwembo Mosɛnɔke modaka ai yo.

²⁶ Mwembo Mosɛnɔke moma mojebeja bo atagwa, oko adi yo pɛ bopeta nɛ Masiya oKumu.

²⁷ Mwembo momolindea bo akwee a tempelo, na yana akwea baboti na mwana Yesu

²⁸ bo bakɔe ai yo mua mobekeaka Mibeko, yo amosɔ a mɔmɔ mande, asakoa Njambe bo,

²⁹ Kumu, kina mobuli owɛ ayane na bowi edɛye o akina wɛ sako;

³⁰ Mojɔ bo miso mambi mani boheleja bowɛ,

³¹ Bua bosɛlingoi wɛ a mojɔ mobato basusu,

³² Bohu a bohoja makota, Na ekumu a mojɔ moYisalaele bato bawɛ.

³³ Sango na nango bakamoa a bikenge bibala yo a mojɔ monde.

³⁴ Simeona abapamboa, na abala na Maha nange ’mwana bo, Mwana yoyo ahɛngɛmɛ a bodumba na a bongɔjɔ bato banɛnɛ baYisalaele; ahɛngɛmɛ bo adae embete; bato ko bâmolona, mojɔ bo âmeja bilɛli bibato banɛnɛ a bohu.

³⁵ Na molema mowɛ mɛnɛ môbena na abɛnɛ.

³⁶ Okina mwali adaka koko ena, kombe ende Ana. Iyo adaka motɔndɔi; adaka mwana oPanwɛlɛ, moto olikota liAsele, na adaka mobange. Boso mɛnɛ, ama yo kandoa, adaka na muma’nde bianga sambo.

³⁷ Adika yo mwali-obogwa, adaka na bianga domi-bomwambe na binɛi. Iyo aikina nongo tempelo; asakoaka Njambe na ma’nga na bikia na bulu na moi.

³⁸ Iyo adoa pongono a ehole emina; asakoa Njambe, na abala na bato basusu baya bambaka bosikoa bo-Yelusalema a mojɔ moYesu.

³⁹ Ama bo sieja ngando jisusu jibekeaka Mibeko miKumu, Yosepa na Malia ba’mi yana oko a Nasaleta, ngando ebu bɛnɛ, a likota liGalile.

⁴⁰ Mwana akandoa na apinga; adaka na bowɛi bonɛnɛ, na monganji moNjambe modaka na nde.

Yesu Akɛ a Yelusalema

⁴¹ Baboti bande bakɛkɛ a Yelusalema yanga na yanga a mojɔ moKola-eBonɔ.

⁴² Oko boa, yana adaka Yesu na bianga domi-na-bibae, bakɛ koko a Kola, o akɔkɔ bo bihole bisusu.

⁴³ Adaka bo a njea elihule ngɔngɔ jiKola, yɛngɛ Yesu adika oko a Yelusalema, baboti bande ko pɛ bojeba.

⁴⁴ Badingaka bo acingi na bu engbanga, na badala busa bosusu boa. Bamoduka a tei ebina’bu na mela mabu

⁴⁵ pɛ ko bomotana; oko boa basɔmbɔ nduki ende a Yelusalema.

⁴⁶ Yana anɔ masu masato, bamoboloja a tei etempelo. Adaka na mobondo a ndanda ebakoja; abahokeaka na abahɔjɔkɔ mahɔjɔ.

⁴⁷ Bato basusu baya bamoka, bakamoa a mojɔ mobowɛi na masɔmbeja mande.

⁴⁸ Yana amotana bo, bakamoa bou mɛnɛ; na ngwa’nde abala na nde bo, Mwana’mbi, okɔi na su boa mojɔ moye? Iso na sangwao bodukaki wɛ na mokakwano monɛnɛ.

⁴⁹ Iyo abala na bu bo, Odukakini mbi mojɔ moye? Ojebitini bo mbi nabwani boda a ndako eSangwa’mbi?

⁵⁰ Ibo ko baicingea mojɔ mobala yo na bu.

⁵¹ Iyo ayana na bu a Nasaleta, na adaka na lisuma ai bo. Ngwa’nde ko abanea ngando ji jisusu a molema monde.

⁵² Yesu akandoa, na ahɛ na bowɛi na monganji a miso maNjambe na a miso mabato.